Dyn wedi'i arestio ar ôl i gorff gael ei ddarganfod mewn fflat ar Ynys Môn

Heddlu

Mae dyn 53 oed o Ynys Môn wedi marw ar ôl cael ei ddarganfod mewn fflat yng Nghaergybi yn ystod oriau mân bore Sadwrn.

Mae dyn lleol 33 oed wedi'i arestio ar amheuaeth o lofruddiaeth mewn cysylltiad â'r farwolaeth, ac mae'n parhau yn y ddalfa.

Dywedodd Heddlu Gogledd Cymru ddydd Sul bod "ditectifs wedi cael mwy o amser i gwestiynu'r dyn."

Cafodd yr heddlu eu galw i fflat yn Llys Watling, ar Ffordd Llundain, am 02:42 ddydd Sadwrn, 17 Hydref, gan Wasanaeth Ambiwlans Cymru.

Er gwaethaf ymdrechion y gwasanaethau brys, cafodd y dyn 53 oed ei ddatgan yn farw yn y fan a'r lle.

Dywedodd y Prif Arolygydd Ditectif Richard Sidney fod yr heddlu'n "deall y bydd y digwyddiad yn peri pryder i'r gymuned leol."

Ychwanegodd ei fod am ddiolch i'r gymuned leol am eu cymorth tra bod swyddogion yn parhau gyda'u hymchwiliad yn y cyfeiriad.

Yn gynharach, dywedodd Heddlu Gogledd Cymru nad oedd "unrhyw risg barhaus i'r cyhoedd."

Mae'r heddlu'n apelio ar unrhyw un sydd â gwybodaeth a allai helpu'r ymchwiliad i gysylltu â nhw.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.