Fatboy Slim, James agus Amy Macdonald aig Belladrum 2027

Chaidh Fatboy Slim, James agus Amy Macdonald ainmeachadh aig bàrr a' chlàr-ghnothaich airson fèis Bhelladrum na h-ath-bhliadhna.

Thàinig air a' chòmhlan indie James, à Manchester, - a bhios aig bàrr ghnothaichean oidhche Ardaoin - tarraing a-mach às an fhèis am-bliadhna, an dèidh don t-seinneadair Tim Booth a ghuth a chall.

Oidhche Haoine, bi Fatboy Slim, a tha cuideachd aithnichte mar DJ Norman Cook, à Brighton, a' nochdadh airson a' chiad turas aige gu tuath ann an 14 bliadhna. Chluich e roimhe aig RockNess.

Bidh an seinneadair-sgrìobhaiche Albannach Amy Macdonald sa phrìomh spot oidhche Shathairne, 20 bliadhna bho chluich i an toiseach aig Belladrum.

Thèid an fhèis, faisg air a' Mhanachainn, a chumail eadar an 29mh là agus an 31mh là den Iuchar.

"Thuirt sinn na bu thràithe den t-samhradh gun robh sinn air ar prìomh chòmhlan as motha fhathast a bhucadh, agus tha e air a bhith uabhasach doirbh seo a chumail sàmhach," thuirt riochdaire na fèise, Dougie Brown.

"Tha e a' faireachdainn gu math sònraichte mu dheireadh thall a bhith ag ainmeachadh Fatboy Slim, a thuilleadh air James agus Amy Macdonald - dà chòmhlan sònraichte eile.

"Trì cheòladairean gu math eadar-dhealaichte, ach gach aon le ceangal do-chreidsinneach ris an luchd-amhairc againne."

An dèidh mar a thàinig air James tarraing a-mach, chaidh Razorlight a ghluasad suas dhan phrìomh slot oidhche Ardaoin am-bliadhna, agus chaidh iarraidh air an t-seinneadair Albannach Cammy Barnes an slot acasan a lìonadh.

Chluich Fatboy Slim ceithir tursan aig fèis RockNess ann an Durais, a' chiad tè ann an 2006, agus an tè mu dheireadh ann an 2013 nam measg.