ఎర్లింగ్ హాలాండ్: ఆవు గుండెకాయ, కాలేయం, తేనె.. ఆహారంతోపాటు ఈ నార్వే ఫుట్‌బాలర్ వ్యక్తిత్వంలోని ప్రత్యేకతలేంటి...

నార్వే చివరిసారిగా 1998లో ప్రపంచ కప్‌లో పాల్గొంది. అప్పుడు ఎర్లింగ్ హాలాండ్ ఇంకా పుట్టలేదు.

కానీ, ఇప్పుడు ఆ జట్టు ఐదుసార్లు చాంపియన్‌గా నిలిచిన బ్రెజిల్‌ను ఓడించి ప్రపంచ కప్ క్వార్టర్ ఫైనల్స్‌కు దూసుకెళ్లింది. ఇందులో హాలాండ్ రెండు గోల్స్ చేశాడు.

హాలాండ్ ఎత్తు 1.94 మీటర్లు. ప్రస్తుత సీజన్‌లో టాప్ స్కోరర్ అవార్డు కోసం అర్జెంటీనా స్టార్ లియోనెల్ మెస్సీ, ఫ్రాన్స్ స్టార్ కైలియన్ ఎంబాపేలతో హాలాండ్ పోటీ పడుతున్నాడు.

"నాకేమీ తెలియదు, గోల్స్ చేయడమే నా ప్రత్యేకత అని నేను అనుకుంటున్నా... అది సహజంగా జరుగుతుంది" అని సెనెగల్‌పై రెండు గోల్స్ చేసిన తర్వాత హాలాండ్ నవ్వుతూ అన్నాడు.

వరల్డ్ కప్ చరిత్రలో నార్వే తొలిసారి క్వార్టర్ ఫైనల్స్‌కు చేరుకుని చరిత్ర సృష్టించింది. ఈ నెల12న జరగనున్న మ్యాచ్‌లో ఇంగ్లండ్‌ను ఓడిస్తే సెమీఫైనల్స్‌కు చేరుతుంది. అది మరో భారీ విజయం అవుతుంది. దీని కోసం నార్వే ఆశలన్నీ మరోసారి హాలాండ్‌పైనే ఆధారపడి ఉన్నాయి. ఈ నేపథ్యంలో హాలాండ్ గురించి ఐదు ఆసక్తికర విషయాలను తెలుసుకుందాం.

1. ఇంగ్లండ్‌లో పుట్టి...

హాలాండ్ 2000లో ఇంగ్లండ్‌లోని లీడ్స్‌లో పుట్టాడు. అతని తండ్రి ఆల్ఫ్-ఇంగే హాలాండ్ కూడా నార్వే జాతీయ జట్టుకు ఆడాడు. అమెరికాలో జరిగిన 1994 ప్రపంచ కప్‌లో నార్వేకు ప్రాతినిధ్యం వహించాడు. ఆ సమయంలో అతను ఇంగ్లండ్‌లోని లీడ్స్ యునైటెడ్ తరపున ఫుట్‌బాల్ ఆడుతున్నాడు.

ఎర్లింగ్ హాలాండ్‌కు నాలుగేళ్ల వయసు ఉన్నప్పుడు అతని కుటుంబం దక్షిణ నార్వేలోని వారి స్వస్థలం ప్రియెన్‌కు తిరిగి వెళ్లింది. అక్కడే హాలాండ్ చిన్న వయసులోనే ఫుట్‌బాల్ ఆడటం ప్రారంభించాడు. లాంగ్ జంపింగ్, సైక్లింగ్ వంటి ఇతర క్రీడలపై కూడా ఆసక్తి చూపాడు.

