Fhuair CnES £315,000 bho mhaoin Sgìrean Cànain Sònraichte

Soidhne-rathaid geal air a bheil sgrìobhte ann an litrichean dubha 'Fàilte do dh'Eilean Leòdhais, Welcome to the Isle of Lewis'. Chìthear beanntan agus muir fad' às agus mòinteachGetty Images

Dhearbh Comhairle nan Eilean Siar gun d' fhuair iad £315,000 bho Riaghaltas na h-Alba airson an cuideachadh leis a' phròiseas oifigeil Sgìrean Cànain Sònraichte (SCS) a stèidheachadh.

Tha Sgìrean Cànain Sònraichte (SCS) nam pàirt de dh'Achd nan Cànanan Albannach 2025.

Tha Comhairle nan Eilean Siar a' moladh gum faigh an sgìre gu lèir an t-inbhe seo leis gu bheil còrr is 20% den t-sluagh anns gach sgìre le sgilean Gàidhlig.

Ge-tà, tha moladh gum bi sgìre Comhairle na Gàidhealtachd air fad air a chomharrachadh mar SCS "maslach" a rèir luchd-iomairt cànain.

Ann an Earra-Ghàidheal is Bòd thathar a' moladh SCS a stèidheachadh far a bheil co-dhiù 20% den t-sluagh le sgilean sa Ghàidhlig no far a bheil FtMG air a thabhann.

Air a thuras a dh'Uibhist as t-samhradh, dh'ainmich am Prìomh Mhinistear, Iain Swinney, stòras £1.5m do chomhairlean airson an dleastanas reachdail ùr a th' orra a choileanadh.

Bha Comhairle nan Eilean Siar air iarrtas airson £350,000 a chur a-steach, agus chuala Comataidh na Gàidhlig Diluain gun d' fhuair iad £315,000.

Bhòt comhairlichean airson Oifigear Leasachaidh Gàidhlig fhastadh leis an airgead ùr, agus airson plana Gàidhlig a dhèanamh ann an seachd sgìrean - neo 'àrainnean'.

A rèir na h-aithisg a chaidh air beulaibh chomhairlichean, "cha bu chòir do dh'àrainn a bhith nas lugha na meud ùard Comhairle ach faodaidh àrainn a bhith nas motha".

Tha planaichean mar-tha aig dà sgìre - Àrainn Uibhist is Àrainn Iar-Thuath Leòdhais - mar phàirt de phròiseact pìleat air a mhaoineachadh le Bòrd na Gàidhlig thairis air an dà bhliadhna a dh'fhalbh.

A' bruidhinn air Aithris na Maidne Dimàirt, thuirt leas chathraiche Comataidh Gàidhlig CnES, Ùisdean Robasdan, gu bheil iarrtas air tighinn mar-tha bho dhà sgìre eile 'son plana a dhèanamh.

Thuirt e gum faodadh barrachd na seachd àrainnean a bhith ann ma bhios iarrtas ann.

Thuirt an Comh Robàsdan gu bheil e fhèin air a mhisneachadh leis an obair a tha a' dol air adhart ann an Uibhist le oifigear-leasachaidh is plana ionadail.

"Ma dh'obraicheas e cho math sin dhuinne, chanainn gun dèan e an aon rud anns na sgìrean eile".