மதுராந்தகம், தாராபுரம் இடைத்தேர்தல் வாக்கு எண்ணிக்கை நிலவரம் என்ன? - நேரலை
பட மூலாதாரம், MKStalin/Getty/Edappadi Palanisamy
(இந்தப் பக்கம் தொடர்ந்து புதுப்பிக்கப்படுகிறது.)
தமிழ்நாட்டில் பெரும் அரசியல் எதிர்பார்ப்பை ஏற்படுத்திய மதுராந்தகம் (தனி), தாராபுரம் (தனி) ஆகிய இரண்டு சட்டப்பேரவை தொகுதிக்கான வாக்கு எண்ணிக்கை நடந்து வருகிறது.
புதுச்சேரியில் உள்ள தட்டாஞ்சாவடி தொகுதி இடைத்தேர்தலில் என்.ஆர் காங்கிரஸ் கட்சியின் வேட்பாளர் அஷோக் ஆனந்த் வெற்றி பெற்றுள்ளார்.
தமிழ்நாட்டில் விஜய் தலைமையிலான தமிழக வெற்றிக் கழகம் (தவெக) கூட்டணி ஆட்சி அமைந்த பிறகு நடைபெறும் முதல் இடைத்தேர்தல் என்பதால், இது தவெக அரசின் சுமார் 4 மாத கால ஆட்சிக்கான முக்கிய மதிப்பீடாகப் பார்க்கப்படுகிறது.
தாராபுரம் நிலவரம் - சத்யபாமா முன்னிலை
தாராபுரம் தொகுதியில் 22வது சுற்று முடிவில், தவெக வேட்பாளர் சத்யபாமா 65341 வாக்குகள் பெற்று முன்னிலையில் உள்ளார். அவருக்கு அடுத்தபடியாக, திமுக வேட்பாளர் சுகன்யா 55113 வாக்குகள் பெற்றுள்ளார். இருவரிடையே 10228 வாக்குகள் வித்தியாசம் உள்ளது.
அதிமுக வேட்பாளர் பானுமதி 43594 வாக்குகளைப் பெற்று மூன்றாவது இடத்திற்குத் தள்ளப்பட்டுள்ளார்.
நாம் தமிழர் கட்சி வேட்பாளர் கார்த்திகா 5184 வாக்குகளைப் பெற்றுள்ளார். இந்திய கம்யூனிஸ்ட் கட்சி வேட்பாளர் லட்சுமணன் 1137 வாக்குகள் பெற்றுள்ளார்.
மதுராந்தகம் நிலவரம் என்ன?
மதுராந்தகம் தொகுதியைப் பொறுத்தவரை, 15வது சுற்று முடிவில், 53979 வாக்குகளைப் பெற்று தவெக வேட்பாளர் மரகதம் குமரவேல் முன்னிலையில் உள்ளார். அவரைத் தொடர்ந்து திமுக வேட்பாளர் பரந்தாமன் 38430 வாக்குகளைப் பெற்றுள்ளார். இருவருக்கும் இடையே 15549 வாக்குகள் வித்தியாசம் நிலவுகிறது.
அதிமுக வேட்பாளர் கனிதாசம்பத் 33712 வாக்குகளையும் பெற்றுள்ளனர். நாம் தமிழர் கட்சி வேட்பாளர் ஜானகிராமன் 1,949 வாக்குகள் பெற்றுள்ளார். மார்க்சிஸ்ட் கம்யூனிஸ்ட் கட்சி வேட்பாளர் சுகந்தி 1453 வாக்குகள் பெற்றுள்ளார்.
வாக்கு எண்ணிக்கை தற்காலிக நிறுத்தம்?
மதுராந்தகம் தொகுதி முறப்பாக்கம் பகுதியின் மின்னணு வாக்குப்பதிவு இயந்திரம் ஒன்று சீல் வைக்கப்படாமல், திறந்த நிலையில் இருந்ததாக திமுக தரப்பில் புகார் எழுப்பப்பட்டதைத் தொடர்ந்து, அங்கு வாக்குவாதம் ஏற்பட்டதாகத் தகவல் வெளியாகியுள்ளது.
வாக்குப்பதிவு முடிந்த பிறகு, ஒவ்வொரு வாக்குப்பதிவு இயந்திரமும் முறையாகச் சீல் வைக்கப்பட்டு, அதற்கான விவரங்கள் பதிவு செய்யப்பட்ட பின்னர், 'ஸ்ட்ராங் ரூம்' எனப்படும் பாதுகாப்பு அறைக்குக் கொண்டு செல்லப்படுவது வழக்கம்.
இந்த நிலையில், ஒரு வாக்குப்பதிவு இயந்திரம் திறந்த நிலையில் இருந்ததாகக் கூறி திமுக தரப்பில் புகார் எழுப்பப்பட்டதாகத் தெரிவிக்கப்பட்டுள்ளது.