"హాలాండ్‌ను నేను మొదటిసారి చూసినప్పుడు అతని వయసు ఐదేళ్లు. అతను తనకంటే ఒక సంవత్సరం పెద్దవాళ్లైన అబ్బాయిలతో కలిసి ఇండోర్ శిక్షణా శిబిరంలో చేరాడు" అని కోచ్ ఆల్ఫ్ ఇంగ్వే బెర్న్‌డ్‌సెన్ 'కోల్' వెబ్‌సైట్‌కు చెప్పారు

"అతను ఇతర ఆటగాళ్ల కంటే ఒక సంవత్సరం చిన్నవాడు కావడం వల్ల కొంచెం పొట్టిగా ఉండేవాడు. కానీ ప్రత్యర్థి ఆటగాళ్లు పొడవుగా ఉన్నప్పటికీ అతను గోల్స్ చేస్తూనే ఉండేవాడు. అతను గొప్ప శిఖరాలకు చేరుకుంటాడని, జాతీయ జట్టుకు ఆడగల ప్రతిభ అతనికి ఉందని అతనికి 11, 12 ఏళ్ల వయసున్నప్పుడే మాకు అర్ధమైంది " అని బెర్నెడ్‌సెన్ అన్నారు.

హాలాండ్ 15 ఏళ్ల వయసులో నార్వేకు చెందిన బ్రైన్ ఎఫ్‌కే జట్టు తరఫున ఆడటం ప్రారంభించాడు.

అద్భుతమైన గోల్ చేసే సామర్థ్యం అతన్ని మరో నార్వేజియన్ క్లబ్ అయిన మోల్డే ఎఫ్‌కేకి తీసుకువెళ్లింది. ఆ క్లబ్‌కు దిగ్గజ మాజీ స్టార్ ఓలే గున్నార్ సోల్స్‌కేర్ మేనేజర్‌గా ఉన్నారు. ఆయనను హాలాండ్‌కు మార్గదర్శకులలో ఒకరిగా భావిస్తారు.

ఆస్ట్రియన్ క్లబ్ రెడ్ బుల్ సాల్జ్‌బర్గ్‌ తరఫున ఆడుతున్నప్పుడే హాలాండ్ అంతర్జాతీయ దృష్టిని ఆకర్షించడం ప్రారంభించాడు. అప్పటి నుంచి అతను జర్మన్ క్లబ్ బోరుస్సియా డోర్ట్‌మండ్‌లో తన స్థానాన్ని సుస్థిరం చేసుకున్నాడు.

ప్రస్తుతం అతను బ్రిటిష్ క్లబ్ మాంచెస్టర్ సిటీకి అత్యంత ముఖ్యమైన స్టార్ ఆటగాడు.

2. గోల్స్ యంత్రం

ఈ ప్రపంచ కప్‌లో హాలాండ్ కేవలం నార్వే అభిమానుల అంచనాలనే కాకుండా ఈ టోర్నమెంట్‌లో ఆడాలనే తమ కలలను సాకారం చేసుకోలేకపోయిన మాజీ ఆటగాళ్లందరి సమష్టి భారాన్ని కూడా తన భుజాలపై మోస్తున్నాడు.

1994,1998లో వరుసగా ప్రపంచ కప్‌లకు అర్హత సాధించడం మినహా నార్వే చాలా కాలంగా ప్రధాన ఏ ప్రధాన అంతర్జాతీయ టోర్నమెంట్‌కూ అర్హత సాధించలేకపోయింది. వారు చివరిసారిగా పాల్గొన్న ప్రధాన టోర్నమెంట్ యూరో 2000.

కానీ ఇప్పుడు ఆ జట్టుకు ప్రధాన స్టార్ ఆటగాడు ఉన్నాడు. అతని పేరు ప్రపంచ వ్యాప్తంగా మారుమోగుతోంది.

హాలాండ్ తన చివరి 14 అంతర్జాతీయ మ్యాచ్‌లలో ప్రతి దానిలోనూ గోల్ చేసి తన మొత్తం గోల్స్ సంఖ్యను 27కి చేర్చాడు.

మొత్తంగా అతను 54 అంతర్జాతీయ మ్యాచ్‌లలో 62 గోల్స్ సాధించాడు. ఇది ప్రతి 71 నిమిషాలకు ఒక గోల్ అనే అద్భుతమైన సగటు.

3. హాలాండ్ తినే ఆహారం

మైదానం వెలుపల తన జీవనశైలి, ఆహారపు అలవాట్లకు సంబంధించిన వివరాలను హాలాండ్ సోషల్ మీడియా ద్వారా పంచుకుంటున్నాడు.

