Жаҳон чемпионати-2026: Ўзбекистон билан ўйин тугади, Колумбия 'K' гуруҳининг яққол пешқадамига айланди. Видео

Португалия ва Ўзбекистон ўйини тугади.

Португалия учрашувни ҳужумкор ўйин билан бошлади.

Бу дастлабки дақиқалардаёқ ўзининг самарасини бермай қолмади.

Португалия сардори Криштиану Роналду 6-дақиқадаёқ ўйинда ҳисобни очди.

Ҳозирча ҳисоб Португалия 1-0 Ўзбекистон.

Ўзбекистонга қарши тўпи билан Криштиану Роналду олти жаҳон чемпионатида гол урган тарихдаги биринчи футболчига айланди.

Бу унинг жаҳон чемпионатидаги тўққизинчи голи бўлди.

Португалия устма-уст ҳужум уюштиришнинг уддасидан чиқмоқда.

Шу дақиқаларда, учрашувнинг 17-дақиқасида Португалия ҳисобда янада олдинга чиқиб олди.

Нуну Мендеш Португалиянинг иккинчи тўпи муаллифига айланди.

Ўзбекистоннинг рақиб ҳимоясини ёриб ўтиш уринишлари ҳозирча ўзининг самарасини бергани йўқ.

Учрашувнинг 1-қисми ярмидан ўтиб бормоқда.

Худди шу дақиқаларда Ўзбекистон ҳисобни қисқартиришнинг уддасидан чиққандек бўлди.

Аммо биринчи бўлимнинг 29-дақиқасида ўзи дебют қилаётган жаҳон чемпионатида киритган иккинчи тўпи VAR дан кейин ҳакам томонидан бекор қилинди.

Ҳакам ўйинда Аббосбек Файзуллаев томонидан қоидабузарлик қилинган, деб топди.

Учрашув биринчи қисмининг сўнгги дақиқаларида Ўзбекистон ўйинда фаоллашди.

Аммо худди шу дақиқаларда қарши ҳужумга ўтган Португалия ўйинда ҳисобни 3:0 га етказди.

Криштиану Роналду битта ўйинда қўшалоқ тўп муаллифига айланди.

"К" гуруҳидан кейинги босқичга чиқишда эса ҳар бир миллий терма жамоа учун тўплар нисбатидаги фарқ муҳим.

Бу Ўзбекистоннинг жаҳон чемпионатидаги илк, Португалиянинг эса тўққизинчи иштироки ва кетма-кет еттинчи марта жаҳон чемпионлиги учун кураши.

Ҳакам ўйиннинг биринчи бўлимига 5 дақиқа қўшиб берди.

Ўзбекистоннинг биринчи бўлимнинг якунида ҳужум уюштириш уринишлари самара бермади.

Шу дақиқаларда Криштиану Роналдунинг ҳисобни 4:0 га етказиш ҳаракати Абдуқодир Ҳусанов томонидан чиппакка чиқарилди.

Аммо Португалия тарихий натижа қайд этди, бир жаҳон чемпионатида ўйиннинг биринчи бўлимида бирваракайига учта тўп уришнинг уддасидан чиқди.

Ўйиннинг биринчи бўлими ўз ниҳоясига етди. Ўйинда танаффус.

Пойтахт Тошкентда Португалия-Ўзбекистон ўйинига ишқибозлик. Сурат шу дақиқаларда "Хумо" аренасида олинган:

2-бўлим бошланди

Ҳар икки жамоа ҳам иккинчи бўлимни сафларида ўзгаришлар билан бошлади.

Португалия иккинчи бўлимнинг дастлабки дақиқалариданоқ яна ҳужумга ўтди.

Аммо Ўзбекистон дарвозасини нишонга олиш уриниши бесамар якунланди.

Шу дақиқаларда Аббосбек Файзуллаев Португалия дарвозасини нишонга олишга уринди, амма самарасиз.

Португалия гуруҳ босқич саралаш беллашувларининг 1-тур учрашувида Конго билан дуранг ўйнаган, Ўзбекистон эса Колумбияга ютқазган.

Португалия 3-0 Ўзбекистон, учрашувнинг иккинчи бўлими ўзининг 60-дақиқасига кириб бормоқда.

Ўзбекистон худди шу дақиқаларда Криштиану Роналдунинг ҳисобни 4:0 га етказиш уринишини чипакка чиқди.

Аммо орадан қисқа вақт ўтмаёқ, Португалия янада олдинга чиқиб олди, автогол.