இதையடுத்து, அப்பகுதியில் வாக்குவாதம் ஏற்பட்டதால் போலீசார் குவிக்கப்பட்டுள்ளனர். வாக்கு எண்ணிக்கையும் தற்காலிகமாக நிறுத்தப்பட்டுள்ளதாக முதற்கட்டத் தகவல்கள் தெரிவிக்கின்றன.
வாக்குகள் பிரிவதால் ஏற்படும் விளைவா?
"கடந்த காலங்களில், மூன்றாவது கட்சி பெரிய அளவிலான வாக்கு வித்தியாசத்தில் பின்தங்கியிருக்கும். ஆனால், இப்போது மூன்று கட்சிகளுமே மிக நெருக்கமான போட்டியில் இருக்கின்றன" என்கிறார் மூத்த பத்திரிகையாளரும் அரசியல் விமர்சகருமான இளங்கோவன் ராஜசேகரன்.
மேலும், "தமிழ்நாட்டில் பெரும்பான்மையான மக்கள், தவெக மீது ஒருவித தயக்கத்துடன்தான் இருக்கிறார்கள். அதன் பிரதிபலிப்பைத்தான் இப்போதைய இடைத்தேர்தல் போக்கு காட்டுகிறது. அதுவும் மிகவும் வலிமையான ஒரு போக்காக இருக்கிறது" என்கிறார் அவர்.
பொதுவாக, "ஆளுங்கட்சி இடைத்தேர்தலில் ஓரளவுக்காவது வெற்றி பெறும் என்று சொல்வார்கள்" எனக் குறிப்பிட்ட இளங்கோவன் ராஜசேகரன், "ஆனால், இந்த இடைத்தேர்தலில் தெரியும் போக்கு இப்படியே தொடர்ந்தால், தவெக வெற்றி பெற்றாலும்கூட, அது அந்தக் கட்சியின் மக்கள் செல்வாக்கைப் பிரதிபலிப்பதாக இருக்காது. மாறாக, தமிழ்நாட்டின் இரண்டு முக்கியக் கட்சிகளின் வாக்குகள் பிரிவதால் ஏற்படும் விளைவாகத்தான் இருக்கும்" என்று தெரிவித்தார்.
பட மூலாதாரம், Ashok Anand/FB
தட்டாஞ்சாவடியில் என்.ஆர். காங்கிரஸ் வெற்றி
மொத்தமுள்ள நான்கு சுற்று வாக்கு எண்ணிக்கை முடிவில், புதுச்சேரியின் தட்டாஞ்சாவடி தொகுதியில் என்.ஆர். காங்கிரஸ் வேட்பாளர் அஷோக் ஆனந்த் 13,358 வாக்குகளுடன் வெற்றி பெற்றுள்ளார்.
அவருக்கு அடுத்தபடியாக, காங்கிரஸ் கட்சியின் வேட்பாளர் விநாயகம் 4,876 வாக்குகளைப் பெற்று இரண்டாவது இடத்திலும், திமுக வேட்பாளர் சேதுசெல்வம் 2,664 வாக்குகளைப் பெற்று மூன்றாவது இடத்தில் இருக்கிறார்.
தேர்தல் முடிவுகளை திமுக எப்படிப் பார்க்கிறது?
"தவெகவுக்கு எதிராக விழுந்துள்ள வாக்குகள் எவ்வளவு, அக்கட்சிக்கு ஆதரவாக விழுந்த வாக்குகள் எவ்வளவு என்பதை இறுதி முடிவுகள் வந்த பிறகுதான் பார்க்க வேண்டும். விஜய்க்கு எதிராக எவ்வளவு வாக்குகள் விழுந்துள்ளன என்பதையும் கணக்கிட்டுப் பார்க்க வேண்டும்" என்று பிபிசி தமிழிடம் பேசிய திமுக அமைப்புச் செயலாளர் ஆர்.எஸ். பாரதி குறிப்பிட்டார்.
இடைத்தேர்தல்களில் பொதுவாக ஆளுங்கட்சிக்குச் சாதகமான போக்கு இருக்கும் எனக் குறிப்பிட்ட அவர், "தமிழகத்தில் இதற்கு முன் நடந்த இடைத்தேர்தல்களிலும் இதுபோன்ற நிலை இருந்துள்ளது. ஆனால், இந்தத் தேர்தலில் பெரிய அளவிலான முன்னிலை இருப்பதாகத் தெரியவில்லை" என்று கூறினார்.
ஏற்கெனவே அந்த வேட்பாளர்கள் அதிமுகவில் இருந்தபோதே மக்களிடம் அறிமுகமானவர்கள்தான் என்றும், அவர்கள் வேட்பாளர்களாக உறுதி செய்யப்பட்டு, இரண்டு மாதங்களுக்கு முன்பே தேர்தல் பணிகளைத் தொடங்கியிருந்தனர் என்றார். அது மட்டுமின்றி, "திமுகவுக்கு மக்கள் மத்தியில் எந்த அளவுக்கு எதிர்ப்பு இருக்கிறது என்பதை இந்த முடிவுகள் மட்டுமே காட்டிவிடாது. இறுதி முடிவுகள் வந்த பிறகு, ஒவ்வொரு கட்சிக்கும் எவ்வளவு வாக்குகள் கிடைத்துள்ளன என்பதைப் பார்த்துதான் மதிப்பிட முடியும்," என்றும் தெரிவித்தார் திமுக அமைப்புச் செயலாளர் ஆர்.எஸ். பாரதி.