ఈ యువ అథ్లెట్ రోజుకు సుమారు 6,000 కేలరీలు తీసుకుంటాడు. అతని ఆహారంలో ఆవు గుండె, కాలేయం, స్వచ్ఛమైన తేనె, పాలు వంటి ప్రోటీన్ అధికంగా ఉండే ఆహార పదార్థాలుంటాయి.

"నన్ను నేను అత్యుత్తమంగా తీర్చిదిద్దుకోవడానికి చేయగలిగినదంతా చేస్తున్నా" అని ఒక వీడియోలో హాలాండ్ చెప్పాడు.

అంతేకాకుండా రాత్రిపూట అన్ని ఎలక్ట్రానిక్ పరికరాలను స్విచ్ ఆఫ్ చేయడం, కనీసం 10 గంటలు నిద్రపోవడం వంటి చాలా కఠినమైన అలవాట్లను కూడా అతను పాటిస్తాడు.

ఇది అతనికి కొత్తేమీ కాదు. ఆస్ట్రియన్ క్లబ్ రెడ్ బుల్ సాల్జ్‌బర్గ్‌లో ఉన్నప్పుడు చిన్న వయసులోనే తన ఆరోగ్యం, నైపుణ్యాభివృద్ధిపై అతను చూపిన శ్రద్ధ సహచర ఆటగాళ్లను ఎంతగానో ఆకట్టుకుందని చెబుతారు.

"హాలాండ్ చాలా ఉన్నత స్థాయి ప్రొఫెషనల్. మేము ప్రయాణాలలో పేకాట ఆడుతున్నప్పుడు అతను నిద్రపోతూనో లేదా తన ఆహారపు అలవాట్లను ఎలా మెరుగుపరుచుకోవాలనే దానిపై శాస్త్రీయ వ్యాసాలు చదువుతూనో ఉంటాడు. తన నైపుణ్యాలను నెక్ట్స్ లెవెల్‌కు తీసుకెళ్లడానికి, మెరుగుపరచుకోగల ప్రతి విషయం కోసం అతను నిత్యం వెతుకుతూ ఉంటాడు" అని అతని మాజీ సహచర ఆటగాడు మాక్సిమిలియన్ వోబర్ డేసాన్ చానెల్‌తో అన్నారు.

4. మూలాలను గౌరవించే వ్యక్తి

లీడ్స్‌లో జన్మించిన హాలాండ్‌కు ఇంగ్లండ్ తరఫున ఆడి యూరోపియన్, ప్రపంచ ఫుట్‌బాల్‌లో అత్యున్నత శిఖరాలను చేరుకోగలిగేవాడు. కానీ ఆ అవకాశాన్ని అతనెప్పుడూ పరిగణనలోకి తీసుకోలేదు.

"ప్రపంచ ప్రఖ్యాతి పొందినప్పటికీ హాలాండ్ వ్యక్తిత్వం మాత్రం మారలేదు" అని బీబీసీ స్పోర్ట్స్‌తో నార్వే క్రీడా జర్నలిస్ట్ ఆండ్రియాస్ కోర్సుంద్ అన్నారు.

అతనికి తన నేపథ్యం గురించి బాగా తెలుసు. అతను తరచుగా రోగాలాండ్‌లోని తన స్వస్థలాన్ని సందర్శిస్తుంటాడు. అతను తన మూలాల పట్ల చాలా గర్వపడతాడు జాతీయ జట్టు తరఫున ఆడేటప్పుడు ఎప్పుడూ నార్వే మీడియాకు ప్రాధాన్యత ఇస్తాడు.

నార్వే వైకింగ్ చరిత్ర నుండి స్ఫూర్తి పొందే అతను తన దేశానికి ప్రాతినిధ్యం వహించడాన్ని గర్వకారణంగా భావిస్తాడు.

తన మూలాలతో ఉన్న ఈ అనుబంధం కారణంగానే హాలాండ్ తన జాతీయ జట్టు జెర్సీపై తన పూర్తి పేరు 'బ్రాడ్ హాలాండ్'ను ముద్రించుకున్నాడు. 'బ్రాడ్' అనేది అతని తల్లి ఇంటిపేరు. తల్లి, తండ్రి ఇంటి పేర్లను కలిపి ఉపయోగించడం నార్వేలో ఒక సంప్రదాయం.

