Melin Llynon wedi'i phaentio yn lliwiau'r Urdd ar gyfer yr Eisteddfod

Os gyrrwch chi drwy Landdeusant, Ynys Môn, yr wythnos yma fe wnewch chi sylwi fod rhywbeth yn edrych yn wahanol yno.

Mae'n amlwg fod perchnogion Melin Llynon wedi mynd i ysbryd yr ŵyl, gan baentio'r strwythur gyda lliwiau eiconig gwyrdd, coch a gwyn yr Urdd.

Cafodd Melin Llynon ei hadeiladu yn Llanddeusant yn 1775 er mwyn cynhyrchu blawd.

Mae'r felin ŷd hanesyddol, yr unig un sydd dal i weithio yng Nghymru heddiw, yn gartref i fusnes toesenni Melin Llynon.

Yn y gorffennol roedd dros 50 o felinau ar Ynys Môn. Roedd y melinau yn gallu cynhyrchu digon o flawd i fwydo Cymru i gyd.

Yn ei anterth roedd Melin Llynon yn cynhyrchu rhwng tri a chwe thunnell o flawd y flwyddyn.

Fel sy'n draddodiad, mae pobl Ynys Môn wedi harddu eu cymunedau er mwyn estyn croeso i'r ŵyl ieuenctid fwyaf o'i math yn y byd, ac mae Melin Llynon yn amlwg wedi ymuno yn y cyffro.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.