Ifan Davies: Y cerddor a'r cyflwynydd a'i gariad tuag at radio

Pan oedd Ifan Davies yn tyfu fyny, roedd o'n ystyried y darlledwr Huw Stephens yn dipyn o arwr.

Flynyddoedd yn ddiweddarach, prin oedd prif leisydd y band Sŵnami yn dychmygu y byddai'n camu mewn i esgidiau Huw Stephens ar nos Iau a chael slot gyflwyno barhaol ar donfeddi Radio Cymru.

Mae'r orsaf wedi cyhoeddi mân newidiadau i'r amserlen wrth i Ifan Davies baratoi i gyflwyno ei raglen gyntaf ar nos Iau yn lle Huw Stephens, fydd nawr yn symud i ddarlledu yn gynnar ar foreau Sadwrn yn dilyn ymddeoliad Richard Rees.

"Dwi'n gwrando ar raglenni Huw ers y dechre, pan oedd o ar Radio 1, 6Music a'i raglenni cerddoriaeth ar nos Iau ar Radio Cymru, fo oedd fy arwr radio cyntaf," meddai Ifan.

Er nad yw llais Ifan yn un dieithr i wrandawyr Radio Cymru, dyma fydd ei raglen gyntaf barhaol, wedi iddo eistedd fewn yn lle sawl cyflwynydd gwahanol dros y blynyddoedd.

"'Nes i ddechre cyflwyno pan o'n i yn y coleg ac ro'n i'n ofnadwy o ddiolchgar i'r diweddar Magi Dodd am ofyn i mi fod yn un o gyflwynwyr y Cwis Pop ar Radio Cymru.

"Roedd hwnna'n andros o hwyl ac yn brofiad da iawn i mi ddechre," cofiai.

Ers hynny mae Ifan wedi cyflwyno rhaglenni BBC Radio 1, cyd-gyflwyno rhaglen ar Radio Cymru gyda Siân Eleri, ac ers dros flwyddyn, mae wedi bod yn cyflwyno ar brynhawniau Gwener ar Radio Cymru ar ôl i Tudur Owen gamu i ffwrdd o'r slot yn y prynhawn.

Er mai cerddoriaeth yw prif ddiléit ac arbenigedd Ifan, mae'n cyfaddef iddo deimlo ychydig yn bryderus pan gafodd gynnig i gamu fewn i esgidiau Tudur.

"Ro'n i bach yn bryderus; roedd gen i brofiad o gyflwyno rhaglenni cerddoriaeth, ond mae cyflwyno yn y prynhawniau yn wahanol, mae'r tôn yn wahanol a 'nes i erioed ddychmygu fy hun fel cyflwynydd ar gyfer slot y prynhawn.

"Ond mae'n rhaid i mi ddeud nes i fwynhau yn fawr a dwi'n gobeithio dod ag elfennau o'r rhaglen brynhawn Gwener i mewn i'r rhaglen newydd ar nos Iau.

"'Wrach y byddwch chi'n clywed Jac Northfield a Mollie Palmer yn achlysurol ar nos Iau hefyd," meddai.

Yn ei raglen newydd, gobaith Ifan yw plethu ychydig o'r hyn yr oedd yn ei wneud yn y prynhawniau a chwarae cerddoriaeth arbenigol fydd yn apelio at bawb.

Mae eleni wedi bod yn gyfnod prysur iddo. Yn ogystal â chyflwyno ar y radio, mae hefyd wedi bod yn brysur yn ffilmio cyfres newydd i S4C.

"Tair Cân fydd enw'r gyfres newydd ble fydd bandiau Cymru yn cael her neu thema benodol ar gyfer pob rhaglen. Dwi wedi cael lot o hwyl yn g'neud y gyfres ac mi fydd hi allan cyn bo hir," meddai.

O ran ei raglen radio newydd, mae Ifan yn falch o gael bod yn rhan o gyfrwng y mae wir yn ei werthfawrogi.

"Dwi wrth fy modd gyda radio; dwi'n meddwl fod y radio'r un mor berthnasol heddiw nag erioed.

"Dwi'n edrych ymlaen at ddod ag elfen weledol i'r rhaglen hefyd.

"Mi fydd gynnon ni eitem o'r enw Sesiynau Organ, fydd yn rhoi cyfle i artistiaid a bandiau heddiw greu cerddoriaeth ar organau mewn llefydd traddodiadol a sydd o bwys diwylliannol yn eu hardaloedd nhw.

"Dwi ddim eisiau i bethau sydd wedi ein siapio ni fel Cymry fynd yn angof, felly dwi'n meddwl y bydd o'n eithaf cŵl clywed caneuon a sesiynau yn cael eu perfformio ar hen organau.

"Mae gynnon ni lwyth o syniadau cyffrous a dwi wirioneddol edrych ymlaen at ddechrau arni."

Bydd rhaglen Ifan Davies ymlaen pob nos Iau ar BBC Radio Cymru rhwng 1900-2100.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.