Ўйин давом этаркан, бу "К" гуруҳида қайд этилган энг йирик ҳисоб бўлиб турибди.

Ўзбекистон миллий терма жамоасида ҳозир ҳам кейинги босқичга чиқиш имконияти бор, аммо бунинг учун сўнгги ўйинда Конгони енгиши шарт.

Шу дақиқаларда Криштиану Роналду устма-уст Ўзбекистон дарвозасини забт этиш, хэт-трик қилишга уриниб кўрди, аммо бунга муваффақ бўлмади.

Ҳозирча Аргентина миллий терма жамоаси сардори Лионел Месси бу галги жаҳон чемпионатида хэт-трик қайд этган ягона футболчи бўлиб турибди.

Португалия-Ўзбекистон, учрашув якунланишига 15 дақиқадан кўпроқ вақт қолди.

Шу дақиқаларда Аббосбек Файзуллаев ўрнига Игор Сергеев майдонга тушди.

Терма жамоа сардори Элдор Шомуродовнинг Португалия дарвозасини забт этиш уриниши эса самара бермади.

Учрашув тугашига саноқли дақиқалар қолмоқда.

Ўзбекистонлик мухлисларнинг ишқибозликлари эса англиялик футбол шарҳловчиларининг ҳам диққатини тортмай қолмади.

Худди шу дақиқаларда Португалия ҳисобни 5:0 га етказди.

Португалиянинг 5-тўпини Рафаэл Леао ўзининг ҳисобига ёзди.

Бешта тўпидан учтасини Португалия биринчи бўлимда киритишга муваффақ бўлди.

Ҳисобидаги тўплар нисбати билан "К" гуруҳининг якка пешқадамига айланди.

Американинг "Ҳюстон" стадионидаги ўйин эса ўзининг поёнига етиб бормоқда.

Ҳакам ўйинга 4 дақиқа қўшиб берди.

Ҳар икки миллий терма жамоа учун муҳим бўлган учрашувнинг сўнгги дақиқасида ҳам Криштиану Роналду хэт-трик қилишга уриниб кўрди, аммо сўнгги уриниши ҳам чиппакка чиқди.

Гуруҳнинг Колумбия ва Конго иштирокидаги иккинчи учрашуви эса шу соатларда поёнига етди.

Бу ўйинда ҳам Колумбия Конгони енгди: 1-0, ўзи учун навбатдаги муҳим 3 очкони қўлга киритди, ҳисобидаги 6 очко билан "К" гуруҳининг яққол пешқадамига айланди, ўзи учун кейинги босқичга чиқиш вазифасини ҳал қилди, гуруҳ босқич ўйинларида кетма-кет ғалаба қайд этган ягона жамоага айланди.

Колумбия гуруҳдаги сўнгги учрашувини Португалияга қарши ўйнайди. Португалия ҳисобида ҳозирча 4 очко бор, аммо гуруҳнинг энг тўпурар жамоаси бўлиб турибди.

Сўнгги - учинчи тур беллашувлари олдидан қолган Ўзбекистон илова "К" гуруҳидаги қолган уч терма жамоа кейинги босқичга чиқиш имкониятини сақлаб турибди.

Муҳим ўйин

Португалия ва Ўзбекистон шу пайтгача ҳеч қачон бир-бирига қарши тўп сурмаган.

Ўзбекистон президенти ҳозир Наманганда эканига қарамай, жамоанинг бугунги ўйинини ҳам кўрмоқчи.

Шу соатларда олинган хабарларга кўра, Шавкат Мирзиёев журналистларга учрашувни кутаётганлигини айтган.

Ўзбекистон раҳбари, "нима бўлади, деб бугун ҳам уйқуси келмаётгани"ни ҳам яширмаган.

"Барибир, биринчи ғалабамиз, байроғимиз ҳилпирагани бу - Ватанимизнинг дунё ҳамжамияти билан теппа-тенглигидан далолат", деган.

Ҳар икки миллий терма жамоа учун ҳам бирдек муҳим бўлган учрашув Тошкент вақти билан кечки соат 22:00 да бошланди.

Ўзбекистон президенти жамоанинг Колумбияга қарши илк ўйинини ҳам назардан қочирмаган.

Расмий хабарларда Шавкат Мирзиёевнинг ушбу тарихий учрашувни пойтахт Тошкентда, оиласи билан бирга кўргани айтилган.

Ўзбекистон муросасиз кечган ўйинда Колумбияга ўйинни 1:3 ҳисобида бой берган бўлса-да, ўзининг илк иштирокидаёқ жаҳон чемпионатидаги биринчи голини урган.

