АКШнын Улуттук чалгындоо кызматынын директору Тулси Габбард кызматтан кетти

Жума күнү Тулси Габбард президент Дональд Трамптын тушундагы Улуттук чалгындоо кызматынын директору постунан кетип жатканын билдирип, өзүнүн кызматтан кетүү тууралуу жазуу түрүндөгү билдирүүсүн Х платформасына жарыялады.

Би-Би-Си таанышып чыккан билдирүүгө ылайык, Габбард күйөөсүнө «сөөк рагынын сейрек кездешүүчү формасы» менен күрөшүүгө жардам берүү үчүн кызматынан кетүүнү чечкен. Ал өз милдетин 30-юнга чейин аткара берет.

"Учурда мен бул күрөштө анын жанында болуу жана аны болгон күчүм менен колдоо үчүн мамлекеттик кызматтан убактылуу четтей турууга мажбурмун", - деп айтылат билдирүүдө.

Өз билдирүүсүндө Габбард Трампка көрсөткөн ишеними «жана акыркы бир жарым жыл ичинде Улуттук чалгындоо кызматынын директорунун башкармалыгын жетектөө мүмкүнчүлүгү үчүн» терең ыраазычылык билдирген.

Габбард "Улуттук чалгындоо башкармалыгында олуттуу ийгиликтерге жетишкенин - болуп көрбөгөндөй айкындуулукту камсыз кылып, чалгындоо коомчулугуна болгон ишенимди кайтарганын" жазган.

"Кийинки жумаларда жетекчиликте же иштин ыргагында сиз дагы, сиздин командаңыз дагы эч кандай көйгөйлөрдү сезбеши үчүн, мен бийликти өткөрүп берүүнүн жайбаракат жана кылдат ойлонулган процессин камсыз кылууга бардык күч-аракетимди жумшайм", - деп жазган ал.

АКШ президенти Дональд Трамп Габбард администрациядан кеткенден кийин, анын орун басары Аарон Лукас Улуттук чалгындоо кызматынын директорунун милдетин аткаруучу болорун билдирди.

"Тулси укмуштуудай жумуш жасады, биз аны сагынабыз, - деп жазды Трамп Truth Social тармагындагы билдирүүсүндө. - Анын кереметтүү күйөөсү Абрахамдан жакында эле сөөк рагынын сейрек кездешүүчү формасы табылды, жана ал, албетте, анын жанында болуп, сакайып кетишине жардам берүүнү каалайт".

Кээ бир сынчылар Габбардды улуттук чалгындоо директору болуп турган учурунда бул кызматты саясатташтырып жиберген жана Конгресстен чалгындоо маалыматтарын жашырган деп айыпташкан.

Reuters маалымат агенттиги кырдаал менен тааныш булагына таянып, Габбард Ак үйдүн талабы менен кетүүгө мажбур болгонун билдирди.

Трамп буга чейин Иранга болгон мамиледе Габбард менен пикир келишпестиктери бар экенин кыйытып, март айында Тегерандын өзөктүк амбицияларын ооздуктоо маселесинде ал өзүнө караганда "жумшагыраак" болгонун айткан.

Габбард, апрель айында Лори Чавес-ДеРемер эмгек министри кызматынан кеткенин да эске алганда, Трамптын администрациясынан кеткен төртүнчү мүчө болуп калды. Ички коопсуздук министри Кристи Ноем жана башкы прокурор Пэм Бонди администрациядан ушул жылдын башында кетишкен.

Габбард 2024-жылдагы президенттик өнөктүгү учурунда Трамптын берилген тарапкери болгон жана ал 2025-жылы Ак үйгө кайтып келгенден бир нече жумадан кийин эле АКШнын чалгындоо чөйрөсүндөгү эң таасирдүү инсандардын бирине айланган. Бирок, АКШ Иранда аскерий операцияларды жүргүзүп, Кубага кысым көрсөтүп жана Венесуэланын президентин бийликтен четтетип жаткан учурда, ал коомчулукка дээрлик көрүнгөн жок.

Саясий карьерасында ал өзүн чет элдик согуштарга кийлигишүүгө каршы катары көрсөтүп келген, бул Трамп Иран менен согушка кирүү чечимин кабыл алгандан кийин чыңалууга алып келген. АКШ менен Израилдин Иранга жасаган соккуларынан кийин ал бул чечимди колдоодон баш тарткан жана Конгресстеги угуулар учурунда администрация жаңжалдын кесепеттерин билип-билбегени тууралуу суроолорго жооп берүүдөн кылдаттык менен качкан.

Өткөн жылы Трамп Габбарддын Конгресс алдында Иран өзөктүк курал түзүүгө умтулбайт деген билдирүүсүнө көңүл бурбай койгон өңдүү.

"Анын эмне дегени мага баары бир, - деген ал анда журналисттерге. - Менимче, алар өзөктүк курал түзүүгө абдан жакын калышкан". Ал Ирандын өзөктүк дараметин АКШнын Иран менен согушуна себеп катары бир нече жолу атаган.

Габбарддын кетиши анын башкы жардамчысы, Терроризмге каршы күрөшүү боюнча улуттук борбордун мурдагы директору Жо Кент Ирандагы согуштан улам президентти "багытты өзгөртүүгө" чакырып, администрациядан кеткенден эки ай өткөндөн кийин болду.

Кент кызматтан кеткенден кийин Габбард Трамптын Иран боюнча чечимин ачык колдоп, башкы кол башчы катары дал президент эмнени түздөн-түз коркунуч деп эсептөөгө болорун жана эмнени эсептөөгө болбой турганын аныктайт деп билдирген.

Габбард - аскерий кызматтын ардагери, Ирактагы медициналык бөлүктө кызмат өтөгөн.

Ал биринчи жолу 2002-жылы 21 жашында Гавайинин Мыйзам чыгаруу жыйынына шайланып, штаттын тарыхындагы эң жаш депутат болгон жана анын Улуттук гвардиясынын бөлүгү Иракка жөнөтүлгөндө бир мөөнөттөн кийин кызматынан кеткен.

Андан соң Габбард 2013–2021-жылдары Конгрессте Демократиялык партиядан Гавайинин атынан өкүлчүлүк кылып, Өкүлдөр палатасына шайланган индуизмдин биринчи өкүлү болуп калган.

2020-жылы ал башка өлкөлөрдүн тышкы саясатына кийлигишпөө саясатынын тарапкери катары өзүн көрсөтүп, президенттикке ийгиликсиз талапкерлигин койгон.

2022-жылы ал Демократиялык партиядан кетип, алгач көз карандысыз талапкер катары катталган.

Fox News каналында баяндамачы катары ал гендер жана сөз эркиндиги сыяктуу темаларда жигердүү пикирин билдирип, Республикалык партияга кире электе эле Дональд Трампты колдогон тарапкерине айланган.