د دمشق هوايي ډګر ته څېرمه 'لویه چاودنه' شوې

سوري فعالان وايي، د پنجشنبې پر ګهیځ د دمشق نړیوال هوايي ډګر ته نژدې 'زوروره چاوده' شوې او بیا ډزې پیل شوې دي.

بریتانیا کې د د سوریې د بشري حقونو مېشتې د څار ډلې مشر رامي عبدالرحمن ویلي "چاودنه ډېره زوروره وه چې په ټول دمشق ښار کې یې غږ واورېدل شو".

دا هوايي ډګر د سوریې دمشق جنوب ختیځ ته نژدې ۲۵ کیلومتره لیرې پروت دی.

تر اوسه د مرګ ژوبلې په اړه رپوټ نه دی ورکړل شوی.

د حزب الله اړوند "المنار" تلوېزیون ویلي، چاودنه د دمشق هوايي ډګر ته څېرمه سونتوکو او زېرمه کې شوې ده.

سرچینه وايي، ښايي چاودنه د اسرائیلو د هوايي برید له کبله شوې وي.

د اسرائیلو د پوځ ویاندې ددې پوښتنې په ځواب کې چې ایا دوی دمشق کې هوايي برید کړی؟ وویل: "د دا ډول رپوټونو په اړه تبصره نه شي کولای".

رویټرز خبري اژانس د سوري حکومت د مخالفو وسله والو ډلو له خولې ویلي، چاودنه د پنجشنبې په ګهیځ په هغه ځای کې وشوه، چې له ایران نه د حزب الله پلوو اورپکو لپاره وسلې پکې امبار شوې وې.

ځینو اسرائیلي سرسنیو هم ویلي، چاودنه د اسرائیلي هوايي برید له کبله شوې چې دمشق کې یې د حزب الله د وسلو پر زېرمې کړی.

د روسیې خبري اژانس سپوټنیک ویلي، اسرائیلو دمشق هوايي ډګر ته څېرمه پنځه پوځي هدفونه بمبار کړي.

څلور ورځې وړاندې د سوریې دولتي سرچینو د جولان پر لوړو د دولتي ځواکونو پر اډې د اسرائیلي بریدونو په اړه رپوټ ورکړی و.

د سوریې روانه جګړه کې د لبنان حزب الله شیعه ډله د ایران او سوریې سربېره د بشار الاسد د حکومت ملاتړ کوي.