Шавкат Мирзиёев ўйиндан кейин бу голни ҳам ўзлари учун "ғалаба"га қиёс берган.

Ўзбекистон президентининг Португалия-Ўзбекистон ўйинини қаерда, қандай томоша қилиши, Наманганда яна қанча бўлиши ҳозирча маълум эмас.

Аммо расмий хабарларда Шавкат Мирзиёевнинг Наманганда экан, жойларда олиб борилаётган бунёдкорлик ишлари ҳамда турли соҳаларда амалга оширилаётган лойиҳалар ва жорий қилинган илғор ечимлар билан танишиши айтилган.

Шунингдек, Ўзбекистон президентининг яна Халқаро мақом фестивалининг очилиш маросимида иштирок этиши ҳам режалаштирилгани билдирилган.

Шу соатларда Ўзбекистон ва ўйин бўлиб ўтажак ҳаммезбон Америка Қўшма Штатлари қолиб, дунёнинг турли давлатларида миллий терма жамоага ишқибозликни бошлаб юборганларга оид видеолар ҳам ижтимоий тармоқларда тарқала бошлаган.

Шавкат Мирзиёев Португалия ва Конгога қарши гуруҳдаги сўнгги икки учрашуви олдидан Ўзбекистон миллий терма жамоасига аллақачон омад тилаб бўлган.

Ўзбекистон президентининг тилаги Тошкент яқинда мезбонлик қилган йирик Халқаро Инвестиция форуми чоғида янграган ва жаҳон чемпионатининг мамлакат учун аҳамиятига далолат қилувчи яна бир кучли омил ўлароқ кўпчиликнинг диққатини ўзига тортган.

Португалия-Ўзбекистон учрашуви минтақада ҳам катта қизиқишларга сабаб бўлган.

Бу ўйинни кўриш учун махсус тадбирларга қўл урилаётганига оид хабарлар ҳам олинган.

Футбол бўйича Ўзбекистон миллий терма жамоасининг жаҳон чемпионатига чиқиши бутун минтақада акс-садо берган.

Жамоага минтақа бир бўлиб, баҳамжиҳат ишқибозлик қилаётгани, ҳатто, алоҳида таҳлилталаб ҳолат, воқеага ҳам айланган.

"Олға, Ўзбекистон" - президент Мирзиёев терма жамоага омад тилади - видеони кўриш учун илова қилинган линкни босинг.

Ўзбекистондан "фахр"дами?

Ўзбекистондан бутун дунё Ўзбеклари 'фахрда"ми?

Ўзи ҳам футболчи бўлган афғонистонлик Ўзбек Абдул Босит Бенаво худди ана шундай фикрда.

'Биз Ўзбекистонни қўллаймиз. Яшасин, Ўзбекистон миллий терма жамоаси', - дейди ҳозир Норвегияда бўлган футболчи.

Абдул Босит нима қилса, Ўзбекистон миллий терма жамоаси Португалияга қарши яхши натижа қайд этишини ҳам айтади.

Афғонистон Ўзбекистондан кейин дунёнинг Ўзбеклар энг кўп яшовчи иккинчи давлати бўлади.

Видеони кўриш учун илова қилинган линкни босинг:

Ўйинни минтақа ҳам кўряпти

Қирғизистондан олинган расмий хабарларга кўра, Бишкекда Португалия ва Ўзбекистон ўртасидаги футбол учрашувини онлайн томоша қилиш учун фан-зона ташкил этилади.

Бишкек шаҳридаги ўйиннинг жонли трансляцияси намойиш этилади.

Бу ҳақда Бишкек шаҳар ҳокимлиги маълум қилган.

Айтилишича, шаҳарда катта экран ўрнатилади ва исталган мухлислар ўйинни биргаликда томоша қилиб, байрамона муҳитда жамоаларни қўллаб-қувватлаш имконига эга бўлади.

Соат 21:20 да қирғиз эстрадаси юлдузлари иштирокида кўнгилочар дастур бошланади.

Соат 22:00 дан 23:00 гача ўйин олдидан таҳлил ва шарҳлар билан жонли эфир намойиш этилади.

Расмий хабарларга кўра, шаҳар ҳокимлиги пойтахт аҳолиси ва меҳмонларини мазкур тадбирда иштирок этишга, кечани яқинлари даврасида ўтказиб, катта футбол муҳитидан баҳраманд бўлишга чақирган.

