Plot o draeth heb gwt yn Abersoch yn mynd ar werth am £100,000

Mae plot o draeth yn Abersoch gyda golygfa arbennig - a phris i gyd-fynd - wedi denu sylw prynwyr posib.

Wythnos ar ôl mynd ar werth am gynigion dros £100,000, mae'r darn wyth metr wrth bedwar metr ar rif 44 Traeth Abersoch eisoes wedi cael caniatâd cynllunio.

Cafodd cwt ar y llain breifat ei ddinistrio mewn storm y llynedd.

Dywedodd cyfarwyddwr yr asiant tai Rhys Elvins wrth BBC Cymru: "Ar anterth y farchnad fe aeth un am £177,000 - roedd hynny tua diwedd 2022."

Ond dylai unrhyw ddarpar berchnogion wybod nad oes cwt yno ar hyn o bryd - a does dim cyflenwad trydan, dim gwres a dim draeniad.

Er dyw hynny ddim wedi atal rhai perchnogion rhag rhoi paneli solar ar doeau eu cytiau.

Ychwanegodd Mr Elvins ei fod wedi cael cwpl o ymholiadau o fewn yr wythnos ddiwethaf yn barod.

Yn 2022, aeth cwt ar draeth Abersoch ar y farchnad am £200,000, tra bod cwt arall wedi'i werthu yno am £153,000 'nôl yn 2016.