Cymru drwodd i rownd derfynol gemau ail gyfle Cwpan y Byd

Mae Cymru drwodd i rownd derfynol gemau ail gyfle Cwpan y Byd 2027 ar ôl trechu Albania o 3-0 yn Llanelli (4-0 ar gyfanswm goliau).

Roedd gan Gymru fantais yn mynd mewn i'r gêm nos Fawrth wedi buddugoliaeth o 1-0 yn y cymal cyntaf draw yn Shkoder.

Adeiladu ar y fantais honno wnaeth tîm Rhian Wilkinson gyda pherfformiad ymosodol, creadigol a hyderus ym Mharc y Scarlets.

Mayzee Davies sgoriodd y gyntaf i'r tîm cartref cyn i Elise Hughes a Hannah Cain sicrhau'r fuddugoliaeth yn yr ail hanner.

Fe fydd Cymru yn wynebu Norwy yn rownd derfynol y gemau ail gyfle ym mis Rhagfyr - ond mae hi dal yn bosib y bydd rhaid iddyn nhw hefyd chwarae gêm ail gyfle rhyng-gyfandirol i sicrhau eu lle ym Mrasil.

Fe ddechreuodd Cymru ar y droed flaen gan lwyr reoli'r meddiant a chreu hanner cyfleoedd i Mared Griffiths ac Elise Hughes.

Ond er y pwysau cynnar ar amddiffyn Albania ni chafodd golwr yr ymwelwyr, Soffia Kelly, ei gorfodi i wneud unrhyw arbedion o nod yn yr hanner awr gyntaf.

Ond wedi 33 o funudau fe ddaeth y gôl gyntaf hollbwysig diolch i beniad Mayzee Davies.

Methodd Albania â chlirio croesiad Lily Woodham ar ddau achlysur cyn i'r bêl ddisgyn i Davies ger y postyn pellaf.

Roedd Griffiths yn fygythiad cyson lawr yr asgell chwith ac o giciau rhydd, ond ni lwyddodd Cymru i ymestyn eu mantais cyn yr egwyl.

Nid oedd rhaid aros yn hir wedi dechrau'r ail hanner tan fod Cymru wedi dyblu'r fantais ar y noson.

Yn dilyn gwaith da lawr yr asgell chwith gan Mared Griffiths unwaith eto, llwyddodd Elise Hughes i daro'r bêl heibio'r golwr ger y postyn agosaf.

Gyda'r hyder yn llifo, bron i Sophie Ingle sgorio'r drydedd dau funud yn ddiweddarach ond roedd ei hergyd yn wastraffus o safle addawol.

Cafodd Mared Griffiths gyfle euraidd i sgorio wedi bron i awr o'r gêm hefyd ar ôl i'r bêl ddisgyn wrth ei thraed yng nghanol y cwrt cosbi, ond gyda'r un amddiffynnwr yn agos iddi fe darodd y bêl heibio'r postyn pellaf.

Daeth y drydedd yn y pendraw wrth i Hannah Cain daro'r bêl i mewn o bum llath ar ôl i'r golwr wyro croesiad Woodham i'w chyfeiriad.

Parhau i ymosod gwnaeth Cymru yng nghyfnod ola'r gêm - fe darodd Rachel Rowe y postyn gyda pheniad celfydd - ond roeddynt hefyd yn broffesiynol iawn y ffordd llwyddon nhw i rwystro Albania rhag creu unrhyw gyfleoedd gwirioneddol.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.