Cwmni dŵr Hafren Dyfrdwy i wario £280,000 am 'fethiannau annerbyniol'

Bydd yn rhaid i gwmni dŵr Hafren Dyfrdwy wario £280,000 mewn "pecyn cosb ariannol" erbyn 2030 am "fethu yn eu dyletswydd i ddelio yn effeithiol â dŵr gwastraff a charthion".

Mae'n dilyn ymchwiliad gan y rheoleiddiwr Ofwat, gyda'r ddirwy i gael ei hariannu gan y cwmni a'u cyfranddalwyr, ac nid drwy filiau cwsmeriaid.

Dyma'r nawfed ymchwiliad o'i fath gan Ofwat, sydd eisoes wedi rhoi dirwyon gwerth £300m i gwmnïau.

Wrth ymddiheuro i'w cwsmeriaid, dywedodd Hafren Dyfrdwy eu bod yn derbyn casgliadau'r ymchwiliad, a'u bod yn "gwneud cynnydd da wrth fynd i'r afael â'r materion".

Mae Hafren Dyfrdwy, sy'n berchen i Severn Trent, yn cyflenwi tua 109,000 o gwsmeriaid ar draws y gogledd-ddwyrain a'r canolbarth.

Fe wnaeth ymchwiliad Ofwat ddarganfod bod Hafren Dyfrdwy wedi methu yn eu hymrwymiad i ddarparu system ddraenio a delio â chynnwys eu carffosydd.

Roedden nhw hefyd yn y gorffennol wedi torri amodau eu trwydded o ran cael prosesau a systemau oedd yn cyrraedd eu gofynion.

Dywedodd Ofwat, tra bod y cwmni bellach â'r prosesau cywir yn eu lle, ei bod hi'n angenrheidiol iddyn nhw fynd i'r afael â'r holl faterion er mwyn sicrhau eu bod yn cydymffurfio yn y dyfodol.

Dywedodd y rheoleiddiwr bod eu hymchwiliad wedi darganfod bod y cwmni wedi torri eu hamodau mewn modd "annerbyniol", a bod hynny wedi arwain at ormod o achosion o ollyngiadau dŵr o orlif stormydd.

"Rydym yn disgwyl i'r cwmni nawr ganolbwyntio ar wneud gwelliannau fel y gall cwsmeriaid adennill ffydd yn y cwmni dŵr a'r gwasanaeth hanfodol y maen nhw'n ei ddarparu," meddai'r rheoleiddiwr.

Dywedodd Rheolwr Gyfarwyddwr Hafren Dyfrdwy, Steph Cawley eu bod "wedi eu hymrwymo i wneud ein gorau i'r amgylchedd, ein cymunedau a chenedlaethau'r dyfodol".

"Rydym yn derbyn casgliadau Ofwat ac yn ymddiheuro i'n cwsmeriaid am y materion ac yn gwneud cynnydd da wrth fynd i'r afael â nhw.

"Rydyn ni ar hyn o bryd ynghanol buddsoddiad gwerth miliynau o bunnau, y mwyaf erioed, gyda £11m ar gyfer gwelliannau o ran delio â gorlif stormydd yn unig, fydd yn ein rhoi ar y trywydd cywir i leihau gollyngiadau i lai nag ugain y flwyddyn erbyn 2030."

Bydd ymgynghoriad cyhoeddus yn cael ei gynnal ar natur y pecyn cosb ariannol sy'n cael ei argymell gan Ofwat cyn i benderfyniad terfynol gael ei gyhoeddi.

Bydd yr ymgynghoriad yn dod i ben ar 6 Tachwedd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.