Тадбир муносабати билан айрим кўча ва чорраҳаларда, ҳатто, автотранспорт ҳаракати вақтинча чекланиши ҳам айтилган.

Муҳим ўйин

Икки рақиб терма жамоа илк бор жаҳон чемпионати доирасида бир-бирига қарши майдонга тушади.

Португалия ва Ўзбекистон иштирокидаги "К" гуруҳи саралаш босқич беллашувларининг 2-тур учрашуви эртага, 23 июн куни Америка Қўшма Штатларида бўлиб ўтади.

Бу ўйин натижаси ҳар икки миллий терма жамоа учун бирдек муҳим.

Гуруҳ фаворити сифатида кўрилган Португалия 1-тур учрашувида Конго билан дуранг ўйнаган.

Бу йилги жаҳон чемпионатининг тўртта дебьютантидан биттаси бўлган Ўзбекистон эса, илк ўйинини Колумбияга ютқазган.

2-тур учрашувлари арафасида гуруҳдаги ҳар тўрт жамоа ҳам кейинги босқичга чиқиш имконини сақлаб турибди.

Янги тартиб-қоидаларга мувофиқ, бундан ташқари, бу йилги жаҳон чемпионатида ўз гуруҳида энг яхши натижа билан учинчи ўринни эгаллаган 8 миллий терма жамоа ҳам жаҳон чемпионлиги учун курашини давом эттира олади.

Ўзбекистон тушган худди шу гуруҳ кўпчилик футбол мутахассислари томонидан "Ўлим", яъни энг оғир гуруҳлардан бирига ҳам қиёс берилган.

Ўзи илк бор иштирок этаётган жаҳон чемпионатининг янги сенсациясига айланиши учун эса Ўзбекистон қолган икки учрашувида мағлуб бўлмаслиги керак.

Ўзбекистон Колумбияга қарши биринчи учрашувида матонатли ўйин кўрсатган ва илк ўйинидаёқ жаҳон чемпионатидаги дастлабки тўпини киритишга муваффақ бўлган.

Биринчилик арафасида ўзининг тартибли, интизомли ҳимояси билан мақталган Ўзбекистон миллий терма жамоаси худди шу учрашуви мисолида ўзининг ҳужумкор ўйин кўрсатишга ҳам қодирлигини кўрсатган.

Португалиянинг Конгога қарши ўйини ва унда қайд этган натижаси эса, ўзбекистонлик футбол ишқибозларида кейинги босқичга чиқиш умидини янада кучайтирмай қолмаган.

Ўзбекистон Бош мураббийси Фабио Каннаваро эса, футболчи эканида, Италия миллий терма жамоаси билан бирга Португалияни уч бор мағлуб этган.

Ўзбекистоннинг гуруҳдаги сўнгги икки муҳим учрашувига мезбонлик қилаётган АҚШ эса дунёнинг ўзбекистонликлар кўп давлатларидан бири бўлади.

Ижтимоий тармоқлардаги видеолари эса, чипта ва АҚШ визаси билан боғлиқ муаммоларга қарамай, миллий терма жамоанинг ўйинини стадионнинг ўзидан томоша қилиш иштиёқидаги ўзбекистонликлар сони кам эмаслигига далолат қилади.

Шу кунларда Ўзбекистондан борган мухлисларга АҚШда яшаётган айрим ўзбекистонликларнинг дошқозонда ўнлаб кило палов қилиб бергани ҳам ижтимоий тармоқларда кўпчиликнинг эътиборини ўзига тортган.

Америкада Ўзбекистондан борган мухлислар учун ош - бунақаси бўлмаган. Видеони кўриш учун илова қилинган линкка киринг.

Бўлажак рақиб

Португалия Европа ва жаҳоннинг энг кўзга кўринган жамоалари сирасига киради.

Жорий пайтда ФИФА рейтингида юқори ўнликдан жой олиб турибди.

Футбол бўйича жаҳон чемпионатининг узоқ йиллик иштирокчиларидан бири.

Бу галгиси жамоанинг биринчиликдаги тўққизинчи иштироки.

Криштиану Роналду каби сафларида юлдуз футболчилари кам эмас.

Европанинг топ клубларида тўп сураётган ўйинчилари кўп.

Аммо Португалия ҳалича бирор марта жаҳон чемпионлигини қўлга кирита олмаган.

Бир бор биринчиликнинг ярим ва яна бир марта чорак финалларига чиққан.

Орада яна учинчи ва тўртинчи ўринларни ҳам эгаллаган.

