Llawfeddyg Ysbyty Gwynedd wedi tynnu rhan anghywir o goluddyn claf

Fe wnaeth llawfeddyg dynnu rhan anghywir o goluddyn claf canser yn ystod llawdriniaeth, yn ôl adroddiad newydd.

Mae'n un o 10 "digwyddiad byth", neu never event, yn ystod y 12 mis diwethaf, yn ôl adroddiad ar gyfer Bwrdd Iechyd Prifysgol Betsi Cadwaladr.

Mae pump ohonyn nhw wedi'u rhestru fel llawdriniaethau "safle anghywir", gyda dau yn ymwneud â mewnblaniadau anghywir, dau yn ymwneud â gwrthrychau fel swabiau yn cael eu gadael y tu mewn i gleifion, ac mae un yn ymwneud â rhoi meddyginiaeth trwy'r llwybr anghywir.

Mewn un o'r achosion, fe wnaeth llawfeddyg yn Ysbyty Gwynedd ym Mangor gynnal llawdriniaeth ar ran anghywir o gorff y claf ar ôl tybio fod marc gweladwy yn nodi safle tiwmor.

"Fe wnaeth hyn arwain at y llawfeddyg yn tynnu darn o'r coluddyn lle doedd dim canser," meddai'r adroddiad.

Ers hynny mae'r claf wedi cael ymchwiliadau pellach i baratoi ar gyfer rhagor o lawdriniaeth.

Fe wnaeth claf yn Ysbyty Maelor Wrecsam fynychu clinig dermatoleg un stop, ar ôl cael ei atgyfeirio trwy'r Llwybr Brys Lle'r Amheuir Canser, a chafodd driniaeth cryotherapi lle mae celloedd canser yn cael triniaeth oerfel eithafol.

Roedd y claf wedi'i restru ar gyfer llawdriniaeth arall yr un diwrnod a cafodd yr ardal anghywir o'i gorff ei drin ac roedd rhaid iddyn nhw dderbyn llawdriniaeth bellach yr un diwrnod.

Mae'r ymchwiliad i'r digwyddiad yn parhau, meddai'r adroddiad, sydd i fod i gael ei ystyried mewn cyfarfod ddydd Iau.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.