Court remand Miyetti Allah oga for prison as EFCC arraign am ova alleged $2.3 million fraud

Di Economic and Financial Crimes Commission (EFCC) don arraign di national president of Miyetti Allah Kautal Hore Association, Bello Bodejo, for di Federal High Court Abuja, sake of alleged wuruwuru wey pass 2.3 million dollars.

Miyetti Allah Kautal Hore na faction of di Miyetti Allah Cattle Breeders Association of Nigeria (Macban), and both groups na di umbrella bodi of cattle herders for Nigeria.

Badejo dey face 12 counts of corruption for allegedly receiving big sum of money for foreign currency in cash, wey dey against di law. E plead not guilty to all di counts.

According to di money laundry act for Nigeria, any business transaction from five million naira and above, suppose be through bank transfer, no be cash payment. Both di pesin wey pay and di pesin wey receive di payment commit offence.

One of di charges tok say oga Badejo on 11 January 2022, bin "knowingly and willingly" accept cash payment of $100,000 in cash from one Sa'idu Abubakar, wey be di former Accountant-General of Bauchi State.

Di EFCC tok say di Sa'idu Abubakar also currently dey for di custody of di Nigeria police.

For anoda charge, di anti-corruption commission claim say Badejo on 7 February 2024, bin receive anoda $980,000, and anoda $500,000 for March 2024 from di same Sa'idu Abubakar, all in cash.

Badejo plead not guilty to all di 12-count charges and im lawyer, Ahmed Raji, beg di court to grant am bail.

However, di EFCC lawyer, Wahab Shittu, oppose di bail application as e tok say di defendant na public risk, so e go good make di court remand am for di Kuje correctional facility.

Justice Inyang Ekwo wey be di presiding judge for di mata, give order make Badejo remain for prison custody until 20 July wen e go rule on di bail application.

Remember say di Department of State Services (DSS) bin don arrest and detain Mr Badejo on 9 December 2024, but as dem no formally charge am to court, on 30 December, Justice Mohammed Zubairu give order make dem release am.

Di judge however tok say di release order no mean say di court don discharge and acquit di defendant, rather na to enforce im constitutional right wey tok say security personnel no get power to detain pesin indefinitely witout charging di pesin to court.

Who be Bello Badejo

Alhaji Bello Badejo, from Nasarawa State, north-central geopolitical zone of Nigeria, na di powerful leader of di controversial Miyetti Allah Kautal Hore, wey many dey see as di para-military wing of di umbrella bodi of cattle herders for Nigeria.

E get plenty prestigious titles for several communities for northern Nigeria, including 'Lamido Fulbe' and 'Majidadin Mambilla'.

Several times, security agencies like di Nigeria Army and DSS bin don arrest Badejo on allegation say im faction of Miyetti Allah dey commit violent crimes for di kontri, but dem later release am witout charge.

For January 2024, Badejo form wetin e call 'Nomadic Vigilante Group', wey according to am na volunteer group to improve di security of dia members especially for areas wia dem dey face plenti attacks.

E tell BBC News Hausa dat time say di vigilant group get more dan 2000 members but dem dey hope to raise dia number to 4,000.