Kinshasa na M23 'bazahurira mu Busuwisi' mu biganiro mu cyumweru gitaha

Ibiganiro byo gushaka amahoro mu burasirazuba bwa DR Congo hagati ya leta ya Kinshasa n'umutwe wa AFC/M23 bigiye kongera gusubukura nk'uko amakuru atandukanye abyemeza, ku nshuro ya mbere bikabera i Burayi.

Radio RFI y'abafaransa ivuga ko ibi biganiro bitegurwa na Qatar kuri iyi nshuro bigiye kubera mu Busuwisi bikazatangira ku wa mbere tariki 13 z'uku kwezi kwa Mata kugeza ku wa gatanu mu cyumweru gitaha.

Lawrence Kanyuka, umuvugizi w'umutwe wa AFC/M23 ku wa gatatu yatangaje ko indege ya 'drone' y'ingabo za leta yateye agace gatuwe ka Nyabiondo muri teritwari ya Masisi muri Kivu ya Ruguru "iminsi micye mbere y'ibiganiro bushya mu nzira y'amahoro ya Doha"

Ikinyamakuru Africa Intelligence kivuga ko ibiganiro hagati ya M23 na Kinshasa bidashobora gukomereza i Doha kubera intambara mu burasirazuba bwo hagati, ko amakuru gikesha abategetsi ari uko bigiye gukomereza i Geneva mu Busuwisi.

Ikigo 'Center on International Cooperation' cya kaminuza y'i New York muri Amerika cyemeza ko ibyo biganiro bizatangira mu cyumweru gitaha mu Busuwisi.

Impande zombi hari bimwe mu bigize (protocoles) amasezerano zamaze kumvikanaho ariko bitarashyirwa mu bikorwa, hakaba n'ibindi batarumvikanaho.

Mu byo bari bumvikanyeho harimo agahenge no guhagarika imirwano, bitubahirijwe kugeza ubu kuko imirwano imaze iminsi ivugwa mu bice bitandukanye by'intara za Kivu ya Ruguru na Kivu y'Epfo.

M23 n'umutwe wa Twirwaneho bakorana, bashinja ingabo za leta kugaba ibitero by'indege mu duce dutuwe n'abaturage cyane cyane twa Minembwe n'ahandi, ibyo igisirikare cyirinze kugira icyo kivugaho kugeza ubu.

Kimwe mu byibazwa ku biganiro bizabera mu Busuwisi ni ingendo za bamwe mu ntumwa za M23 zijya i Burayi mu gihe benshi mu bakuriye uwo mutwe inyandiko zabo z'inzira zateshejwe agaciro na leta ya Congo.

RFI ivuga ko mu gihe Qatar ari yo yafashega ingendo zabo zigana i Doha, ishobora no gufasha mu kugira ngo bagere i Burayi mu Busuwisi.

Umwaka ushize, Ubusuwisi bwagerageje ibikorwa byo guhuza Kigali – ishinjwa gukorana na M23, ibyo yo itemera – na Kinshasa, nayo iregwa gufatanya na FDLR ibyo na yo ihakana.

Bizaba ari ubwa mbere abahagarariye AFC/M23 na Kinshasa bahuriye mu biganiro bitaziguye i Burayi, nyuma y'ibyabaye mbere muri Angola no muri Qatar.