Canu yn ystod offeren yn Y Fatican 'yn brofiad ysgubol'

Côr Caerdydd yn perfformio yn RhufainGeraint Rees

Prin iawn yw'r cyfleoedd i ganu yn Y Fatican ond dyna yn union y gwnaeth Côr Caerdydd ddydd Sadwrn

Mae aelod o Gôr Caerdydd wedi disgrifio'r wefr o ganu yn ystod offeren yn Y Fatican, a rhoi blas o waith cyfansoddwyr o Gymru.

Roedd bod yn rhan o'r achlysur ym Masilica San Pedr ddydd Sadwrn "yn brofiad ysgubol", dywedodd Geraint Rees wrth raglen Bwrw Golwg BBC Radio Cymru.

Fe gododd gyfle prin i berfformio yn Y Fatican wedi i'r côr cymysg ganu mewn gŵyl yn Yr Eidal yn 2024 sy'n anrhydeddu'r diweddar hyfforddwr rygbi chwedlonol, Carwyn James.

Fe ddenodd y perfformiad hwnnw sylw un o'r trefnwyr, sydd hefyd â chysylltiadau gyda'r Fatican.

"Mae mawredd y lle yn anhygoel!" dywedodd Geraint Rees.

"Ges i fy magu yn credu bod Tabernacl Treforys yn Eglwys Gadeiriol o ryw fath, ond mae mynd i'r Fatican lle chi'n gallu cael 60,000 o bobl mewn yn yr eglwys ar yr un pryd - mae'n ryfeddol.

"Roedd hi'n fraint anhygoel a dyw corau o dramor ddim yn cael y fraint yma heb sôn am gôr o Gymru fach."

Gwawr Owen yn arwain y côr yn RhufainGeraint Rees

Gwawr Owen yn arwain y côr yn Rhufain

Roedd arweinydd a sylfaenydd y côr, Gwawr Owen, meddai, "wedi cytuno ar y rhaglen gyda'r Fatican, oedd yn cynnwys un o ddarnau Schubert a 'Gloria' Vivaldi.

"Ond roedd hefyd pedair gyda ni gan gyfansoddwyr o Gymru – un yn gwbl newydd ar gyfer yr achlysur gan Geraint Owen.

"Roedd darn gan Paul Mealor oedd yn un ganon ni yn yr Eisteddfod Genedlaethol ychydig flynyddoedd yn ôl, a 'Pie Jesu' Robat Arwyn, a chafodd y darn gan Karl Jenkins, 'God Shall Wipe Away the Tears' ei chwarae yn ystod y cymundeb gyda Dafydd Huw ar yr organ.

"Roedd yn brofiad ysgubol."

'Penwythnos i'r brenin a'r frenhines!'

"Yn y côr ni'n amrywio'n ieithoedd ni'n rheolaidd o ran beth ry' ni'n ei ganu yn ôl yr angen.

"Fi'n credu o bosib bod y ffaith ein bod ni'n gyfarwydd â chanu yn y Gymraeg yn golygu bod y ffordd ni'n ynganu geiriau Lladin ddim yn rywbeth ni'n gorfod meddwl amdani cymaint.

'Naethon ni set y noswaith cyn hynny gydag un o brif gorau Yr Eidal, ac fe wnaethon ni set gwbl Gymraeg iddyn nhw.

"Rhyw 10 o ganeuon ac fe gafon ni dderbyniad gwresog iawn - mewn eglwys llawn yng nghanol Rhufain!"

"Ry'n ni 'di cael penwythnos i'r brenin a'r frenhines, i fod yn onest!"

"Os taw cyngerdd sy' 'da ni, mae rhywun yn cyflwyno'r caneuon ac mae tamed bach o gomedi weithiau yn rhan o hwnna.

"Mewn offeren, [rhaid] derbyn y cues oddi wrth yr offeiriad pan roedd e'n dweud rhyw air penodol fel bod Gwawr yn ein tynnu ni gyd a Dafydd ar yr organ i mewn...

"Ry'ch chi'n gorfod mynd gyda'r patrwm ac un o'r pethau am Y Fatican yw bod y patrwm yn un eglur ac maen nhw'n glynu ato fe.

"Fe wnaethon ni ganu darn gan Schubert i agor y gwasanaeth, felly roedd hwnna'n gosod y cywair."

Ychwanegodd: "Un o'r pethau mwyaf gwych am gôr yw fy mod i'n gweld côr ac eglwys yn debyg iawn o ran trawsdoriad oedran, o'r 20au i'r 80au...

"Mae cefnogaeth pobl i'w gilydd, a gofal dros ei gilydd, a dyfnder y sgyrsiau ry'n ni'n ei gael yn gwneud penwythnos cyfoethog iawn."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.