Noson yn y Premier Inn i'r Prif Weinidog ar ôl dathlu canlyniad yr etholiad

Rhun ap Iorwerth yn gwenu wrth annerch cefnogwyr ym Mae Caerdydd ddeuddydd wedi'r etholiadRob Norman/Plaid Cymru

Roedd Rhun ap Iorwerth wedi gadael allweddi ei fflat yng Nghaerdydd yn ei brif gartref ar Ynys Môn

Bu'n rhaid i Brif Weinidog newydd Cymru drefnu i aros mewn gwesty Premier Inn yng Nghaerdydd wrth i Blaid Cymru ddathlu buddugoliaeth hanesyddol yn etholiad y Senedd – ar ôl anghofio goriadau ei fflat.

Roedd Rhun ap Iorwerth ar ei ffordd wedi'r cyfri o'r gogledd i Gaerdydd ddydd Gwener diwethaf pan sylweddolodd ei fod wedi gadael yr allweddi yn ei brif gartref ar Ynys Môn, tua 200 milltir o'r brifddinas.

Wedi iddo ddatgan fod "pobl Cymru wedi dewis gobaith" yn yr etholiad, bu'n rhaid iddo dreulio'r noson yn y gwesty a gofyn i'w dad, Edward Morus Jones, ddod â'r goriadau iddo.

O ganlyniad roedd yn bosib i'r cyn-athro, canwr a chyn-ymgyrchydd iaith ddathlu camp ei fab a llwyddiant y blaid ym Mae Caerdydd y diwrnod canlynol.

Dywedodd Mr Jones wrth raglen Post Prynhawn ddydd Llun ei fod yn "emosiynol" a bod y sefylla'n teimlo'n "swreal".

Mae Plaid Cymru a chwmni Premier Inn wedi cael cais am ymateb.

Rhun ap Iorwerth a'i dad Edward Morus Jones yn cael sgwrs siriol o flaen torf o gefnogwyr o flaen y Senedd ddydd Sadwrn diwethafRob Norman/Plaid Cymru

Y tad a'r mab yn dathlu llwyddiant Plaid Cymru yn etholiad y Senedd yn ystod digwyddiad o flaen y Senedd a ddenodd gannoedd o gefnogwyr

Enillodd Plaid Cymru 43 o seddi ar gyfer seithfed tymor y Senedd – y tymor cyntaf gyda 96 aelod yn lle 60, a'r cyntaf o dan lywodraeth unrhyw blaid oni bai am Lafur.

Er i bobl Cymru fwrw pleidlais ddydd Iau, ar y dydd Gwener y cafodd y pleidleisiau eu cyfrif gyda'r canlyniad yn cael ei gadarnhau yn gynnar gyda'r nos.

Fel y blaid fwyaf yn y siambr, fe gafodd Mr ap Iorwerth ei ethol yn brif weinidog ddydd Mawrth, ac mae Plaid Cymru'n llywodraethu heb fwyafrif.

Arwydd gwesty Premier InnGetty Images

Mae Mr ap Iorwerth yn cynrychioli etholaeth newydd Bangor Conwy Môn ac yn byw ym Môn gyda'i wraig, Llinos.

Ond fel sawl aelod o'r Senedd, mae ganddo eiddo yng Nghaerdydd ar gyfer y diwrnodau y mae ar ddyletswydd ym Mae Caerdydd ac - erbyn hyn - ym mhencadlys Llywodraeth Cymru yn y ddinas.

Yn wahanol i brif weinidog y DU, sy'n byw yn San Steffan, neu brif weinidog Yr Alban, sy'n byw yn Bute House yng Nghaeredin, does dim preswylfa swyddogol ar gyfer prif weinidog Cymru.

Fe gododd gwestiynau ynghylch diffyg preswylfa ar gyfer prif weinidog Cymru yn 2021 yn dilyn protestiadau ger cartref y cyn-brif weinidog Mark Drakeford yng Nghaerdydd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.