Leasachadh an NHS aig cridhe manifesto Pàrtaidh Làbarach na h-Alba

Ceannard Làbarach na h-Alba Anas SarwarPA Media

Dh'fhoillsich Anas Sarwar manifesto a' phàrtaidh aige aig tachartas ann an Dùn Èideann

Thuirt ceannard nan Làbarach ann an Alba Anas Sarwar gur e piseach a thoirt air seirbheisan slàinte am prìomhachas air thoiseach air taghah Holyrood sa Chèitean.

Tha manifesto a' phàrtaidh a' gealltainn cùmhnant ùr le dotairean-teaghlaich airson dèiligeadh ris an iarrtas mhòr airson choinneamhan aig 08:00m, amannan-feitheimh a ghearradh agus lùghdachadh a thoirt air na tha de bhiurocrasaidh san NHS.

Gheall Mgr Sarwar cuideachd faochadh-cìse do phàrantan, gun tèid tuill sna rathaidhean a chàradh agus gun tog iad casg Riaghaltas na h-Alba air cumhachd niùclasach ùr.

A' bruidhinn aig foillseachadh a' mhanifesto ann an Dùn Èideann thuirt e gun do chaill an SNP "an slighe".

Thuirt e: "Tha 20 bliadhna air a bhith aca, tha mi ag iarraidh oirbh còig a thoirt dhomh."

Prìomh gheallaidhean manifsto nan Làbarach Albannach

  • Amannan-feitheimh an NHS a ghearradh

  • Coinneamh le dotair-teaghlaich taobh a-staigh 48 uairean de thìde

  • Teicneòlas a chleachdadh airson piseach a thoirt air leigheas agus dearbhadh tràth agus airson cùisean a dhèanamh nas fhasa do dh'euslaintich

  • Seirbheis èiginn ùr airson dèiligeadh ri daoine le trioblaidean slàinte-inntinn

  • Cùram-chloinne gun chìs suas gu £3,000 airson gach pàiste agus maoineachadh airson cola-deug de chlubaichean samhraidh

  • Gun a' chìs-chosnaidh a chur suas thairis air an ath chòig bliadhna

  • Maoineachadh "cothromach" do choimhearsnachdan ionadail

  • Lùghdachadh a thoirt air biurocrasaidh riaghaltais

  • Clubaichean bracaist sa h-uile bun-sgoil, casg air fònaichean-làimhe sna seòmraichean-teagaisg agus 1,500 a bharrachd luchd-taice sna sgoiltean

  • 9,000 preantasan ùra

  • 125,000 dachaighean a thogail

  • Cìs-ghnothachais ionadail a' cur an àite siostam reataichean gnothachais

  • An casg air cumhachd niùclasach a thogail

  • Ceangal Rèile Port-adhair Ghlaschu a thogail

  • Oifigearan-poilis coimhearsnachd anns gach nàbachd

  • £350m airson suas ri 5,000,000 toll sna rathaidean a chàradh

  • An cothrom a thoirt do luchd-bhòtaidh buill-phàrlamaid nach cùm ri inbhean poblach ath-ghairm

Tuilleadh air an sgeulachd seo