Tuilleadh bhall air Comataidh na Ceadachd fhàgail is fear air seasamh sìos mar chomhairliche

Tha a-niste ceathrar chomhairlichean air comataidh ceadachd Comhairle na Gàidhealtachd fhàgail is fear dhiubh air seasamh sìos gu tur mar chomhairliche an dèidh co-dhùnadh leigeil le fear a chaidh a dhìteadh airson boireannach èigneachadh a chead tacsaidh a ruith a chumail.

Dh'èignich David Brown boireannach a bha 18 bliadhna de dh'aois a bha a' siubhal san tacsaidh aige mus do dh'fhàg e i a-muigh san fhuachd ann an Inbhir Pheofharain san Dùbhlachd 2023.

Chaidh sia bliadhna agus naoi mìosan sa phrìosan air Brown, a tha 50 agus à Crothaidh, sa Chèitean am-bliadhna.

Thugadh cead tacsaidh a dhraibheadh bhuaithe, ach aig coinneimh de Chomataidh na Ceadachd aig Comhairle na Gàidhealtachd air a' mhìos a chaidh, chaidh co-dhùnadh leigeil leis an cead a th' aige airson tagsaidh a ruith a chumail.

Bha sin a dh'aindeoin 's gun do chuir Poileas Alba an aghaidh sin.

Bha bhall dha teaghlach Brown air nochdadh air beulaibh na comataidh le iarrtas nach dèidheadh cead a tharraing.

Bha ùpraid mhòr ann gu poblach nuair a thàinig co-dhùnadh na comataidh am follais is dh'innis Comhairle na Gàidhealtachd gun tèid an gnothach a dheasbad às ùr aig coinneimh den làn-chomhairle.

Tha cuideam cuideachd air a dhol air na comhairlichean a rinn an co-dhùnadh.

Tha a-niste fear dhiubh, ball Inbhir Ùige agus Taobh Sear Ghallaibh, Willie MacAoidh, air Comhairle na Gàidhealtachd fhàgail gu tur.

Tha triùir eile - na comhairlichean John Grafton, Donnchadh Mac a' Phearsain, agus cathraiche na comataidh Sean Ceanadach - air Comataidh na Ceadachd fhàgail.

Chuir Lib Deamaich na comhairle Mgr Grafton a-mach às a' bhuidhinn is gheall iad obrachadh le buidhnean eile aig an ùghdarras ionadail airson ath-sgrùdadh a dhèanamh air dòighean-obrach is pròiseasan Comataidh na Ceadachd.

Thuirt ceannard na comhairle, an comhairliche SNP Rèamonn Bremner: "Leis a h-uile càil a th' air a bhith a' tachairt thairis air na làithean mu dheireadh tha mi an dòchas gur ann air a' bhuaidh a tha seo a' toirt air an tè a dh'fhuiling a tha ciad smuaintean dhaoine, agus nas fharsainne boireannaich eile air Ghàidhealtachd.

"'S e mo bheachd pearsanta fhèin gum bu chòir don Chomh Birt eisimpleir chàich a leantainn 's seasamh sìos bhon chomataidh.

"Thèid fios a thoirt a-màireach do mo cho-obraichean SNP agus tha fhios agam gum bi an cuid bheachdan aig cuid aca ri chur an cèill air seo.

"Mar a tha fhios againn thèid an gnothach a-niste a dheasbad aig coinneimh den làn-chomhairle."

Tha buidhnean carthannais èigneachaidh am measg na th' air co-dhùnadh na comataidh a chàineadh.

A rèir Seirbheis Èigneachaidh agus Droch-dhìol Feiseil na Gàidhealtachd (RASASH) tha an co-dhùnadh gun cead a thoirt bho Brown a' toirt "teachdaireachd mhillteach" do bhoireannaich.

An t-seachdain a chaidh, thuirt Àrd-oifigear RASASH, Romy Rehfeld ris a' BhBC, gun toireadh co-dhùnadh na comataidh buaidh air daoine a th' air droch-dhìol feiseil fhulang.

"Tha boireannaich agus clann-nighean air a' Ghàidhealtachd airidh air faighinn a-mach carson nach deach èisteachd ri Poileas Alba," thuirt i.

Thàinig càineadh bho thè de bhuill na Gàidhealtachd aig Holyrood, Maree Todd, cuideachd.