Loch an Dùin a' tighinn beò gu bhiortail

Tha làrach bhiortail ùr a' toirt 5000 bliadhna de dh'eachdraidh timcheall air loch ann an Leòdhas beò.

Tha an goireas air an app arc-eòlais Ulaidhean Innse Gall, taobh a-muigh a' sealltainn mar a bhiodh daoine air a thighinn beò aig Loch an Dùin san Rubha bho Nua-linn na Cloiche gu na Meadhan Aoisean.

Tha i mar phàirt den iomairt Ulaidhean Leòdhais a tha a' tighinn às dèidh an leithid ann an Uibhist, Barraigh agus Na Hearadh.

Faodaidh luchd-cleachdaidh rùrach a dhèanamh ann an togalaichean a tha gan ath-chruthachadh gu bhiortail, a' sealltainn mar a dh'atharraich beatha dhaoine aig an làraich thairis air na mìltean bhliadhnaichean.

Chaidh a chur air bhog aig tachartas aig Ionad Stoodie san Rubha Dimàirt, mus do ghabh iad sin a bha an làthair cuairt gu Loch an Dùin.

Chaidh iarraidh air a' bhàrd Anna Frater bàrdachd a dhèanamh airson a' phròiseict, agus leugh i sin 'son a' chiad uair mar phàirt den tachartas.

Tha an t-app air a leasachadh le sgioba arc-eòlais UHI a Tuath, an Iar, agus Innse Gall ann an co-bhann le Urras an Rubha agus Shanndbhaig agus Comann Eachdraidh an Rubha.

Thuirt An Dr Rebecca Rennell bho UHI: "Bha sinn air ar dòigh nuair a thàinig Urras an Rubha agus Shanndbhaig thugainn is iad a' tabhainn taic airson na slighe arc-eòlais seo ann an Leòdhas.

"Tha a bhith a' conaltradh leis a' choimhearsnachd a-riamh air a bhith cudromach dhuinn ach 's e modh-obrach gu tur ùr a tha seo dhuinn, agus am pròiseact air a thòiseachadh agus air a stiùireadh le buidheann coimhearsnachd."

Tha am maoineachadh airson Ulaidhean Leòdhais a' tighinn bho Urras an Rubha agus Shanndbhaig, le taic bhon bhuidhinn Interface Standard Innovation Voucher Scheme.

"Tha e mar aon dha na prìomhachasan sa phlana leasachaidh againn gum bi cothrom agus tuigse nas fheàrr aig daoine air arc-eòlas an Rubha agus Shanndbhaig", thuirt manaidsear na buidhne, Dòmhnall Iain MacSuain.

"Tha sinn an dòchas gur e toiseach tòiseachaidh a th' ann an Loch an Dùin ann a bhith a' dèanamh sin.

"Tha sinn air ar dòigh gu bheilear mar-thà a' rannsachadh na h-ath ìre math dh'fhaoidte aig Eaglais na h-Aoidhe, agus a' coimhead air adhart ri mar a thèid Ulaidhean Leòdhais a leasachadh bho seo a-mach."