5 peth allwch chi wneud i arbed dŵr wrth i'r galw gynyddu 20%

Mae Dŵr Cymru'n gofyn i gwsmeriaid helpu i leihau'r defnydd o ddŵr wrth i'r galw barhau'n sylweddol uwch na'r arfer yn ystod y tywydd poeth.

Dywedodd y cwmni fod pobl yn defnyddio tua 20% yn fwy o ddŵr nag arfer fis Gorffennaf, gan roi pwysau cynyddol ar y rhwydwaith cyflenwi.

Yn ôl Dŵr Cymru, mae'r galw wedi bod yn uwch na 1 biliwn litr y dydd ers dydd Iau, 9 Gorffennaf.

Mae'r cwmni'n annog pobl i wneud newidiadau bach yn eu defnydd o ddŵr er mwyn helpu i gynnal cyflenwadau os bydd y tywydd sych yn parhau.

Defnyddiwch gan dyfrio yn hytrach na thaenellwr (sprinkler)

I ddyfrio planhigion neu flodau, mae Dŵr Cymru yn awgrymu defnyddio can dyfrio yn lle pibell, ac i ystyried defnyddio casgen ddŵr i gasglu glaw i'w ddefnyddio yn yr ardd.

Gadewch i'r lawnt wella'n naturiol

Mae cyngor i bobl adael lawntydd i wella'n naturiol yn hytrach na defnyddio dŵr i'w dyfrio.

Peidiwch â thorri'r lawnt yn rhy fyr, a defnyddiwch y toriadau ar y gwair i helpu'r pridd i gadw lleithder.

Ailddefnyddiwch ddŵr lle bo modd

Os oes gennych bwll padlo yn yr ardd, gellir defnyddio'r dŵr wedyn i ddyfrio planhigion.

Defnyddiwch ddŵr sydd dros ben ar ôl golchi llestri i olchi eitemau plastig neu wydr cyn eu hailgylchu.

Cadwch ddŵr yn yr oergell

Yn hytrach na rhedeg y tap nes bod y dŵr yn oer, cadwch jwg o ddŵr yn yr oergell.

Maen nhw hefyd yn awgrymu i beidio â gorlenwi'r tegell - berwch y dŵr sydd ei angen arnoch yn unig.

Arhoswch nes bod y peiriant yn llawn

Mae Dŵr Cymru hefyd yn annog pobl i redeg peiriannau golchi dillad a pheiriannau golchi llestri dim ond pan fydden nhw'n llawn.

Defnyddiwch y rhaglen 'eco' ar y peiriant golchi llestri os oes un ar gael.

Dywedodd Prif Swyddog Cwsmeriaid Dŵr Cymru, Kit Wilson, bod trydedd ton wres eleni wedi arwain at bobl yn defnyddio llawer mwy o ddŵr ac am gyfnodau hirach drwy'r dydd.

Ychwanegodd fod timau'r cwmni'n "gweithio rownd y cloc i drin mwy o ddŵr, symud cyflenwadau o gwmpas y rhwydwaith a thrwsio gollyngiadau cyn gynted â phosibl".

Dywedodd hefyd y gallai "newidiadau bach gan lawer o bobl wneud gwahaniaeth mawr" a helpu i "osgoi'r angen am fesurau pellach os bydd y tywydd poeth yn parhau".