Sreath choinneamhan mu Sgìre Cànain Shònraichte sna h-Eileanan an Iar

Soidhne-rathaid air a bheil sgrìobhe Fàilte do dh'Eilean na Hearadh, Welcome to the Isle of HarrisGetty Images

Bidh coinneamhan ann an sia sgìrean sna h-Eileanan an Iar feuch am bu chòir plana Gàidhlig sònraichte a bhith aca mar phàirt de dh'inbhe Sgìre Cànain Shònraichte a bhith aig na h-eileanan.

Tha Sgioba Gàidhlig Comhairle nan Eilean Siar air na coinneamhan a chur air dòigh agus iad airson 'àrainnean' a stèidheachadh a bheireadh smachd do choimhearsnachdan air mar a thèid taic-airgid a chleachdadh agus air obair Ghàidhlig san sgìre.

Tha seo mar phàirt de reachdas Achd nan Cànanan Albannach far a bheilear ag iarraidh air ùghdarrasan ionadail Sgìrean Cànain Sònraichte a stèidheachadh.

Tha Comhairle nan Eilean Siar a' moladh gum faigh na h-Eileanan an Iar air fad an inbhe seo, agus gum biodh àrainnean fa leth taobh a-staigh na Sgìre Cànain Sònraichte.

Thuirt aithisg a chaidh air beulaibh Comataidh Gàidhlig Comhairle nan Eilean Siar air a' mhìos seo chaidh "nach bu chòir do dh'àrainn a bhith nas lugha na meud ùard comhairle ach faodaidh e a bhith nas motha, a rèir miann na coimhearsnachd".

Chuala a' chomataidh cuideachd gun d' fhuair an t-ùghdarras ionadail £315,000 bho Riaghaltas na h-Alba airson an cuideachadh leis a' phròiseas oifigeil Sgìrean Cànain Sònraichte a stèidheachadh.

Chaidh innse gun rachadh an t-airgead sin a chur gu feum gus oifigear-leasachaidh fhastadh, is gus coimhearsnachdan a chuideachadh le planaichean a dhealbh airson cleachdadh na Gàidhlig a bhrosnachadh.

Tha planaichean mar-tha aig dà sgìre - Àrainn Uibhist is Àrainn Iar-Thuath Leòdhais - mar phàirt de phròiseact pìleat air a mhaoineachadh le Bòrd na Gàidhlig thairis air an dà bhliadhna a dh'fhalbh.

Thuirt leas chathraiche Comataidh Gàidhlig CnES, Ùisdean Robasdan, air a' mhìos a chaidh gu bheil iarrtas air tighinn mar-tha bho dhà sgìre eile airson plana a dhèanamh.

Tha a' chiad choinneamh mu Àrainn Bharraigh is Bhatarsaigh ga cumail ann an togalach CNES ann am Bàgh a' Chaisteil aig 7f Diardaoin, agus an fheadhainn eile air na làithean a leanas:

  • Àrainn na Hearadh - Dihaoine 2mh an Dàmhair aig 14:00 - Air loidhne a-mhàin

  • Àrainn Steòrnabhaigh - Diciadain 7mh an Dàmhair aig15:00 - Togalach CNES Steòrnabhagh – Rùm Comataidh 3

  • Àrainn an Rubha - Diardaoin 8mh an Dàmhair aig 11:00 - Air loidhne a-mhàin

  • Àrainn Ùig' is Bheàrnaraigh - Diardaoin 8mh an Dàmhair 14:00 - Air loidhne a-mhàin

Thuirt fear-labhairt na comhairle gu bheil coinneamh air a bhith air a' Bhac mar-tha agus gum bi tèile air a cumail ann an Sgìre nan Loch nan Loch fhathast.

Tha fiathachadh aig daoine sa choimhearsnachd agus riochdairean bho bhuidhnean aig a bheil ùidh a bhith an làthair no tighinn a-steach tro Teams.

Bu chòir do dhuine sam bith a bhios a' cleachdadh Teams fios a chur gu Sgioba Gàidhlig CNES.