'Urupfu' rw'umu-'influencer' w'umunyamerika muri Tanzania rurimo kuvugwa cyane

Umuryango w'umunyamerikakazi uzwi ku mbuga nkoranyambaga urimo gusaba ibisubizo nyuma y'amakuru avuga ko yapfiriye muri Tanzania aho yari yaragiye gutemberana n'umukunzi we.

Igipolisi cy'ahitwa Northern Ungunja muri Zanzibar cyatangaje ko "iperereza ry'ibanze" ryerekana ko Ashly Robinson, uzwi cyane ku mbuga nkoranyambaga nka Ashlee Janae, yapfuye yiyahuye.

Urupfu rwe rwatangajwe bwa mbere ku cyumweru n'uvuga ko ari inshuti ye wavuze ko bamusanze yapfiriye mu cyumba cya hotel yari arimo kandi ko umukunzi we yavuze ko yiyahuye.

Mu itangazo ry'umuryango we, risubirwamo n'ibinyamakuru muri Amerika birimo TMZ, bavuze ko "urugendo rw'inzozi" Ashly Robinson – amazina ye nyakuru - yari yagiyemo rwahindutse "inkuru mbi ku muryango" wabo.

Uwo muryango uvuga ko muri urwo rugendo, rwarimo no kwishimira isabukuru ye y'imyaka 31 hamwe n'umukunzi we, "Ashly bamusanze yahwereye mu cyumba cye ajyanwa kwa muganga hafi, aho nyuma y'amasaha bemejwe ko yapfuye".

Uwo muryango uvuga ko harimo gukorwa iperereza kandi ko nubwo ufite "ibibazo byinshi" wizeye abategetsi muri Zanzibar , ko "barimo gukorana bya hafi mu gushaka umucyo n'ibisubizo".

Umukuru wa polisi ya Northern Ungunja muri Zanzibar avuga ko ibijyanye n'urupfu rwa Ashlee byabaye kuwa kane tariki 09 z'uku kwezi kwa Mata, ko yiyahuye akoresheje igice cy'umwenda we nyuma yo gushwana n'umukunzi we.

Komanda wa polisi asubirwamo agira ati: "Nk'uko bivugwa, habayeho kutumvikana maze nyuma abashinzwe hoteli banzura kubatandukanya, umugore ahabwa icyumba cye n'umugabo icyumba cye".

Polisi ivuga ko yatabajwe igasanga Ashlee akirimo ubuzima akajyanwa kwa muganga akahapfira kuwa gatanu tariki 10.

Amashusho yatangaje, yerekana Ashlee Jenae yambikwa impeta y'urukundo n'umugabo bari barajyanye mu rugendo rw'ibyishimo muri Tanzania mu mashusho bari imbere y'inyamswa y'imbonekarimwe y'intare yera.

Abahagarariye Amerika muri Tanzania na bo nta cyo baravuga ku makuru arimo kuvugwa y'urupfu rwa Ashlee.

Tariki 05 z'uku kwezi kwa Mata ni bwo Ashlee aheruka gutangaza kuri Instagram urugendo yarimo muri Tanzania rurimo amafoto n'amashusho ye n'umukunzi we.

Kuri imwe mu mafoto yatangaje yanditseho ati: "Niba izi ari inzozi, ntihagire unkangura