Goleuadau newydd i ganolfan heddlu i gostio bron i £500,000

Mae cost o bron i £500,000 i newid y goleuadau yng nghanolfan gydlynu strategol Heddlu Dyfed-Powys wedi cael ei ddisgrifio fel ffigwr "trawiadol o uchel".

Mae'r cytundeb ar gyfer y system oleuadau newydd yn y ganolfan yn Llangynnwr ger Caerfyrddin wedi cael ei gymeradwyo gan Gomisiynydd Heddlu a Throseddu y llu, Dafydd Llywelyn.

Mewn cyfarfod o'r panel trosedd - sy'n goruchwylio gwaith y comisiynydd - dywedodd yr is-gadeirydd, y cynghorydd Keith Evans bod y ffigwr wedi ei "ysgwyd ychydig", a gofynnodd i Mr Llywelyn egluro ei rôl yn cymeradwyo'r gwariant.

Yn ôl adroddiad roedd y system oleuadau yn y ganolfan - a gafodd ei hadeiladu 15 mlynedd yn ôl ar gost o £6.4m - yn anodd i'w chynnal oherwydd nad oedd rhannau bellach ar gael.

Bydd y system newydd yn cynnwys goleuadau LED a thechnoleg sy'n golygu y gall y golau bylu pan nad oes pobl yn yr ystafell, gan arbed ynni.

Fe fydd goleuadau allanol newydd yn cael eu gosod hefyd.

Dywedodd yr adroddiad bod proses brisio wedi ei chwblhau, a bod adran ystadau Heddlu Dyfed-Powys wedi cymeradwyo rhoi'r cytundeb gwerth £483,110 i gwmni contractwyr yn Abertawe, ynghyd â 15% wrth gefn os bydd angen, fyddai'n dod â'r cyfanswm i £555,576.

Cafodd y cytundeb ei gymeradwyo gan Mr Llywelyn.

Dywedodd wrth y panel ei fod ef a'i bennaeth cyllid yn adolygu unrhyw wariant gan y llu sydd yn uwch na throthwy penodol.

Wrth ateb cwestiwn y Cynghorydd Evans, dywedodd y Comisiynydd Plaid Cymru bod popeth wedi ei wneud o fewn fframweithiau llywodraethu, a bod moderneiddio'r systemau goleuo yn golygu "cost sylweddol".

Dywedodd cadeirydd lleyg y panel, Ian Roffe, bod y ganolfan gydlynu, yn ei farn ef, yr adeilad gwerth am arian cyhoeddus gorau i gael ei adeiladu yng Nghymru - nes iddo weld y gost o ailosod y goleuadau.

"Dwi'n meddwl ei fod yn drawiadol o uchel," meddai.

Wrth ymateb dywedodd y Comisynydd bod y buddsoddiad yn "uwchraddiad hanfodol i adnodd plismona allweddol, gyda'r system oleuadau bresennol wedi mynd yn gynyddol anodd i'w chynnal oherwydd diffyg darnau".

Dywedodd Dafydd Llywelyn hefyd y bydd cael system fwy modern ac effeithiol yn arwain at "leihau allyriadau carbon o oleuadau o dros 8,500kg y flwyddyn, ac arbedion o dros 50% yn y costau goleuo blynyddol."

Ychwanegodd bod y cytundeb wedi ei ddyfarnu yn dilyn proses gystadleuol a thrylwyr i sicrhau gwerth am arian, gyda'r cynllun meddai yn "cyd-fynd â'n hymrwymiad i gynaliadwyedd a dad-garboneiddio ar draws plismona yng Nghymru."

"Mae hyn ynglŷn â buddsoddi yn gyfrifol yn ein hisadeiledd fel ei fod yn parhau yn addas i bwrpas, yn effeithiol ac yn gynaliadwy i'r dyfodol."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.