Her un Cofi i redeg cilomedr am bob gôl yng Nghwpan y Byd

Wrth i gefnogwyr Yr Almaen estyn am stein arall i ddathlu buddugoliaeth 7-1 yn erbyn Curaçao yng Nghwpan y Byd ddydd Sul, roedd rhaid i Matthew Roberts estyn am ei esgidiau rhedeg.

Mae'r athro o Gaernarfon wedi gosod her i'w hun i redeg cilomedr am bob gôl sy'n cael ei sgorio yn y bencampwriaeth eleni, ac ar ôl dechrau eithaf hamddenol, mae pethau wedi poethi yn go sydyn, meddai.

"Naeth o gychwyn reit araf efo'r gêm gyntaf, efo 2-0 i Mexico – boring, 2km!

"5km oedd hi'r ail ddiwrnod, wedyn 9km... ond wedyn, o'dd gen i 15km i'w 'neud!

"I gychwyn, o'n i'n meddwl 'dwi isho mwy o goliau!' ond fel o'ddan nhw'n mynd i mewn [yng ngêm yr Almaen], o'n i'n dechrau newid meddwl dipyn bach!"

Mae Matthew yn dogfennu ei ymgais mewn fideos Cymraeg ar TikTok – doedd o ddim yn credu y byddai neb yn ei goelio tasai ond yn ei gofnodi ar yr ap rhedeg Strava, meddai! – ac yn cael dipyn o sylw a dilynwyr newydd yn barod.

"Dwi wedi cael ymateb reit dda. 'Nes i neud y fideos yn gyhoeddus i gael mwy o sylw, a dydy'r ffôn ddim wedi stopio buzzian ers hynny; o'dd o'n constant, efo pobl yn hoffi a dilyn.

"Dwi'n gobeithio ei fod o'n cyrraedd dros Gymru erbyn hyn."

Mae Matthew wrth ei fodd yn rhedeg – mae'n dda ar gyfer ei iechyd meddwl, eglura - ac wrthi'n hyfforddi ar gyfer Ras yr Wyddfa ar hyn o bryd.

Ond nid her ffitrwydd yw hon yn unig; mae'n ei wneud er mwyn codi arian ar gyfer elusen iechyd meddwl yng Nghymru.

"O'n i 'di meddwl yn galed am beth i godi arian ato, a iechyd meddwl dynion ddaeth i'r meddwl.

"O'n i 'di g'neud ymchwil, ac mae 'na elusen o'r enw Helpu Cymru sy'n helpu dynion ledled Cymru gyda'u hiechyd meddwl, drwy gynnig cefnogaeth, cymuned i siarad a rhannu profiadau, a rhywun i wrando.

"Ac o'n i'n meddwl, fel dynion, 'dan ni angen cael gwared o'r stigma o 'rhaid i ni fod yn gryf drwy'r amser, a ddim dangos emosiwn'. Dwi'n meddwl ei bod hi'n bwysig i ni rannu ein teimladau."

Felly tybed faint o gilomedrau fydd Matthew wedi gorfod eu rhedeg erbyn i ni wybod pwy fydd yn codi'r Gwpan ar 19 Gorffennaf?

Cafodd 172 o goliau eu sgorio bedair blynedd yn ôl pan oedd y bencampwriaeth yn Qatar, ond wrth gwrs, mae'r twrnamaint yn llawer mwy eleni, gyda mwy o dimau yn cystadlu a 40 o gemau ychwanegol.

Unarddeg oedd cyfanswm y goliau a gafodd eu sgorio yn y gemau ddydd Llun, diolch i bump gôl Sweden yn erbyn Tunisia, felly mae hi'n argoeli i fod yn her a hanner i Matthew!

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.