Merched Soar yn cipio dwy wobr gyntaf yn yr Ŵyl Ban Geltaidd

Mae 23 o ferched o ardal Tregaron newydd ddychwelyd adref o'r Ŵyl Ban Geltaidd yn Carlow, Iwerddon, gyda dwy wobr gyntaf.

Fe gystadlodd Côr Merched Soar yn yr ŵyl flynyddol sy'n ddathliad o gerddoriaeth a diwylliant Celtaidd rhwng 7-12 Ebrill gan ddod i'r brig yng nghystadleuaeth y Côr Merched a'r Côr Traddodiadol.

Â'r côr yn dathlu dengmlwyddiant eleni, mae Carys Mai wrth ei bodd gyda llwyddiant y côr yn 2026 hyd yma.

Meddai: "Rwy'n arweinydd eithriadol o lwcus achos mae gyda fi griw o ferched sydd mor ymroddgar, mor dalentog, a sy'n gymaint o sbort. Mae'n gwneud fy ngwaith i'n rhwydd iawn a fi'n eithriadol o falch bod yr holl waith ni wedi ei 'neud wedi talu ffrwyth dros y penwythnos."

Ac mae trigolion Tregaron hefyd yn ymfalchïo yn llwyddiant y merched sy'n ymarfer bob nos Fawrth yn festri capel Bwlchygwynt yng nghanol y dref.

"Mae'r croeso a'r cyfarchion ni wedi ei gael ers dod yn ôl yn hollol hyfryd, mae pawb yn falch iawn o'n llwyddiant ni ac mae rhywun o Tegaron wedi codi baner yr Ŵyl Ban Geltaidd i ddathlu llwyddiant y côr."

Yn rhan o arlwy Merched Soar wrth gystadlu yn y Côr Merched a'r Côr Traddodiadol roedd perfformiad o sianti Gymraeg a Mil Harddach, a pherfformiadau i drefniannau Carys o'r alawon gwerin Robin yn Swil a'r Gwydr Glas.

Beth oedd argraffiadau Carys o'r ŵyl sy'n croesawu cystadleuwyr o Gymru, Iwerddon, Yr Alban, Llydaw, Cernyw ac Ynys Manaw ers dros hanner canrif?

"Oedd e'n ffantastig, mae'n ŵyl sy'n dathlu a hyrwyddo'r gwledydd Celtaidd i gyd ac roedd Carlow yn leoliad bendigedig. Yn amlwg roedd y busnese a'r siopau i gyd wedi prynu i mewn i'r ŵyl.

"Oedd y lle yn llawn baneri a cherddoriaeth byw ymhob man. Roedd digon o godi canu felly roedd yr awyrgylch yn hyfryd a roedd croeso mawr i ni yna hefyd.

"Yn sicr mae e wedi ysbrydoli ni i gystadlu yno eto. Falle dim bob blwyddyn ond falle am yn ail.

"Licien i ddweud diolch yn fawr iawn i Elan Davies, ysgrifennydd y côr, hi nath drefnu'r daith a hefyd diolch i'r cyfeilyddion oedd wedi helpu mas yn Carlow."

Ar ôl misoedd o ymarferion i gyrraedd y brig mewn dwy gystadleuaeth, roedd yn rhaid dathlu.

"Fuodd yna ddathlu mawr tan yr oriau mân - digon o Guiness yn llifo, lot fawr o godi canu a chwerthin a fi'n siŵr ein bod ni wedi gadael ein marc ar Carlow," chwarddai Carys.

Ac yn ôl Carys roedd cynrychiolaeth wych o Gymru yn yr ŵyl, yn cystadlu ac yn diddanu:

"Aethon ni i Noson Lawen Gymreig hwyliog iawn ar y nos Wener. Dwi'n meddwl bod tua naw côr o Gymru wedi cymryd rhan yn y Noson Lawen ac yn cystadlu dros y penwythnos.

"Gaethon ni gyngerdd gwych yng ngwesty'r Seven Oaks gyda eitemau gan y corau i gyd, partïon dawnsio, roedd Lo-fi Jones yn chwarae a band o'r enw Paid Gofyn felly gawson ni noson wirioneddol wych."

Daeth Merched Soar at ei gilydd i ganu am y tro cyntaf yn 2016 ac ers hynny mae'r côr wedi tyfu, fel eglurai Carys:

"Daeth grŵp bach ohonon ni at ein gilydd i ganu ensemble yn Eisteddfod Gadeiriol Tregaron ddeg mlynedd yn ôl ac mae'r côr jest wedi tyfu o ran hynny.

"Mae'r aelodau'n dod o bob cwr o'r sir erbyn hyn, o Dalybont yn y gogledd i lawr i Derwen-gam, Llanwnnen a Chwrt-newydd yn ne'r sir.

"Ry'n i'n griw amrywiol mewn lot o swyddi gwahanol, lot ohonon ni'n famau ond ni'n neud yr amser bob nos Fawrth i ddod at ein gilydd a nin mwynhau canu a chymdeithasu."

Beth sydd nesaf i'r côr ar flwyddyn pen-blwydd Merched Soar yn ddeg oed?

"Mae gyda ni gyngerdd yng Nghaffi Becca yn Efailwen nos Wener 24 Ebrill ac ar 10 Mai fyddwn ni yn oedfa cyntaf y flwyddyn yng Nghapel Soar y Mynydd.

"Ry'n ni wrthi'n paratoi oedfa fydd yn gymysgedd o ganeuon a darlleniadau amrywiol. Ni'n edrych ymlaen yn fawr i hynny."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.