Ibyo tuzi ku ndege za F-15E zikoreshwa na Amerika zihuzwa n'iyahanuwe muri Iran

Ibice by'indege ya Amerika yahanuwe muri Iran byatangajwe ku mbuga nkoranyambaga bihuye n'indege z'intambara za F-15E Strike Eagle.

Izi ni indege zakorewe gukora ibitero zirasa ku butaka cyangwa se zirasa ku bindi bintu biri mu kirere nk'izindi ndege, misile cyangwa za drones.

Muri Iran, birashoboka ko izi ndege zifasha mu kurasa za 'cruise misiles' na 'drones' biba birashwe na Iran bitaragera aho bigana.

Mu kazi ko kurasa ku butaka, izi ndege zishobora kurekura ibisasu cyangwa n'amasasu mato akagendera ku makuru y'indangacyerekezo (GPS) mu guhamya intego.

Iyi ndege imwe ijyamo abantu babiri: umupilote imbere uba uyitwaye n'uwitwa 'Weapons Systems Officer' umwicara inyuma.

Uwo w'inyuma bita "Wizzo" aba afite 'screens' enye imbere ye agahitamo ibipimo by'aho barasa no kumenya neza ko ari ho ibisasu byageze.

Ubu buryo bw'abantu babiri butuma akazi bakagabana, cyane cyane mu kirere kirimo indege nyinshi z'intambara aho umupilote aba arwana n'ibishobora guhungabanya indege ye.

Ntabwo tuzi neza icyahanuye iyo ndege ya Amerika, ariko niba yahanuwe n'ingabo za Iran birashoboka cyane ko ari misile iraswa iva ku butaka ijya mu kirere - surface-to-air missile (SAM) yakoreshejwe.

Abakuru b'ingabo za Amerika kenshi bakunze kwigamba ubushobozi bwa gisirikare burenze cyane ubwa Iran muri iyi ntambara, ariko iraswa ry'iyi ndege - niryemezwa na Amerika ku mugaragaro - rirerekana ko Iran igifite ubushobozi bukomeye bwo kwirwanaho.

Hagati aho guverineri w'intara ya Kohgiluyeh - Boyer yo mu majyepfo ya Iran yatangaje ko ubu ikibashishije cyane ari "ugufata" abapilote b'indege yahanuwe "ari bazima".

Ibiro ntaramakuru ISNA byo muri Iran bimusubiramo avuga ngo "Abashobora gufata cyangwa kwica abo banzi bazashimwa byihariye n'ibiro bya guverineri".

Naho televiziyo ya Iran ivuga ko abategetsi bashyizeho igihembo cya miliyari 10 z'amafaranga y'ama-tomans (65,000$) akoreshwa muri Iran ku uri bufate abari cyangwa uwari muri iyo ndege.