"I Think You're Special" - Abakunzi ba muzika ya Africa bishimiye uko Tems yitwaye mu gitaramo na Justin Bieber

Mu gitaramo cya mbere gikomeye akoreye imbere y'abantu benshi mu myaka ine ishize, Justin Bieber yongeye kwigaragaza mu mpera z'icyumweru gishize mu iserukiramuco ry'ubugeni na muzika rikomeye rizwi nka Coachella.

Mu buryo butunguranye abakunzi ba muzika muri Afurika bashimishijwe no kubona ibyamamare Tems na Wizkid baririmbana na Bieber, banagaruka cyane ku buryo bitwaye.

Bieber w'imyaka 32 yamaze igice kinini cy'igitaramo cyo ku wa gatandatu nijoro yicaye imbere ya mudasobwa, aririmba aherekejwe na videwo za YouTube z'indirimbo ze za kera nka Baby na Never Say Never, ibintu byashimishije cyane abafana, nk'ikimenyetso cyo guha icyubahiro urubuga rwamumenyekanishije.

Mu 2022 Bieber yahagaritse ibitaramo bye yise "Justice World Tour" kubera uburwayi yavuze ko afite bwitwa Ramsay Hunt syndrome mu 2022 bwamuteraga kugagara mu maso (facial paralysis).

Benshi bari biteze kumureba muri Coachella, iserukiramuco ngarukamwaka rimaze imyaka hafi 30, ribera mu gace k'ubutayu muri California na Colorado muri Amerika, mu mpera z'iki cyumweru rikaba ryarabereye ahitwa Empire Polo Club mu gace ka Indio muri leta ya California.

Yatangiye igitaramo ari wenyine ku rubyiniro rutariho ibindi bintu, aririmba indirimbo zo kuri album ze zo mu 2025 Swag na Swag II, mbere yo kubwira imbaga ko ashaka kubajyana "mu rugendo," maze agaruka ku ndirimbo ze za kera.

Muri icyo gitaramo, Bieber yaririmbye indirimbo zose hamwe 30, indirimbo ya 28 yaririmbye ni "I Think You're Special" yakoranye na Tems umwaka ushize, yamuhamagaye nk'umutumirwa no muri iki gitaramo bayisubiramo.

Ku ndirimbo ya 29 Bieber yahamagaye na Wizkid maze bose hamwe na Tems baririmbira abafana indirimbo yakunzwe cyane "Essence".

Tems yagarutsweho cyane kubera kwitwara neza, ibyashimangiye impamvu yegukanye Grammy y'umuhanzi mwiza muri Afurika mu 2025.

Temilade Openiyi, uzwi muri muzika nka Tems kubera indirimbo ze nka "Love Me JeJe" ndetse na "Essence" yakoranye na Wizkid nyuma bagakora 'remix' yayo na Bieber, ari na yo baririmbye muri Caochella.

Muri iki gitaramo, Bieber yari yaherekejwe n'umugore we Hailey Bieber wabonetse mu bafana, hari kandi icyamamare muri cinema Timothée Chalamet n'umukunzi we Kylie Jenner.

Bamwe mu bafana bari bambaye ibara rya ry'umwura (purple) ibara ryigeze kumenyekana cyane mu bakunzi ba Bieber bazwi nka "Beliebers".

Coachella ihuza abantu barenga 100,000 buri munsi nk'uko bitangazwa n'abapolisi b'umujyi wa Indio, kandi imaze gutegurwa kuva mu 2002 kuri Empire Polo Club.