Stoirm Boelo an dèidh Stoirm Austen gu bhith a' toirt buaidh air Alba air fad
- Air fhoillseachadh
Tha rabhadh òmar an sàs agus dùil ri gaoth mhòr air feadh Alba air an deireadh-sheachdain an cois Stoirm Austen an toiseach agus Stoirm Boelo a thig dìreach às a dèidh.
Tha Oifis na Sìde a' toirt rabhaidh gum bi uisge mòr, taobh a-muigh agus tuiltean an cois Stoirm Austen Dihaoine.
Tha na mìltean dhaoine an iar-dheas Shasainn às aonais an dealain agus Stoirm Austen a' toirt buaidh as motha an sin.
Tha dùil gum buail Stoirm Boelo Disathairne a bheir gaoth mhòr thairis air tìr-mòr na h-Alba air fad, a thuilleadh air na h-Eileanan Siar agus Arcaibh.
Bha rabhadh gaoithe an cois Stoirm Boelo ach tha a-nis rabhadh òmair airson gaoth nas làidire
Tha dùil gun èirich a' ghaoth feasgar Disathairne, agus gun ruig i a h-àirde tron oidhche.
Bidh an rabhadh gaoithe òmar an sàs bho 18:00 Disathairne gu 21:00 feasgar na Sàbaid airson Alba gu lèir ach an Arcaibh agus Sealtainn.
Dh'fhaodadh uspagan cho làidir ri eadar 50 agus 65msu a bhith ann, agus cho mòr ri 80msu ann an àitichean fosgailte.
Bidh uisge agus gaoth mhòr air feadh Bhreatainn Disathairne, agus duil gun toir sin buaidh air draibhearan agus seirbheisean còmhdhail poblach.
Thathar a' comhairleachadh do dhraibhearan a bhith air am faiceall is dùil gum bi uisge a' laighe air rathaidean
Thuirt Network Rail Scotland gum bi na trèanaichean a' dol nas slaodaiche gus daoine a chumail sàbhailte sna sgìrean as motha far a bheil dùil ri uisge mòr.
Bidh casgan-astair an sàs air pàirtean de Phrìomh Loidhne a' Chosta an Iar agus Prìomh Loidhne a' Chosta an Ear, cho math ri slighean an ceann a deas agus air taobh sear na dùthcha.
Thuirt a' bhuidheann gum faodadh gun toireadh cuid de thursan nas fhaide nan àbhaist, ach gun robh na cuingleachaidhean a' ciallachadh gum faodadh seirbheisean leantainn san t-sìde as miosa.
Tha dùil gum bi casgan-astair gan cur an sàs ann an cuid de sgìrean nuair a ghluaiseas an dàrna stoirm tarsainn na dùthcha.
Thathar a' comhairleachadh do luchd-siubhail feuch a bheil seirbheisean a' ruith mus falbh iad.
Tha rabhadh ann cuideachd gum faodadh cuid an dealan a chall, agus gun toir an droch shìde buaidh air seirbheisean fòn-làimhe agus seirbheisean eile.
Dh'fhaodadh gun tèid milleadh a dhèanamh air togalaichean, agus gum bi stuth a dh'fhalbhas leis a' ghaoith na chunnart don phoball.
