ایورسٹ پر بسا ’خیموں کا شہر‘

آج کل ماؤنٹ ایورسٹ کے بیس کیمپ میں ایک 'خیموں کا شہر' آباد ہے۔ اس موسم بہار میں 375 کوہ پیماؤں اور ان کے گائیڈوں سمیت تقریباً دو ہزار افراد ماؤنٹ ایورسٹ کے بیس کیمپ میں اکٹھے ہوئے ہیں۔

یہ بیس کیمپ ایورسٹ چوٹی کے جنوب میں سطح سمندر سے 5380 میٹر کے بلندی پر واقع ہے۔

چوٹی سر کرنے کے حتمی مرحلے سے پہلے کوہ پیما بیس کیمپ سے اوپر نیچے آتے جاتے رہتے ہیں تاکہ وہ اتنی بلندی پر آکسیجن کی کمی کے عادی ہوجائیں۔

اس سال نیپال کی حکومت نے سروے ڈیپارٹمنٹ کے حکام پر مبنی ایک ٹیم بھی بیس کیمپ بھیجی ہے تاکہ وہ ماؤنٹ ایورسٹ کی اونچائی کی تازہ پیمائش کر سکے۔

اس موسم بہار میں تقریباً 800 کوہ پیماؤں کو نیپال میں 30 مختلف ہمالیہ کی چوٹیاں سر کرنے کی اجازت ملی ہے۔ حکام کے مطابق ہر سال ایورسٹ سر کرنے کی اجازت طلب کرنے والے کوہ پیماؤں میں اضافہ ہو رہا ہے۔

گذشتہ ہفتے جب خلیجِ بنگال میں سمندری طوفان فانی آیا تھا تو اس کے باعث نیپال کے پہاڑوں پر بھی شدید برف باری ہوئی تھی۔ ماؤنٹ ایورسٹ کے بیس کیمپ کے بالائی حصے میں تیز ہواؤں کے باعث بہت سے خیمے بھی اڑ گئے تھے۔

کوہ پیماؤں سے محفوظ مقامات پر جانے کا کہا گیا تھا تا کہ وہ سمندری طوفان کے اثرات سے بچ سکیں۔ تاہم جلد ہی موسم صاف ہو گیا اور کوہ پیما ایک مرتبہ پھر اپنی چڑھائی کے لیے تیاری کرنے میں مصروف ہو گیے۔

تمام تصاویر کے جملہ حقوق محفوظ ہیں۔