‘‘నార్వేకు హాలాండ్ చాలా ముఖ్యం’’ అని కోర్సుంద్ అన్నారు.

ప్రపంచంలోనే అత్యంత ప్రజాదరణ పొందిన క్రీడలో అతను అపూర్వమైన స్థాయిలో ఒక స్టార్‌గా ఎదిగాడు. కేవలం 55 లక్షలకు పైగా జనాభా ఉన్న దేశం ప్రపంచంలోని గొప్ప ఫుట్‌బాల్ క్రీడాకారుల్లో ఒకరిని అందించడం ఒక అద్భుతమైన ఘనత.

5. ప్రత్యేకమైన వ్యక్తిత్వం

1.95 మీటర్ల ఎత్తు, పొడవాటి బంగారు రంగు జుట్టుతో, హాలాండ్‌ను ఫుట్‌బాల్ ప్రపంచంలో ఎవరైనా సులభంగా గుర్తించగలరు.

మాంచెస్టర్ సిటీ తరఫున ఆడడం ప్రారంభించిన తర్వాత అతని ప్రత్యేక వ్యక్తిత్వం మరింతగా బయటికొచ్చింది. కొన్నిసార్లు హాలాండ్ చూపించే బ్రిటిష్ తరహా హాస్య శైలి అతన్ని అభిమానులకు మరింత దగ్గర చేసింది.

హాలాండ్ తన యూట్యూబ్ చానెల్‌లో అనేక వీడియోలను పోస్ట్ చేస్తాడు. 'వైకింగ్స్' అనే యానిమేటెడ్ చిత్రంలో 'హాలాండ్' అనే వైకింగ్ పాత్రకు గాత్రదానం కూడా చేశాడు.

"ఒక విధంగా చూస్తే హాలాండ్ పూర్తిగా సాధారణ నార్వే క్యక్తిలా ఉండడు. "అతనికి ఆత్మవిశ్వాసం చాలా ఎక్కువ. కొన్నిసార్లు కొంచెం దూకుడుగా కనిపిస్తాడు. అతనికి తన విలువ, నైపుణ్యాలు తెలుసు, తనపై తనకు పూర్తి నమ్మకం ఉంది" అని నార్వే జర్నలిస్ట్ లార్స్ సివెర్ట్సెన్ అన్నారు.

‘‘స్కాండినేవియాలో వినయానికి చాలా ప్రాధాన్యతనిచ్చే సంస్కృతి ఉంది. కానీ ఎర్లింగ్ హాలాండ్‌ను బెంచ్‌పై కూర్చోబెడితే అతను బహిరంగంగానే అసంతృప్తి వ్యక్తంచేస్తాడు. అందుకే నార్వే ప్రజలకు అతను కాస్త భిన్నమైన వ్యక్తిగా కనిపిస్తాడు. అదే అతన్ని మాకు మరింత ఆసక్తికరమైన హీరోగా నిలబెడుతోంది’’ అని చెప్పారు.

అతనికి కీర్తితో పాటు, ఒక సూపర్‌స్టార్‌గా ఉండటం వల్ల కలిగే ఇతర ప్రయోజనాలు కూడా వచ్చాయి. ఉదాహరణకు అతని జెర్సీల అమ్మకాలు పెరగడం, ప్రపంచ కప్‌పై ఆసక్తి పెరగడం, యువ తరానికి ప్రేరణగా నిలవడం వంటివి.

"మా దేశంలో సాధారణంగా చూసే స్పోర్ట్స్‌హీరోలతో పోలిస్తే హాలాండ్ పూర్తిగా భిన్నమై స్టార్. మైదానంలో ఇలాంటి అద్భుతమైన విజయాలు సాధిస్తున్న వీరుడు మన గడ్డకు చెందినవాడే అని నార్వే ప్రజలు గర్వపడుతుండడం మీరు గమనించవచ్చు" అని సివెర్ట్సెన్ అన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)