Жаҳон чемпионати-2026. Ярим финал, Тошкентдан муносабат: Франция-Испания, Англия-Аргентина – ўзбекистонликлар ҳозир кимга ишқибозлик қилишмоқда?

Бу йил ҳам ярим финалга бирор бир Осиё қитъаси вакили чиқа олмади. Ўзбекистон ҳам ўзи дебют қилган бу йилги жаҳон биринчилигининг гуруҳ босқичидан ортга қайтди. Аммо Ўзбекистонда ярим финалга чиққан ҳар тўрт миллий терма жамоанинг мухлислари озмунча эмас...

Франция-Испания

Бу йил финал йўлланмаси учун курашувчи ҳар тўрт миллий терма жамоанинг мухлислари Ўзбекистонда ҳам озмунча эмас.

Йилларки, тўрттовлон ҳам ўзининг футболи ва юлдуз футболчилари билан уларнинг эътиборини ўзига тортиб келади.

Бунинг учун Ўзбекистондаги кўплаб футбол нашрларию ижтимоий тармоқларга кўз ташлашнинг ўзи кифоя.

Ҳар тўрт миллий терма жамоа ҳам бунгача жаҳон чемпионлиги таъмини татиб бўлишган.

Ярим финал беллашувларини Франция ва Испания бошлаб беради.

Бу икковлон ҳам Европанинг энг кучли миллий терма жамоалари сирасига киришади.

Илк финалчини аниқлаб берувчи ўйин бугун, Тошкент вақти билан тунги соат 24:00 да старт олади.

Бу икки миллий терма жамоа ҳам аввалбошдан жаҳон чемпионлигига асосий фаворитлар қаторида кўрилишган.

Ўзбекистон миллий терма жамоасининг сара ўйинчиларидан бири бўлган Абдуқодир Ҳусанов ўз вақтида Францияда тўп сурган.

Ўшанда унинг Франциянинг Лига 1 ида ўйнаган биринчи Ўзбек футболчиси экани айтилган.

Франция яна айрим сара клубларию юлдуз футболчилари билан ҳам ўзбекистонлик футбол ишқибозлари кўнгилларидан яхшигина жой олган.

Испаниянинг забардаст "Реал"и ва "Барселона"си эса кўплаб ўзбекистонлик футбол мухлислари ўзаро рақобатда ашаддий ишқибозлик қилиб келаётган дунёнинг топ футбол клублари сирасига киришади.

Лионел Месси бўладими ёки бошқа, ўз вақтида Барсанинг манаман, деган юлдузлари ҳам пойтахт Тошкентда бўлиб қайтишган.

Дунёнинг энг совриндор ва номдор футболчиларидан бири сифатида эътироф этилувчи Криштиану Роналду мисолида "Реал"ники ҳам.

Ўзбекистон ўзининг гуруҳ босқич беллашувларида ўзининг тарихида илк бор Роналду сардорлик қилган Португалияга қарши ҳам тўп сурган.

Англия-Аргентина

Англия ва Аргентина эса эртага, худди шу вақтда финал йўлланмаси учун майдонга тушишади.

Кучли лигаси бўладими, топ клублари ёки дунёни тан олдирган юлдуз футболчилари - бу икки давлат футболи ҳам Ўзбекистонда кучли қўлловга эга.

Айниқса, худди Криштиану Роналду каби, Лионел Мессининг ҳам ўзбекистонлик футбол мухлислари ўнгида, қалбида ўрни бўлакча.

Футбол аҳли орасида бу икки миллий терма жамоа узоқ йиллик ашаддий рақиблар саналишади.

Дейлик, бундан 40 йил бурун афсонавий Марадона шов-шувли зиддиятли голи билан Англияни ярим финалга чиқиш имкониятдан мосуво этган.

Кейинчалик Марадонанинг ўзи бу голни "Худонинг қўли", деб ҳам атаган.

Унинг қирқ йиллик тўпи ҳозир ҳам футбол оламида гап бўлиб келади.

"Манчестер Юнайтед" бўладими, "Сити"си, "Арсенал"ми, "Ливерпул" ёки "Челси" – Ўзбекистонда Англия топ клублари мухлисларининг сонлари ҳам бисёр.

Бундан ташқари, Абдуқодир Ҳусанов ҳам ҳозир сара инглиз клубларидан бири бўлган "Манчестер Сити"да ўйнайди.

У дунёдаги энг кучлиларидан бири сифатида кўрилувчи Англия премьерлигасида тўп сураётган ягона Ўзбек футболчиси бўлади.

Амалдаги жаҳон чемпиони бўлган Аргентина миллий терма жамоасига эса айнан Лионел Месси сардорлик қилади.

Аргентина сўнгги тўрт жаҳон чемпионати мисолида учинчи бор ярим финалда тўп суриши.

