Sali Mali yn ôl ar S4C - heb ei hanimeiddio - am y tro cyntaf mewn 20 mlynedd

Bydd cymeriad Sali Mali yn dychwelyd i S4C y flwyddyn nesaf - a hynny am y tro cyntaf ers dros 20 mlynedd mewn cyfres sydd heb ei hanimeiddio.

Cafodd y cymeriad ei greu gan Mary Vaughan Jones ar gyfer cyfres o lyfrau plant a ddechreuodd gyda 'Sali Mali' yn 1969.

Fe wnaeth y cymeriad ymddangos ar S4C am y tro cyntaf yng nghyfres Caffi Sali Mali yn 1994, gyda Rebecca Harries yn y rôl.

Y tro diwethaf i'r Sali Mali ymddangos fel person go iawn oedd rhwng 2004 a 2007 fel rhan o gyfres Pentre Bach.

Cynyrchiadau Mojo fydd yn cynhyrchu'r gyfres newydd, ac mae'r broses o chwilio am actores newydd i gamu i esgidiau Sali Mali wedi dechrau.

Er y cyfnod hir heb actores yn camu i esgidiau Sali ei hun, mae cyfres wedi'i hanimeiddio wedi ymddangos ar y sianel.

Cafodd ei darlledu'n gyntaf yn 2000, tra bod y penodau diweddaraf wedi eu dangos yn 2021.

Wrth ymateb i'r cyhoeddiad ar faes yr Eisteddfod Genedlaethol, dywedodd Rebecca Harries ei bod "wrth fy modd i glywed bod Sali Mali yn dychwelyd i ddiddanu a chadw cwmni i blant Cymru".

"Roedd 'bod yn ffrind' iddi am gyhyd yn fraint ac yn un o bleserau mawr fy ngyrfa.

"Ges i gyfle i gwrdd â phlant ledled Cymru a gwneud y ffrindiau gorau yn y gwaith.

"Pob lwc i'r criw newydd i gyd, fe fyddwch chi'n gweithio'n galed iawn ond fydd e werth e.

"Ac i'r Sali Mali newydd… mwynha bob eiliad o'r oren, croesawa popeth sy'n dod i dy gyfeiriad di – mae e'n reid cyffrous."

Dywedodd Sioned Geraint, comisiynydd plant a dysgwyr S4C fod "cenedlaethau o blant Cymru wedi cael eu dylanwadu gan Sali Mali".

"20 mlynedd ers i Pentre Bach orffen, mae nifer o'r plant a dyfodd fyny â Sali Mali bellach yn rieni eu hunain, a dwi'n siŵr y byddant wrth eu bodd i'w gweld yn dychwelyd i S4C i ddiddanu eu plant."

Ychwanegodd Llion Iwan, prif swyddog cynnwys S4C nad oes llawer o gymeriadau ar y sianel sy'n fwy eiconig na Sali Mali.

"I nifer ohonom, bydd dychweliad Sali Mali fel dal fyny efo hen ffrind.

"Ond i genhedlaeth gyfan o blant, dyma fydd y tro cyntaf iddyn nhw ddarganfod Sali Mali ac mae'n hynod o gyffrous y bydd rhywun yn cael y cyfle i gamu i'r rôl eiconig hon."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.