Ullachadh na h-Alba ro theintean ga dheasbad aig Holyrood
Thug e mu chòig seachdainnean airson teine sa Mhonadh Ruadh as t-Samhradh a mhùchadh - rud a thog ceistean mu cho ullaichte 's a tha na seirbheisean èiginn
- Air fhoillseachadh
Feumar prìomhachas a thoirt don chunnart a th' ann bho atharrachadh na gnàth-shìde, a rèir BhPA Uainich airson na Gàidhealtachd 's nan Eilean, an dèidh droch theintean ann na Alba as t-samhradh.
Bheir Ariane Burgess air adhart deasbad aig Holyrood feasgar Diciadain, mu cho ullaichte 's a tha Alba mu choinneimh thachartasan gnàth-shìde.
Thug e cha mhòr còig seachdainnean airson teine fiadhaich ann am Pàirce Nàiseanta a' Mhonaidh Ruaidh a mhùchadh as t-samhradh - rud a th' air ceistean adhbharachadh mu cho deiseil 's a tha na seirbheisean èiginn airson a leithid.
Thachair an teine sin an dèidh teine fiù 's nas motha air Mòinteach Dhamhàth an-uiridh.
Thuirt Ariane Burgess BPA gun do dhùisg na teintean a bh' ann as t-samhradh muinntir na h-Alba gu tuigse gum faodadh e tachairt air an stairsich
'S e an fhreagairt, a rèir Ms Burgess, barrachd mhaoineachaidh agus co-obrachadh nas fheàrr, a thuilleadh air a bhith ag "ath-fhliuchadh" cruth na tìre.
"Chan fhaod e a bhith a' toirt còig seachdainnean teine a mhùchadh," thuirt i.
"Tha dragh mòr orm mun bhuaidh air slàinte an fheadhainn a bha an sàs san iomairt.
"Ach feumaidh sinn cuideachd bacadh a chur air teintean sa chiad dol a-mach, agus 's e an dòigh san dèan sinn sin, cruthan-tìre fallain, air an ath-dhealbhachadh, air an ath-fhliuchadh.
"Feumaidh sinn a h-uile duine a thoirt mun bhòrd oir tha beagan eas-aonta ann a thaobh mar a thachras sin."
A rèir fheadhainn a th' air cùl iomairtean ath-fhiadhachaidh, seasaidh cruth-tìre sa bheil barrachd beatha nàdarra agus barrachd uisge nas fheàrr ri teintean, a' fàgail nach bi cunnart cho mòr ann bhuapa.
Rinn teine fiadhaich sa Mhonadh Ruadh milleadh 'apocailipteach'
- Air fhoillseachadh29 An t-Iuchar
£500,000 do ghnothachasan air an tug Teine a' Mhonaidh Ruaidh buaidh
- Air fhoillseachadh18 An t-Sultain
Sgrùdadh ga iarraidh mu uidheamachd na seirbheis smàlaidh
- Air fhoillseachadh4 An Lùnastal
Ach tha teagamh air cuid eile gum fàg ath-fhiadhachadh gum bi barrachd chunnairt ann ri linn 's gu bheil barrachd chonnaidh ri losgadh nan tachradh teine, mar a thachair ann an Gleann Ruasaidh ann an Eilean Arainn an-uiridh, a thachair ann an sgìre far an deach beathaichean ionaltraidh a chasg airson deich bliadhna gus am fàsadh craobhan agus fraoch gu nàdarra.
Am measg na tha le beachd eile, tha tuathanaich, a tha ag ràdh gu bheil cleachdaidhean traidiseanta leithid fhalaisgearan a' cuideachadh le bhith a' toirt air falbh na tha de chonnadh mu choinneimh teine fhiadhaich.
"Tha e fada nas fhèarr bacadh a chur air teine sa chiad àite na feuchainn ri chur às nuair a thòisicheas e," thuirt Raibeart Dòmhnallach o NFU na h-Alba.
"Tha mi a' smaoineachadh gu bheil daoine a' tighinn timcheall chun na dòigh smaoineachaidh a th' againn.
"Tha na teintean a' dol a thachairt.
"Feumaidh sinn nas urrainn dhuinn a dhèanamh gus nuair a thòisicheas iad, gu bheil iad nas fhasa an cur às."
Thuirt Ms Burgess gun do dhùisg na teintean a bh' ann as t-samhradh - gach cuid anns a' Mhonadh Ruadh, agus cuideachd air Àird na Saighde ann an Dùn Èideann, muinntir na dùthcha dhan trioblaid.
"Thachair e ann an sgìre far am bi mòran a' dol air saor-làithean, agus thàinig e gu math faisg air Drochaid Neithich - agus chaidh e air adhart airson grunn seachdainnean.
"Chan urrainn dhuinn sin fhaicinn a-rithist.
"Aig a' cheart àm 's a bha an teine sin ann, bha teine eile air Àird na Saighde ann an Dùn Èideann, agus tha mi gu mòr den bheachd, ged a bha sin uabhasach, gun do dhùisg e daoine sna bailtean mòra, 's gun do thuig iadsan gum faodadh e tachairt air an stairsich."
