Seanadh Cultarail na Gàidhealtachd a' coinneachadh 'son a' chiad uair

Coinnichidh Seanadh Cultarail na Gàidhealtachd airson a' chiad uair ann an Inbhir Nis Diciadain.

Tha am fòram ùr ag amas air guth nas làidire agus nas aonaichte a thoirt do luchd-ealain agus feadhainn eile a tha an sàs ann an roinn a' chultair san sgìre.

Chaidh a stèidheachadh às dèidh coinneimh san Ògmhios mar phàirt de thagradh Inbhir Nis agus na Gàidhealtachd airson inbhe Chathair-bhaile a' Chultair san Rìoghachd Aonaichte an 2029.

Nochd iarrtas an sin airson cruinneachaidh mhaireannaich a bhiodh a' coinneachadh gu cunbhalach, agus a leanadh às dèidh pròiseas an tagraidh.

Bheir an seanadh daoine cruthachail agus buidhnean ealain is cultarail bho air feadh na Gàidhealtachd còmhla.

Cho math ri a bhith mar àite far an tèid beachdan a chur air adhart agus deasbad a dhèanamh, thathas ag amas air atharrachadh a thoirt gu buil san roinn.

'S e a bhith a' leasachadh ro-innleachd ùir airson nan ealan agus a' chultair air Ghàidhealtachd fear de na prìomhachasan aca.

Chaidh Fiona Dalgetty, Àrd-Oifigear Fèis Rois, ainmeachadh mar a chiad chathraiche air an t-seanadh.

Thuirt i: "'S e cothrom a tha seo airson guthan ùra ann an roinn a' chultair a chluinntinn, agus bhithinn a' brosnachadh duine sam bith a tha a' faireachdainn gu bheil rudeigin aca ri ràdh, a dhol an sàs còmhla rinn.

"Feumaidh guthan luchd-ealain a bhith aig cridhe an deasbaid agus tha mi toilichte gum bi taic-airgid ga thabhainn air daoine cruthachail a tha ag obair air an ceann fhèin 'son a' chruinneachaidh seo agus feadhainn a tha ri thighinn."