Дунёнинг энг номдор ва совриндор футболчиларидан бири бўлган Португалия миллий терма жамоаси сардори Криштиану Роналду эса ўзбекистонлик футбол ишқибозларига бевосита таниш.

Юлдуз футболчи 2000 йилда Тошкентга келган, унинг ўшанда Ўзбекистон пойтахтида берган маҳорат дарслари ўзига минглаб одамни жалб қилгани, 8 минг кишилик "ЖАР" стадиони одамлар билан "тўлиб-тошиб" кетгани ҳам хабар берилган.

Криштиану Роналду Англиянинг "Манчестер Юнайтед", Испаниянинг "Реал"ида тўп сурган пайтларида ҳам Ўзбекистонда ўзига озмунча мухлис орттирмаган.

Португалияга қарши эртанги учрашув шуниси билан ҳам аллақачон Ўзбекистонда узоқ кутилган ва тарихийларидан бири сифатида баҳо топиб улгурган.

Англиянинг бойвачча "Манчестер Сити"сида тўп сурувчи Абдуқодир Ҳусанов эса, Ўзбекистон миллий терма жамоасига бўлган қизиқишни янада кучайтирган.

Жамоа сафларида Италия ва Россиянинг айрим номдор клубларида тўп суриб кетган Элдор Шомуродов ва Аббосбек Файзуллаев каби сара ўйинчилари ҳам бор.

Ўзбекистоннинг жаҳон чемпионатидаги ўйинлари пойтахт Тошкентда катта экранлар орқали ҳам олиб узатилади, ўндан ортиқ расмий фан-зоналаригача ташкил қилинган.

Энг асосий ва энг катта майдон сифатида "Бунёдкор" стадиони танланган, у бир вақтнинг ўзида 10 мингга яқин мухлисни сиғдира олади.

Португалияга қарши эртанги ўйин Тошкент вақти билан кечки соат 22:00 да бошланади.

Бугун, 22 июн куни эса, Португалия-Ўзбекистон ўйини куни Тошкент метроси иш вақти узайтирилишига оид хабарлар ҳам олинган.

Футбол мухлислари учрашувдан сўнг ўз манзилларига хавфсиз, тезкор етиб боришлари учун 23 июнда метрополитен тунги соат 01:00 гача ишлаши айтилган.

Ўзбекистон зўр ўйнадими - видеони кўриш учун илова қилинган линкка киринг.

Тошкентда кайфият қандай?

Алибек Бейжанов,

Тошкент, BBC

Ўзбекистоннинг жаҳон чемпионатидаги энг асосий ўйини сифатида кўрилаётган Португалия билан учрашув олдидан ўзбекистонлик футбол мухлислари кучли ҳаяжонда.

Суперюлдуз Роналду кўпчилик ўзбекистонликларнинг севимли юлдузи бўлса-да, улар Ватан жамоасининг ғалабасига ёки дуранг ўйиндан умид қилмоқда.

BBC билан гаплашган футбол ихлосманди Умар Ўзбекистон-Португалия ўйинига ҳали бир кун қолган бўлса-да, ҳозирданоқ бутун вужуди билан ҳаяжонда эканини айтади.

"1:0 ҳисобида ютамиз, Роналду учун ачинарли бўлади, лекин Худо хоҳласа, ютамиз", – дейди у.

Яна бир футбол мухлиси Илҳом эса эртанги ўйин қийин бўлишини тахмин қиляпти.

"Эртага стадионда ҳар бир сантиметр учун кураш бўлади. Жамоамиздан ғалаба кутамиз", – дейди Илҳом.

Яна бир футбол ихлосманди Ислом эса Ўзбекистон терма жамоасининг ғалабасини ёки дуранг натижани хоҳласа-да, Португалия кучли жамоа эканини, ўзи хоҳлаётган натижага эришиш эҳтимоли паст эканини тан олади.

Мамлакат бўйлаб миллионлаб мухлислар ўз уйларида, стадионлар, ресторанлар, парклар ва ҳатто чойхоналарда ҳам экранга кўз тикишади.

Тошкент қандай тайёргарлик кўрмоқда?

Видеони кўриш учун илова қилинган линкни босинг.

Умидлар ва тилаклар

Расмий хабарларга кўра, жамоанинг ўйинларини пойтахт Тошкентдан туриб шахсан Ўзбекистон президентининг ўзи ҳам кузатиб бормоқда.

Колумбияга қарши мағлубиятли ўйиндан кейин президент Шавкат Мирзиёев Халқаро Инвестиция форумида эканига қарамай, жамоанинг руҳини кўтариб чиққан.

