Navi Pillay wayoboye urukiko mpuzamahanga rw'Arusha yatsindiye igihembo cy'amahoro cyitiriwe Nobel
Ahavuye isanamu, AFP via Getty Images
Navi Pillay, wahoze ari komiseri w'ishami rya ONU ryita ku burenganzira bwa muntu n'umukuru w'urukiko mpuzamahanga mpanabyaha rw'Arusha, yatsindiye igihembo cy'amahoro cyitiriwe Nobel.
Akanama ka Nobel ko muri Norvège kavuze ko Pillay yabonye icyo gihembo ku bw'"ibikorwa byo guharanira amahoro n'amategeko mpuzamahanga" yakoze.
Ubwo yatangazaga uwatsindiye icyo gihembo, umukuru w'ako kanama Jørgen Watne Frydnes yavuze ko atashoboye kuvugana na Pillay. Aseka, yongeyeho ati: "Ubutumwa bwanjye kuri we bwaba ari, 'Nubona nimero [ya telefone] yo muri Norvège iguhamagaye, nyabuneka uyitabe'."
Navi Pillay, w'imyaka 85, ukomoka i Durban muri Afurika y'Epfo, yabaye umucamanza mu rukiko mpuzamahanga mpanabyaha rwari rwarashyiriweho u Rwanda (TPIR/ICTR) rwari ruri i Arusha muri Tanzania, mu gihe cy'imyaka umunani, kuva mu 1995 kugeza mu 2003. Imyaka ine ya nyuma (kuva mu 1999 kugeza mu 2003) yayimaze ari Perezida w'urwo rukiko.
Yatuye iki gihembo 'abarokotse bose icyaha mpuzamahanga'
Mu kiganiro n'abanyamakuru, Pillay yavuze ko agitunguwe ariko ko atewe icyubahiro cyane no gutsindira icyo gihembo cy'amahoro cyitiriwe Nobel kandi ko abishimira.
Yavuze ko igihembo cye agituye "abarokotse bose icyaha mpuzamahanga" ndetse n'"abakora n'abarinda" ubutabera mpuzamahanga.
Yavuze ko amagerageza yabayeho yo guca intege amategeko y'imbere mu gihugu "ateje ibyago byo kudusubiza mu isi aho imbaraga, aho kuba amategeko, ari zo zigena ufite akababaro gafite agaciro".
Yavuze ko mu mirimo yose yakoze yahagarariye isezerano ryo "guteza imbere no kurinda icyubahiro kingana cya buri kiremwamuntu, n'uburenganzira bw'abagore n'abana by'umwihariko".
Navi Pillay yamenye ko yatsindiye igihembo cy'amahoro cyitiriwe Nobel ubwo yari ari i Nuremberg mu Budage.
Ubwo yagezaga ijambo ritunguranye ku bo bakorana hamwe n'inshuti, mu birometero uvuye i Oslo aho icyo gihembo cyatangarijwe, yagize ati: "Bigomba kuba ari urwenya."
Yongeyeho ati: "Ariko, nk'umwunganizi mu mategeko nkaba n'umucamanza, ndacyashaka kugenzura aya makuru."
Mu bihe bya vuba aha, Navi Pillay yabaye muri komisiyo mpuzamahanga yigenga ikora iperereza ku butaka bwigaruriwe bw'Abanye-Palestine, komisiyo yashyizweho mu 2021 n'akanama k'uburenganzira bwa muntu ka ONU.
Uyu ni umwaka wa 126 ushize hatangwa iki gihembo cy'amahoro cyitiriwe Nobel. Mu bandi bagitsindiye mbere, harimo umubikira Mama Tereza, Malala Yousafzai na Barack Obama.
Mu mwaka ushize, umukuru w'abatavuga rumwe n'ubutegetsi muri Venezuela María Corina Machado ni we watsindiye icyo gihembo, amaherezo umudari we awuha Perezida w'Amerika Donald Trump muri Mutarama (1) uyu mwaka.
