'Dwi'n gynnyrch yr Urdd mewn cymaint o ffyrdd' - Rhun ap Iorwerth

Prif Weinidog newydd Cymru, Rhun ap Iorwerth yw Llywydd y Dydd ar faes yr Eisteddfod ddydd Mawrth.

Roedd yr Urdd wedi trefnu y byddai'n llywydd ymhell cyn yr etholiad.

Wrth siarad â Cymru Fyw ar y maes, dywedodd fod yr "Urdd yn ganolog i'n bywyd ni fel cenedl, a drwy esblygu mae o'n sicrhau ei fod yn cario 'mlaen i wneud hynny".

Mae eisoes wedi bod yn troedio'r maes ddydd Sul wrth iddo ddod i wylio ei dad, Edward Morus Jones yn cael ei anrhydeddu fel un o lywyddion anrhydeddus yr Urdd.

"Mae'n gymaint o anrhydedd yn gyntaf i fod mewn Eisteddfod dan haul fel hyn yn fy milltir sgwâr fy hun," meddai.

"Ma' cael bod yma fel prif weinidog a gweld yr Urdd ar eu gorau ac wedi cael yr anrhydedd rhyfeddol 'ma o fod yn llywydd y dydd, mae'n ddiwrnod sbesial i mi.

"Mae'n anodd rhestru gymaint o ffyrdd oedd yr Urdd yn rhan o'm mywyd i, pry'n ai'n cystadlu yn Eisteddfod yr Urdd yn hogyn bach, neu fynd i Glan-llyn, neu Langrannog neu Theatr Genedlaethol yr Urdd, siarad cyhoeddus - cymaint o bethau.

"Ac fel cannoedd o filoedd o blant, dwi'n gynnyrch yr Urdd mewn cymaint o ffyrdd, a dwi'n cael yr anrhydedd heddiw o fod yn llywydd y dydd, ond mewn gwirionedd dwi jyst eisiau dweud diolch yn fawr iawn i'r Urdd am yr holl gyfleoedd."

Pan gafodd ei holi sut mae'n gweld yr Urdd fel mudiad yn esblygu yn y blynyddoedd i ddod, dywedodd ei bod yn "ddiddorol gwylio'r Urdd yn newid ac yn esblygu ac yn cryfhau.

"Ma' Eisteddfod yr Urdd yn newid bob blwyddyn - newidiadau mawr eleni - a dyna sy'n ei gadw fo fel mudiad yn ffres.

"Mae'r llywodraeth dwi'n ei harwain yn benderfynol o weithio gyda'r Urdd ym mhob ffordd 'da ni'n gallu er mwyn cefnogi'r esblygiad yna, noddi nifer o fentrau yma sy'n digwydd am y tro cyntaf eleni - yr Ystafell Athrawon er enghraifft.

"Mae'r Urdd yn ganolog i'n bywyd ni fel cenedl, a drwy esblygu mae o'n sicrhau ei fod yn cario 'mlaen i wneud hynny."

Cafodd Rhun ap Iorwerth ei ethol yn Brif Weinidog Cymru wedi pleidlais yng nghyfarfod cyntaf y Senedd ar ôl yr etholiad ar 7 Mai.

Rhun ap Iorwerth yw seithfed prif weinidog Cymru, a'r cyntaf i beidio bod o'r blaid Lafur.

Ef hefyd yw'r prif weinidog cyntaf i gynrychioli etholaeth yn y gogledd, ar ôl cael ei ethol i gynrychioli Bangor Conwy Môn ddechrau'r mis.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.