ډېره اسماعیل خان کې پر پوسته موټربم برید؛ ۱۲ کسان وژل شوي، ۳۵ ټپیان دي
د عکس سرچینه، Rescue 1122
د خیبرپښتونخوا چارواکي وايي ډېره اسماعیل خان کې پر یوه امنیتي پوسته موټر بم برید کې لږترلږه ۱۲ کسان وژل شوي او ۳۵ نور ټپیان دي.
پاکستاني رسنیو د ځايي امنیتي چارواکو په حواله ویلي، چې دغه برید درازنده او مغل کوټ سیمو ته نږدې د 'امن مېلې' په نوم د امنیتي ځواکونو او ګمرک ادارې پر ګډه پلټونکې پوسته شوی دی.
د ډېره اسماعیل خان د پولیسو مشر (ډيپياو) ضیاءالدین احمد تایید کړې چې یوه ځانمرګي برید له چاودېدونکو توکو ډک موټر له دې پوستې سره جنګولی دی.
دغه پوسته د ډېره اسماعیل خان او کوټې ترمنځ پر غځېدلي سړک پرته ده.
ډان پاکستانۍ ورځپاڼې د ډېره اسماعیل خان د پولیسو د سیمهییز افسر (ارپياو) غلام مبشر مکین له خولې لیکلي، چې وژل شوي د کمرګ د یوه چارواکي په ګډون ټول ملکي کسان دي.
دې ورځپاڼې زیاته کړې چې په وژل شویو کې ۹ سړي، ۲ ښځې او یو ماشوم دی.
د یادونې ده چې ورمخکې قطرۍ الجزیزه شبکې د پولیسو په حواله لیکلي وو، چې په دې چادونه کې ډېره مرګژوبله سرتېرو ته اوښتې ده.
رویټرز خبري اژانس ویلي، د دغه برید مسوولیت د پاکستان طالبانو تحریک (ټيټيپي) منلی.
د ۱۱۲۲ په نوم ژغورنډلې ویلي، مرستندویانو یې شاوخوا ۳۰ ټپيان د پېښې ځای کې تر لومړنیو روغتیايي مرستو وروسته بېلابېلو روغتونو ته لېږدول شوي دي.
په دوی کې د ځینو روغتیايي وضعیت نازک ښودل شوی دی.
د ډیره اسماعیل خان د بېړني وضعیت مسوول عارف خان ویلي، دوی هم سیمې ته امبولانسونه او اضافي مرستندویان استولي دي.
غبرګونونه
د خیبرپښتونخوا والي فیصل د دغه ایالت له جګپوړو چارواکو د دې پېښې په اړه رپوټ غوښتی او سپارښتنه یې کړې، چې ټپیانو ته باید د درملنې ټولې اړېنې اسانتیاوې برابرې شي.
د پاکستان د کورنیو چارو وفاقي وزیر محسن نقوي د اېکس خواله رسنۍ یوه پیغام کې دا برید غندلی دی.
هغه زیاته کړې چې خیبر پښتونخوا د ترهګرۍ ضد جګړې پر "لومړۍ کرښه" پرته ده، او دا چې دغه ډول کړنې د دوی د "ترهګرۍ ضد کلک هوډ نه شي کمزوری کولی."
د پاکستان ولسمشر اصف علي زرداري د دغه برید د قربانیانو کورنیو سره خواخوږي ښودلې او ویلي یې دي، چې د پاکستاني طالبانو تحریک او بېلتونپاله بلوڅانو اقدامات باید لا کارنده او اغېزناک شي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
له ډېره اسماعیل خانه هم، چې د خیبرپښتنوا په سویل کې له پنجاب او بلوچستان ایالتونو سره پر پولو پرته ده، د دغه ایالت د ځینو نورو ولسوالیو په څېر د امنیتي پېښو رپوټونه ډېر ترلاسه کېږي.
روانه میاشت پولیسو ویلي وو چې دغلته یې د پاکستاني طالبانو تحریک لخوا پر یوې پوستې د برید هڅه ناکامه کړې ده.
د پاکستان د شخړو او امنیتي مطالعاتو اېنسټیټوټ لخوا د راټولو شویو میاشتنو ارقامو له مخې په تېره اګست میاشت کې له پخوانیو قبایلي سیمو پرته د خیبر پښتونخوا په نورو ولسوالیو کې ۵۴ بریدونه شوي دي، چې د ورتېرې جولای میاشتې پرتله شاوخوا ۵۰ سلنه لوړوالی شي.
په جولای کې ټولټال ۳۶ بریدونه ثبت شوي وو.
د یادونې ده چې د سپتمبر ۱۸مه د خیبر پښتونخوا کوهاټ کې پر زاړه پولیس لاین برید کې ۳۱ کسان ووژل او تر ۱۰۰ ډېر نور ټپیان شول.
د پاکستان هوايي ځواکونو تر دغه برید وروسته لومړی د افغانستان په کونړ، پکتیکا او ورپسې په خوست، پکتیا او کندهار کې هوايي بریدونه وکړل.
د عکس سرچینه، AFP via Getty Images
د پاکستان حکومت او امنیتي ادارې ادعا کوي چې دغه هېواد کې ډېر بریدونه په افغانستان کې پلانېږي او دا چې ګوندې د پاکستاني طالبانو تحریک وسلهوال او بېلتونپاله بلوڅان افغان خاوره د دوی پر ضد کاروي.
خو په افغانستان کې د طالبانو حکومت بیا دغه تور تل رد کړی دی. د طالبانو حکومت چارواکي وايي د پاکستان حکومت دا "بېبنسټه" تورونه د دې لپاره لګوي، چې پر خپلو ناکامیو پرده واچوي.
