Abubuwa huɗu masu ban mamaki game da rayuwar Saddam Hussein
Shugabannin da ake kallon su a matsayin masu mulkin kama-karya kan kasance da wasu halaye na daban, kamar son kaɗaici da kuma amfani da cikakken iko.
Daga cikin fitattun shugabannin kama-karya a duniya akwai Hitler, Stalin, Mussolini, Franco da Muammar Gaddafi.
Kusan kowane ɗaya daga cikinsu yana da wasu halaye ko ɗabi'u na musamman da suka bambanta da na sauran mutane.
Saddam Hussein ma bai kasance daban ba.
Ga abubuwa biyar da za a iya tunawa game da tsohon shugaban Iraq, Saddam Hussein.
Lambar yabo daga UNESCO
Saddam Hussein ya kasance mataimakin shugaban jam'iyyar Baath tsakanin 1968 da 1979.
A wannan lokaci ya kawo sauye-sauye masu yawa a tsarin ilimi na Iraq.
An faɗaɗa cibiyoyin ilimi a sassan ƙasar, kuma duk wanda bai halarci makaranta ba zai iya fuskantar hukuncin ɗaurin shekaru uku a gidan yari.
Haka kuma ya gina hanyoyi, makarantu da asibitoci, matakin da ya canja yadda ake aikin kula da lafiya a waɗannan yankuna.
Saboda abin da UNESCO ta bayyana a matsayin ƙoƙarinsa na yaƙi da jahilci a Iraqi, ƙungiyar ta ba shi lambar yabo ta duniya.
Alƙawarin tallafa wa marasa galihu a Amurka
Kafin hare-haren 11 ga Satumbar 2001, alkiblar manufofin ketare na Amurka ba ta sauya ba.
Kwana ɗaya kafin George W. Bush ya hau mulki, Saddam Hussein ya yi ƙoƙarin aika wa Amurka dala miliyan 94.
Ya ce ya ware kuɗin ne domin taimakawa wajen magance matsalar rashin matsuguni da kuma wahalhalun rayuwa da mutanen da ke zaune cikin talauci a Amurka ke fuskanta.
Mukabala da George W. Bush a talabijin
A ƙoƙarinsa na dakatar da mamayar Iraq da Amurka ta yi a 2003, Saddam Hussein ya nemi yin muhawara da George W. Bush.
Ya bayyana hakan ne a wata hira da ta ɗauki sa'o'i uku da CBS News.
"Ina shirye na yi tattaunawa kai tsaye tare da shugaban ƙasarku kuma mu yi muhawara," in ji Saddam kamar yadda CBS News ta ruwaito.
Da take mayar da martani, Fadar White House ta ce Saddam Hussein ya yi wannan furuci, amma ba gaskiya ba ne, kuma zai iya sauya matsayinsa washegari.
Ya bukaci a rubuta Alƙur'ani da jininsa
A Musulunci, ba a yarda a yi amfani da jini a harkokin ibada ba, kuma ana ɗaukarsa a matsayin abin da aka haramta.
Sai dai Saddam ya dage kan wannan buri nasa, inda ya ɗora wa wani mai zane mai suna Abbas Shakir Joudi wannan aiki.
Joudi ya rubuta ayoyi 6,000 masu ɗauke da kalmomi 336,000 da jinin Saddam Hussein, kuma aikin ya ɗauki fiye da shekara biyu.
Sai dai masana harkar jini sun ce irin wannan ɗimbin jini ba zai yiwu a samo daga mutum guda ba, domin zai ɗauki aƙalla shekaru tara kafin mutum ɗaya ya samar da adadin jinin da ake magana a kai.
Rayuwa cikin maraici da burin zama lauya
Saddam Hussein ya tashi ne ƙarƙashin kulawar mahaifiyarsa kaɗai bayan mahaifinsa ya ɓace ba tare da wani bayani ba.
Mutumin da ya fi tasiri a rayuwarsa shi ne kawunsa, wanda daga baya ya shiga jam'iyyar Baath da Saddam ya jagoranta.
Bayan rasuwar ƙaninsa sakamakon cutar daji, mahaifiyarsa ta kasa ci gaba da kula da shi, don haka ta tura shi wajen kawunsa, wani ɗan siyasa da ke zaune a Bagadaza.
Saddam Hussein ya karanci fannin shari'a a Masar, kuma bayan kammala karatunsa ya koma Iraq a 1963, inda ya fara harkokin siyasa kafin daga bisani ya zama shugaban ƙasa.
