ఫ్రాన్స్‌: సూపర్ మార్కెట్లలోని ఫ్రిజ్‌లపై సైబర్ దాడులు, ఉష్ణోగ్రతలు పెంచి లక్షల యూరోల నష్టం కలిగించిన దుండగులు

ఫ్రాన్స్‌లోని వందలాది సూపర్ మార్కెట్‌లపై సైబర్ దాడి జరిగింది. సూపర్ మార్కెట్స్‌లోని ఫ్రిజ్‌లను, ఫ్రీజర్‌లను లక్ష్యంగా చేసుకున్నారు. అవి సరిగా పనిచేయకుండా చేశారు. ఫలితంగా కోట్ల రూపాయల విలువైన ఆహారం పాడైపోయింది.

ఫ్రిజ్‌లు, ఫ్రీజర్‌ల ఉష్ణోగ్రతను నియంత్రించే సాఫ్ట్‌వేర్‌ను హ్యాకర్లు తమ ఆధీనంలోకి తీసుకున్నారు. దీంతో కొన్ని ఫ్రిజ్‌లు రాత్రికి రాత్రే 50 డిగ్రీల సెల్సియస్ వరకు వేడెక్కేలా చేశారు. సూపర్ మార్కెట్‌ సంస్థ ఈ దాడి వివరాలు వెల్లడించింది.

ఈ దాడి చాలా తీవ్రమైందని, ఇంతకుముందెన్నడూ చూడనిదని కూపెరేటీవ్ యూ సీఈవో తెలిపారు. తమ ఆధీనంలో ఉన్న పలు సూపర్ మార్కెట్లు ఈ సైబర్ దాడి బారిన పడినట్టు పేర్కొన్నారు.

ఆ సంస్థకు చెందిన 100కిపైగా సూపర్ మార్కెట్‌లు ఈ దాడికి గురయ్యాయి. ఇంటర్‌మార్షే, దాని నెట్టో బ్రాండ్‌కు చెందిన 180 షాపుల్లో కూడా ఫ్రిజ్‌లు దెబ్బతిన్నాయి. మరిన్ని దుకాణాలకు ఇలాంటి సమస్య రాకుండా ఉండేందుకు 100 స్టోర్ల వరకు అత్యవసరంగా ఇంటర్నెట్ నుంచి వేరు చేయాల్సి వచ్చిందని ఆ సంస్థ ప్రతినిధి తెలిపారు.

కార్‌ఫూర్, మోనోప్రిక్స్, ఈ.లెక్లెర్ వంటి పెద్ద ఆహార రిటైల్ సంస్థలు కూడా ఈ సైబర్ దాడి బారినపడ్డాయి. డానిష్ ఇంజినీరింగ్ కంపెనీ డాన్‌ఫాస్ అందించిన సాఫ్ట్‌వేర్‌ను లక్ష్యంగా చేసుకొని హ్యాకర్లు ఈ దాడి చేశారు.

సాధారణంగా సూపర్ మార్కెట్లలోని ఫ్రీజర్లు రాత్రి కొంతసేపు మంచు కరిగించే ప్రక్రియలో భాగంగా కొద్ది సమయం వేడెక్కుతాయి. కానీ హ్యాకర్లు వాటి ఉష్ణోగ్రతను మరింత పెంచి అలాగే ఉండేలా చేశారు. అయితే ఈ సమయంలో ఫ్రిజ్‌లు, ఫ్రీజర్‌లు ఎంత వరకు వేడెక్కాయనే విషయాన్ని డాన్‌ఫాస్ సంస్థ చెప్పలేదు.

సైబర్ దాడికి గురైన ఫ్రిజ్‌లు, ఫ్రీజర్‌లు పాత మోడళ్లని, వాటిలో ఉన్న సెక్యూరిటీ సాఫ్ట్‌వేర్‌ను అప్‌డేట్ చేసే అవకాశం లేకపోవడం వల్ల ఇలా జరిగిందని డాన్‌ఫాస్ పేర్కొంది.

వ్యవస్థలను ఎప్పటికప్పుడు అప్‌డేట్ చేస్తూ ఉండాలని వ్యాపార సంస్థలకు చాలా కాలం నుంచి చెబుతూనే ఉన్నామని డాన్‌ఫాస్ వెల్లడించింది.

400 స్టోర్లపై సైబర్ దాడి

"ఫ్రిజ్‌లు, ఫ్రీజర్లు సరిగా పని చేయడం మా బిజినెస్ కస్టమర్లకు చాలా అవసరం. అందుకే వారి వ్యవస్థలు నమ్మకంగా, సురక్షితంగా పని చేసేలా ప్రయత్నిస్తున్నాం. వారికి అన్ని రకాలుగా సాయం చేస్తూనే ఉంటాం" అని ఆ సంస్థ తెలిపింది.

సైబర్ దాడి ఎంత పెద్ద స్థాయిలో జరిగిందనే విషయంపై స్పష్టత లేకపోయినా, వివిధ వ్యాపార సంస్థలు ఇచ్చిన సమాచారం మేరకు ఫ్రాన్స్‌లోని 15000 స్టోర్లు ఉండగా అందులో 400 వరకు ప్రభావితమయ్యాయని తెలుస్తోంది.

క్యారెఫోర్ తన 6000 స్టోర్లలో 80 స్టోర్లలోని ఫ్రిజ్‌లు హ్యాక్‌కు గురయ్యాయని చెప్పింది. మోనోప్రిక్స్ తన 400కుపైగా స్టోర్లలో 5శాతం దెబ్బతిన్నాయని వెల్లడించింది. అక్కడ ఆహార పదార్థాల నాణ్యత దెబ్బతిన్నదన్న అనుమానంతో అమ్మకాలు నిలిపివేసినట్టు కూడా తెలిపింది.