Бу йилги жаҳон чемпионатида ҳам ғолибликка энг асосий даъвогарлардан.

Англия миллий терма жамоаси сўнгги бор 1966 йилда жаҳон чемпионлигини қўлга киритган, холос.

Бу йилги жаҳон чемпионатига Осиё қитъасидан рекорд сонда – жами 9 миллий терма жамоа чиққан.

Аммо улардан бирортаси чорак финалга етмай, биринчилик билан хайрлашган.

Уларнинг орасидан энг яхши натижа қайд этган Япония ва Австралия ҳам фақат плей-офф босқичигача кўтарила олган, холос.

Жаҳон чемпионатидаги дебют иштирокини гуруҳ босқичи билан якунлаган эса-да, Ўзбекистон миллий терма жамоаси матонатли ўйин намойиш этган.

Ўзининг тарихий ютуғи ва кўрсатган ўйини билан минтақада ҳам мислсиз қўлловга эга бўлган, биринчиликдаги иштироки халқаро миқёсда ҳам акс-садо берганди.

BBC O'zbek хизмати ҳал қилувчи ярим финал учрашувлари олдидан Ўзбекистондаги кайфият билан қизиқди:

Тахминлар тўғри чиқдими?

Аброр Имомхўжаев: Дарҳақиқат, ҳаш-паш дегунча мундиал якунига яқинлашиб қолдик.

Аниқроқ айтадиган бўлсак, жаҳон чемпионатида 100 та ўйин ўтказиб бўлинди ва фақат тўртта учрашув қолди.

Мен дастурларингизда чемпионат бошланишидан аввал ғолиблик учун олти миллий терма жамоа кураш олиб боришини тахмин қилган эдим.

Булар Аргентина, Бразилия, Франция, Испания, Англия ва Германия.

Кутилмаганда Германия 1/16 босқичида Парагвайга пеналтилар сериясида мағлуб бўлиб, мусобақани барвақт тарк этди.

Кейинги дастурингизда мен мундиал тарихида хорижий мураббий миллий терма жамоани жаҳон чемпиони қила олмагани борасидаги маълумотга таяниб, Анчелотти бошқарувидаги Бразилия ва Тухел бошчилигидаги Англияни ҳам ғолиблик сафидан чиқарган эдим.

Бразилия ростдан ҳам 1/8 босқичида Норвегияга мағлуб бўлиб, турнирни тарк этди.

Шу жиҳатдан олиб қараганда, ярим финалчиларнинг деярли барчаси мен тахмин қилган жамоалар бўлиб чиқди.

Лекин, юқорида келтириб ўтган омилимга кўра, Англия хорижий мураббий билан чемпион бўлмаслиги керак.

Қолган барча тахминларим тўғри.

Ўзбекистондаги мухлислик

Аброр Имомхўжаев: Ўзбекистондаги мухлисликка тўхталадиган бўлсак, бу борада деярли тенгликни кузатишимиз мумкин.

Фақатгина Месси фанатлари ҳисобига Аргентинада бироз устунлик бўлиши мумкин.

"Барселона" ва "Реал" мухлислари Испанияга ишқибозлик қилишса, Дембеле, Мбаппе, Дуэ ва Олеси ўйинларидан завқланаётган томошабинлар ҳам кўпчиликни ташкил этади.

Финалчилар ким бўлади?

Аброр Имомхўжаев: Финалга кимлар чиқиши борасида тахмин қилиш қийин.

Иккала ярим финал ҳам муросасиз ва кескин ўтишига шубҳа йўқ.

Бугун бўлиб ўтадиган Франция-Испания тўқнашувида мен негадир Испания ғалаба қозонади, деб тахмин қилаяпман.

Шу пайтгача Францияда ҳужум, Испанияда эса ҳимоя чизиғи кучли кўринди.

Бугун ҳам шундай бўлиши эҳтимолга яқин. Лекин якунида тартиб маҳоратдан устун келиб, Испания финалга йўл олиши эҳтимоли кўпроқ.

Эртанги Англия-Аргентина баҳсида эҳтиёткорлик биринчи планга чиқади. Ва ким кам хато қилса, якунида ўша ғалаба қозонади.

Менимча, бу борада устунлик аргентиналиклар томонида.

Лекин, битта фактор борки, ундан кўз юмиб бўлмайди. Бу – Месси фактори.

Агар Мессининг кайфияти зўр бўлса, у бутун жамоани ғалаба сари ундайди.

Бирор сабабга кўра, унинг кайфияти бузилса ёки у жароҳат сабаб, майдонни тарк этса, унда аргентиналиклар, таъбир жоиз, бошсиз чавандозга айланиб қолишлари мумкин.

Менинг тахминларим ҳозирча шундай.