Vital Kamerhe yamaganye kuba Kabila ayoboye umutwe mushya w'inyeshyamba

Inshuti ikomeye ya Perezida Félix Tshisekedi wa Repubulika ya Demokarasi ya Congo (DRC) yamaganye icyemezo cy'uwahoze ari Perezida w'icyo gihugu Joseph Kabila cyo kuyobora ihuriro rishya ry'inyeshyamba, avuga ko icyo cyemezo kivuguruza ubusabe bwe bwuko habaho amahoro.

Mu butumwa yatangaje mu gitondo cyo ku wa gatatu ku rubuga nkoranyambaga rwa X, Vital Kamerhe wahoze ari umukuru w'inteko ishingamategeko ya DRC akaba ari n'inshuti ikomeye ya Tshisekedi, yavuze ko umuntu adashobora guharanira amahoro mu gihe arimo no kwihuza n'umutwe wa politike na gisirikare. Yanavuze ko Kabila agomba kubazwa ibyo yakoze mu gihe cy'imyaka 18 yamaze ku butegetsi.

Kamerhe yasubiyemo ko ashyigikiye Perezida Tshisekedi ndetse asaba ko habaho ubumwe bw'igihugu, ibiganiro no kwanga kuba inyeshyamba nk'inzira iganisha ku butegetsi. Yavuze ko amahoro, ubumwe bw'igihugu n'ubusugire bw'igihugu bikwiye gushyirwa imbere y'intego za politike.

Avuze ayo magambo nyuma y'iminsi ibiri Kabila atangajwe ko ari umukuru w'umutwe wa 'Front pour la Refondation de la Nation' (FRN), ihuriro ryamukirikiwe ku wa mbere mu mujyi wa Goma mu burasirazuba bwa DRC.

Uwo mutwe uvuga ko intego yawo ari ugukuraho ubutegetsi mu buryo bwose bushoboka, harimo n'ingufu, iryo tangizwa ryawo rikaba ryarabaye inshuro ya mbere uwo wahoze ari Perezida atangaje ku mugaragaro ako afatanyije n'umutwe witwaje intwaro ukorana n'inyeshyamba za M23.

Kuvuga bwa mbere ku ishingwa ry'uwo mutwe bikozwe n'urwego rwa leta byabaye ku wa kabiri, ubwo Perezida wa sena Jean-Michel Sama Lukonde yashinjaga Kabila kuyobora icyo yasobanuye nk'umutwe wa politike na gisirikare, anavuga ko uko bigaragara ibyo byemeza ibyo Perezida Tshisekedi yari amaze igihe kirekire avuga ko uwo yasimbuye ari we wihishe inyuma y'izo nyeshyamba.

Sama Lukonde yavuze ko Perezida Tshisekedi arimo gukora ngo agarure amahoro arambye, mu gihe Kabila we yagaragaye, mu magambo ya Sama Lukonde, nk'umwanzi w'inyungu z'Abanye-Congo.

Hagati aho, akanama k'igihugu kagenzura iyubahirizwa ry'amasezerano n'ibijyanye n'amatora, kitwa 'Conseil National de Suivi de l'Accord et du Processus Électoral (CNSA), kasabye ko habaho ibiganiro no kwifata.

Mu itangazo ako kanama kasohoye ku wa kabiri, kavuze ko igihugu gifite amahitamo hagati y'amahoro n'intambara, no hagati y'ubumwe bw'igihugu no gucikamo ibice.

Ako kanama kashishikarije impande zose kwanga urugomo, kujya mu biganiro bidaheza byo ku rwego rw'igihugu no gushyira inyungu z'igihugu imbere y'intego za politike, mu rwego rwo kubungabunga umutekano, ubusugire bw'igihugu n'ubumwe.

Kugeza ubu, yaba leta ya DRC, yaba ibiro bya perezida, ntibarasohora itangazo ryo gusubiza ku itangazo ryo ku wa mbere ko Kabila ayoboye uwo mutwe wa FRN. Kabila ntarasubiza ku mugaragaro kuri uku kunengwa na Kamerhe na Sama Lukonde.