సోమవారం మధ్యాహ్నం వరకు కొన్ని తాజా, ఫ్రోజెన్ ఆహార పదార్థాలను ఉంచే ఫ్రీజర్లు ఇంకా పని చేయడం లేదని ఇంటర్‌మార్షే, నెట్టో యాజమాన్య సంస్థ అయిన మౌస్‌కెటైర్స్ గ్రూప్ బీబీసీకి ఇచ్చిన ప్రకటనలో పేర్కొంది.

ప్రభావితమైన ఫ్రీజర్‌ల నుంచి పాడైపోయిన ఆహార పదార్థాలను తొలగించేందుకు అవసరమైన జాగ్రత్తలు తీసుకున్నామని ఆ సంస్థ తెలిపింది. వీలైనంత త్వరగా షెల్ఫ్‌లను కొత్త సరకులతో నింపే పనిలో ఉన్నామని పేర్కొంది.

లక్షల యూరోల నష్టం

ఇంటర్‌మార్షే సంస్థ తెలిపిన వివరాల ప్రకారం, సోమవారం తెల్లవారుజాము వరకు ఆరు గంటల పాటు ఫ్రిజ్‌లు 50 డిగ్రీల సెల్సియస్ వరకు వేడెక్కాయి. దీంతో ప్రభావితమైన ఆహార పదార్థాలన్నింటినీ పడేసినట్టు రాయిటర్స్ వార్తా సంస్థ వెల్లడించింది.

సోమవారం ఉదయం సూపర్ మార్కెట్‌లకు వచ్చిన మేనేజర్లు ఈ సైబర్ దాడి కారణంగా ఫ్రీజర్‌ల నుంచి వేడి గాలి రావడాన్ని గుర్తించారు. కొన్నిచోట్ల చిన్నచిన్న అగ్ని ప్రమాదాలు కూడా జరిగాయి.

ఫ్రెంచ్ టీవీ చానెల్ బీఎఫ్ఎంటీవీ విడుదల చేసిన ఒక ఫోటోలో, ఐస్‌క్రీమ్‌లను ఉంచే ఫ్రీజర్‌లో టెంపరేచర్ 26.5 డిగ్రీల సెల్సియస్‌గా కనిపించింది.

ఆల్సాస్ ప్రాంతంలోని రెండు సూపర్ మార్కెట్‌లు కలిసి 2.7 లక్షల యూరోల(దాదాపు రూ. 2.7 కోట్లకుపైగా) నష్టపోయాయని బీఎఫ్ఎంటీవీ తెలిపింది. దీంతో దేశవ్యాప్తంగా ఈ సైబర్ దాడి వల్ల జరిగిన మొత్తం నష్టం మిలియన్ల యూరోలకు చేరే అవకాశం ఉందని పేర్కొంది.

'ఆహారాన్ని ఆయుధంగా మార్చారు'

ఆహార రిటైల్ సంస్థల ఫ్రిజ్‌లపై జరిగిన భారీ సైబర్ దాడిపై ఫ్రెంచ్ అధికారులు ప్రత్యేక దర్యాప్తు ప్రారంభించారు. దీనిని దేశంలోని అనేక ప్రధాన సూపర్ మార్కెట్ చైన్‌ల ఫ్రిజ్‌లను ప్రభావితం చేసిన పెద్ద స్థాయి సైబర్ దాడిగా పారిస్ ప్రాసిక్యూటర్ కార్యాలయం పేర్కొంది.

యూరోపియన్ ఫుడ్ కమిషనర్ క్రిస్టోఫ్ హాన్సెన్ ఈ సైబర్ దాడిని ఖండించారు. ఆహార భద్రతపై అన్ని స్థాయిల్లో మరింత దృష్టి పెట్టాల్సిన అవసరం ఉందని ఆయన ఎక్స్‌లో పెట్టిన పోస్టులో పేర్కొన్నారు. "ఆహారాన్ని ఒక ఆయుధంలా ఉపయోగించే పరిస్థితి ఇప్పుడు నిజమైంది" అని తెలిపారు.

సోమవారం మధ్యాహ్నం నాటికి కొన్ని ఫ్రీజర్లు, ఫ్రిజ్‌లు ఇంకా పనిచేయడం లేదని ఇంటర్‌మార్షే, నెట్టో యాజమాన్య సంస్థ అయిన మౌస్‌కెటైర్స్ గ్రూప్, బీబీసీకి ఇచ్చిన ఒక ప్రకటనలో చెప్పింది.

"పరిస్థితిని వీలైనంత త్వరగా సాధారణ స్థితికి తీసుకురావడానికి నిపుణులతో కలిసి సిబ్బంది పూర్తి స్థాయిలో పనిచేస్తున్నారు" అని ఎక్స్‌లో చేసిన పోస్టులో కూపెరేటివ్ యూ సీఈవో డొమినిక్ షెల్షెర్ చెప్పారు.

ఈ సైబర్ దాడిపై పూర్తి స్థాయి దర్యాప్తు జరపాలని డొమినిక్ షెల్షెర్ కోరారు. ఫ్రాన్స్‌లోని ఆహార సరఫరాకు కీలకమైన వాటిని లక్ష్యంగా చేసుకోవడం ఏ మాత్రం ఆమోదయోగ్యం కాదని అన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)