سعودي مېرمنو ته د یوازې سفر اجازه ورکړه

د سعودي عربستان مېرمنو د لومړي ځل لپاره اجازه تر لاسه کړه چې د نارینوو له ملاتړ پرته پاسپورټ ترلاسه کړي او له دې هېواد بهر سفر وکړي.

په دې اساس د حکومت په نوې حکم کې ویل شوي چې له دې وروسته هغه مېرمنې چې ۲۱ کاله عمر ولري خپله پاسپورټ ترلاسولی او له سعودي بهر تللی شي. او دې برخه کې مېرمن دسره نارینه اجازې یا ملتیا ته اړتیا نه لري.

په دغه حکم کې چې د حکومت لخوا د اګسټ په لومړۍ صادر شو دا هم پکې راغلي چې ښځې د واده، طلاق او د ماشوم د زېږېدو نېټه ثبتولی شي.

په دې حکم کې همدا راز د دندې حق هم په پام کې نیول شوی، دغه نوي قانون کې د عربستان ټولو وګړو ته د دندې حق ورکړل شوی او کار ور کوونکي باید د جنسیت، عمر یا جسمي محدودیت له امله له کار غوښتونکو سره توپیریز چلند ونه کړي.

له دې حکم وړاندې په سعودي عربستان کې مېرمنو د پاسپورټ او بهرني سفر لپاره اړې وې له خپل محرم کس اجازه واخلي، یا هغه له ځان سره بوځي چې په دې ډله کې پلار،ورور، خاوند او یا به هم هغه کس و چې د دوی د کورنۍ اصلي غړیتوب یې لره.

دا حکم په سعودي عربستان کې د ټولنیزو اصلاحاتو د دوام هغه وعده وه چې د دې هېواد د ځوان ولیعهد محمد بن سلمان لخوا کله چې په څوکې کیناست شوې وه، هغه دا هم ویلي و چې هېواد د یوې ازاده ټولنې پر لور سموي.

محمد بن سلمان ژمنه کړې وه چې هېواد به یې تر ۲۰۳۰ کال پورې له اقتصادي پلوه ښه پر مخ بوځي او په دې برخه کې یې د مېرمنو ګډون هم په پام کې نیولی دی.