'Ukuri kwatsinze ibinyoma' – Ukuriye abatavuga rumwe n'ubutegetsi nyuma yo gutsinda amatora muri Hungary

Ishyaka Tisza rya Péter Magyar ryatsinze amatora y'abagize inteko ishinga amategeko muri Hungary/Hongrie bituma azahita aba minisitiri w'intebe w'iki gihugu ari nawe mukuru w'iki gihugu cyo mu burayi bwo hagati.

Ishyaka rye ryabonye imyanya 138 mu myanya 199 igize inteko y'icyo gihugu mu gihe ishyaka rya Viktor Orbán wari umaze imyaka 16 ku butegetsi ryabonye imyanya 55 gusa.

Ku cyumweru n'ijoro, imbere y'abantu ibihumbi bamushyigikiye, ari iruhande rw'uruzi Danube mu murwa mukuru Budapest, Magyar w'imyaka 45 yavuze ko iki gihugu "cyanditse amateka".

Yagize ati: "Iri joro, ukuri kwatsinze ibinyoma…Dufatanyije twabikoze, twakuyeho ubutegetsi."

Yongeyeho ati: "Nta na rimwe mbere mu mateka ya demokarasi ya Hongiriya abantu bigeze batora ari benshi gutya – cyangwa ngo ishyaka rimwe ribone aya majwi". Amatora yitabiriwe ku rugero rwa 80%.

Magyar yatangaje ku rubuga X ko Orbán yamuhamagaye akamwifuriza kwishyuka nyuma y'intsinzi.

Barack Obama wahoze ari perezida wa Amerika yatangaje ko intsinzi y'uruhande rutavuga rumwe n'ubutegetsi muri Hongiriya ari "intsinzi kuri demokarasi, atari i Burayi gusa ahubwo no ku isi".

Viktor Orbán yanenze uko amatora yagenze gusa avuga ko ibyayavuyemo "bisobanutse kandi bibabaje". Yashimiye abamutoye, maze ati: "Iminsi iri imbere yacu ni iyo gukira ibikomere".

Mu myaka ibiri ishize Magyar yajyanye ishyaka rye mu byaro no mu mijyi ya kure muri Hongrie, yizeza abaturage kurandura ruswa yavugaga ko yabaye karande muri iki gihugu.

Ubutegetsi bwa Viktor Orbán bwari inshuti ya hafi y'Uburusiya bwagarutsweho cyane ubwo umwaka ushize bwatambamiye umwanzuro w'Ubumwe bw'Uburayi wo guha Ukraine inguzanyo ya miliyari 90€ yo kuyifasha kurwana intambara n'Uburusiya.

Nyuma yo gutsinda, Magyar yizeje guhindura ibihe bya Orbàn akavugurura uburezi, ubuvuzi, akarwanya ruswa, akanaha ubucamanza ubwigenge.

Yabwiye abamushyigikiye ati: "Uyu munsi mwakoze ibitangaza, Hongiriya yanditse amateka uyu munsi".

Obama yavuze ko intsinzi ya Magyar "itwibutsa twese ko tugomba gukomeza guharanira koroherana, uburinganire no kugendera ku mategeko".