Түркия: Мектептеги ок атуу тогуз адамдын өмүрүн алды

Түркиянын түштүгүндөгү мектепте ок атылып, андан кеминде сегиз окуучу жана бир мугалим каза тапты. Дагы бир нече адам жаракат алганын түрк ички иштер министри Мустафа Чифтчи билдирди.

Окуя 15-апрелде Кахраманмараш аймагындагы Айсер Чалык орто мектебинде болгон.

Жергиликтүү губернатор Мүкеррем Үнлүэрдин айтымында, кол салган адам окуя учурунда өлтүрүлдү.

Бул кол салуу өлкөнүн түштүгүндөгү дагы бир орто мектепте ок атылып, 16 адам жарадар болгондон бир күндөн кийин орун алып жатат. Анда мектептин мурдагы окуучусу ок чыгаргандан кийин өз жанын кыйган.

Чифтчинин айтымында, шаршембидеги кол салуудан 13 киши жарадар болду. Алардын алтоо оор абалда.

Мектепте ок аткан адам эмнени көздөгөнү азырынча белгисиз. Тергөө иштери башталды.

Түрк маалымат каражаттары шектүү өспүрүм куракта болушу мүмкүндүгүн, ал эки класска киргенин, жанында беш мылтык жана жети магазин болгонун кабарлашты.

Үнлүэрдин айтымында, бул курал-жарактар шектүүнүн мурда полиция кызматкери болуп иштеген атасына таандык болушу мүмкүн.

Жергиликтүү медиа маалымдагандай, кол салуу болгондон кийин шектүүнүн атасы кармалды.

Би-Би-Си ырастай алган видеолордон айрымдар мектептин биринчи кабатынын терезелеринен секирип, имараттан качып чыгууга аракет кылып жатканын көрүүгө болот.

"Мылтыктын добушу абдан катуу болду", - деди түркиялык NTV телеканалынын кабарчысы. Ал "мектептин алдында дүрбөлөң" абал жаралганын кошумчалады.

Мектепте ок атылганы тууралуу кабардан кийин көзүнө жаш алган ата-энелер имараттын сыртына чогулушту.