Ўзбекистон президенти футболчилар жуда катта тажрибали жамоага қарши кучли характерини кўрсатганини таъкидлаган.

"Биринчи жаҳон чемпионатидаги биринчи голлари ҳам ўзлари учун ғалаба" эканини айтган.

Шавкат Мирзиёев уларни "ватанпарвар, фидойи ва Ўзбекистоннинг ҳақиқий қаҳрамонлари", деб атаган, бўлажак ўйинлари олдидан омад тилаган.

"Фарзандларим, қаҳрамонларим кўп нарсага қодир эканликларини ҳам билдиришди. Шунинг учун ҳам фақат омад тилаймиз биз. Олға, Ўзбекистон", - дея ўзининг сўзларига якун ясаган.

Ўзбекистонгача қолган бирор бир Марказий Осиё давлати футбол бўйича жаҳон чемпионатига чиқа олган эмас.

Ўзбекистон яна бу галги биринчиликда беллашаётган ягона постсовет давлати.

Миллий терма жамоа 1992 йилда футбол бўйича Осиё Ўйинлари ғолиблигини ҳам қўлга киритиб, катта шов-шувга сабаб бўлган.

Осиё Кубоги финал беллашувларининг ҳам доимий иштирокчиси.

Жамоа орада Осиё чемпионатининг ярим финалига чиқиб, қитъанинг тўртта энг кучли жамоасидан биттасига ҳам айланган.

Португалияга қарши муҳим ўйин олдидан Ўзбекистон Футибол Уюшмаси миллий терма жамоа Бош мураббийси билан суҳбатни ҳам эълон қилган.

Фабио Каннаваро ўз суҳбатида, "ҳар бир жамоанинг кучли ва заиф томонлари бўлиши, ўзлари эса уларнинг кучли жиҳатларини имкон қадар чеклаб, заиф томонларидан фойдаланишга интилишлари керак"лигини айтган.

У "ҳамма рақибларни ҳурмат қилишлари ва ўзларига ҳам ҳурмат билан муносабатда бўлишларини исташлари"ни ҳам таъкидлаган.

Миллий терма жамоа Бош мураббийсининг айтишича, "турнир якунида одамлар Ўзбекистонни жаҳон чемпионатида илк бор қатнашаётган, лекин кучли жамоалардан қўрқмайдиган жамоа сифатида эслаб қолишларини истайди".

Ўзбекистон гуруҳдаги сўнгги – учинчи тур учрашувини 28 июн куни Конгога қарши ўтказади.

Футболсеварлик бобида эса Ўзбекистон ҳатто Марказий Осиёнинг "Бразилия"сига қиёс берилган гаплар кўп учрайди.

Видео: Ўзбекистон жаҳон чемпионатининг янги сенсациясига айланадими?

"Катта ютуқ"ми?

Гулжан Турдубоева

Sport.kg портали мутахассиси. Халқаро спорт журналисти:

"Ўзбекистоннинг Португалия билан бир гуруҳда ўйнаши катта ютуқ.

Чунки Португалия таркибида ҳозирги замоннинг энг машҳур футболчиси — Криштиану Роналду бор.

У ўйнаган ўйинларни бутун дунё томоша қилади.

Агар Ўзбекистон терма жамоаси Португалияни мағлуб этса ҳам, енгилса ҳам, демак ўзбек футболчилари жаҳон скаутлари, менежерлари ва футбол мутахассислари назарини ўзига қаратади.

Бу нафақат ўзбек футболчиларига, балки бутун Марказий Осиё футболчиларига ҳам фойда келтиради.

Дунёда бу минтақада ҳам футбол ривожланиб бораётганини билишади, Португалия билан ўйнаганини кўриб, уларга эътибор бериш керак деб ўйлашади. Менежерлар бу ерга келади.

"Жанубий Корея эффекти" деган тушунча борлигини биламиз.

Аниқ йили эсимда йўқ, Жанубий Корея жаҳон чемпионатида иштирок этганди.

Гуруҳдан чиқолмаса ҳам, яхши ўйнагани учун кейин жаҳон скаутлари у ерга боришган ва Сон Хин Мин каби машҳур футболчилар пайдо бўлган.

Демак, бу имконият Ўзбекистон учун катта ютуқ.

Бу фақат Ўзбекистон учун эмас, балки бутун Марказий Осиё футболининг ривожланишига ҳам катта ҳисса бўлади, деб ўйлайман".