CalMac a' gluasad an Glen Sannox gu seirbheis Steòrnabhaigh

An Loch Seaforth ceangailte ann an Steòrnabhagh

Tha innleadairean ag obair air an Loch Seaforth ann an Steòrnabhagh

Thuirt Caledonian Mac a' Bhriuthainn gun gluais iad an Glen Sannox bho sheirbheis Eilean Arainn gu tuath airson an t-seirbheis eadar Steòrnabhagh agus Ulapul a thoirt seachad an dèidh mar a bhris an soitheach àbhaisteach air an t-slighe.

Tha innleadairean ag obair air an Loch Seaforth ann an Steòrnabhagh an dèidh trioblaidean le ramp a' chinn-toisich aice nuair a ràinig i Leòdhas Là na Sàbaid.

Bha luchd-siubhail còrr is uair de thìde a' feitheamh airson faighinn far an t-soithich.

Dhearbh CalMac nach bi an còrr sheòlaidhan ann Diluain, seirbheisean bathair nam measg.

Tha dùil ris an fhiosrachadh as ùire mu staid an Loch Seaforth aig 11:00m madainn Dimàirt.

Seo an dùbhlan as ùire do Chaledonian Mac a' Bhriuthainn a dh'innis an t-seachdain a chaidh gun robh faisg air an treas cuid den chabhlach aca a-mach à seirbheis.

Aig aon àm, bha 10 bàtaichean an dàrna cuid briste neo a' faighinn na seirbheis bliadhnail aca.

B' fheudar dhaibh soithichean a ghluasad air feadh an lìonra airson 's gum faigheadh gach coimhearsnachd, thuirt iad, seirbheis air choireigin.

Dh'fhoillsich iad clàran-ama eadar-amail a mhaireas chun an 17mh là den Ghiblean.

Thuirt Àrd-oifigar ChalMac Donnchadh Mackison: "Ged a tha grunn sheirbheisean a' dol mar as còir, tha sinn duilich airson an troimh-chèile a tha seo ag adhbharachadh do dh'eileanan agus coimhearsnachdan air feadh an lìonra agus gu h-àraid an fheadhainn far an deach seirbheisean a lùghdachadh."

Dè na h-aiseagan ChalMac a tha a-mach à seirbheis?

  • An MV Hebrides - seirbheis bhliadhnail - dùil rithe air ais Disthathairne 18mh den Ghiblean

  • An MV Loch Seaforth - ramp a' chinn toisich briste

  • An MV Isle of Arran - couplings ùra a dhìth air a' bhow thruster

  • An MV Lord of the Isles - prìomh einnsean briste

  • An MV Lord of the Isles - obair stàilinn a bharrachd a dhìth an dèidh a càraidh bliadhnail - dùil rithe air ais ron 31mh den Chèitean

  • An MV Loch Frisha - deuchainnean mara gan dèanamh an dèidh na seirbheis bliadhnail aice - dùil rithe air ais ann an seirbheis air an 15mh den Ghiblean

  • An MV Loch Bhrusda - pàirt a dhìth airson crìoch a chur air obair-chàraidh - dùil rithe air ais air an 15mh den Ghiblean

  • An Loch Tarbert - ramp air a mhilleadh

Tuilleadh air an sgeulachd seo