அதேபோல, "இந்த இரண்டு தொகுதிகளிலும் பொதுத் தேர்தலில் அதிமுக வெற்றி பெற்றிருந்தது. ஆனால், தற்போது தவெக வெற்றி பெற்றால், அது பல்வேறு சந்தேகங்களை எழுப்பும். வாக்காளர் பட்டியல் சிறப்புத் தீவிரத் திருத்தப் பணியின்போது (எஸ்ஐஆர்) தகுதியுள்ள வாக்காளர்களின் பெயர்கள் நீக்கப்பட்டதாக சமீபத்தில் செய்திகள் வெளியாகின. அதிக எண்ணிக்கையில் வாக்காளர்கள் நீக்கப்பட்ட தொகுதிகளில் தவெக வெற்றி பெற்றிருந்ததும் இந்தச் சந்தேகங்களை அதிகரிக்கிறது" என்று பிபிசி தமிழிடம் பேசிய திமுக செய்தித் தொடர்பாளர் டி.கே.எஸ். இளங்கோவன் கூறினார்.
மேலும், அதிமுகவில் இருந்து தவெகவுக்கு மாறிய இரண்டு வேட்பாளர்களையும் மக்கள் ஏற்றுக்கொள்ளவில்லை என்பதை இந்த இரண்டு தொகுதிகளிலும் தாங்கள் பார்த்ததாகவும், ஆனால், தேர்தல் முடிவுகள் அதற்கு மாறாக இருப்பது எங்களுக்கு மேலும் சந்தேகங்களை ஏற்படுத்துவதாகவும் கூறுகிறார் இளங்கோவன்.
'அதிமுக 5 ஆயிரம் வாக்குகள் வித்தியாசத்திலாவது வெற்றி பெறும்'
தேர்தல் முடிவுகள் குறித்து பிபிசி தமிழிடம் பேசிய அதிமுக தேர்தல் பிரிவுச் செயலாளர் பொள்ளாச்சி ஜெயராமன், ''இப்போது பின்தங்குவதைப் பற்றி எந்த வருத்தமும் இல்லை. ஏனெனில் வாக்கு எண்ணிக்கை முடிவில் அதிமுக குறைந்தபட்சம் 5 ஆயிரம் வாக்குகள் வித்தியாசத்தில் வெற்றி பெறும் என்ற நம்பிக்கை எனக்கு நிறையவே இருக்கிறது. நான் தாராபுரம் முழுவதும் களத்தில் வலம் வந்த வகையில், அங்குள்ள மக்கள் இரட்டை இலை மீது தீராத பற்று கொண்டுள்ளார்கள். அந்த அதிமுக விசுவாசம் இப்போதும் மாறாமல் இருக்கிறது'' என்றார்.
மேலும் பேசிய அவர், ''அதையும்விட, ஒரே மாதத்தில் தாங்கள் தேர்ந்தெடுத்த சட்டப்பேரவை உறுப்பினர், அதை மதிக்காமல் பதவியை ராஜிநாமா செய்துவிட்டுச் சென்ற கோபம் மக்களிடம் இருக்கிறது. அவருக்கே மீண்டும் வாய்ப்பு வழங்கியது, அந்த கோபத்தை மேலும் அதிகப்படுத்தியுள்ளது. குறிப்பாக ஊரகப் பகுதிகளில் உள்ள மக்கள் இதை ஏற்றுக்கொள்ளத் தயாராக இல்லை. தாராபுரம் நகரப் பகுதியில் அதீதமாக தவெக-வுக்கு வாக்குகள் விழுந்தால் மட்டுமே முடிவு மாறும். ஆனால் நான் பார்த்த வகையில் தாராபுரம் நகரப் பகுதியில் வாக்குப் பதிவு மிகவும் குறைந்துள்ளதால் அதிமுக நிச்சயம் வெற்றி பெறுமென்று நம்புகிறேன்'' என்றார்.
வாக்கு எண்ணிக்கை நடைமுறைகள்
இன்று காலை 8 மணிக்கு முதலில் தபால் வாக்குகள் எண்ணும் பணி தொடங்கிய நிலையில், அதைத் தொடர்ந்து காலை 8.30 மணி முதல் மின்னணு வாக்குப் பதிவு இயந்திரங்களில் (EVM) பதிவான வாக்குகள் எண்ணப்பட்டு வருகின்றன.
மதுராந்தகம் தொகுதி: செங்கல்பட்டுக்கு அடுத்ததாக ஆத்தூர் ஒருங்கிணைந்த சமூக முன்னேற்ற பயிற்சி மையத்தில் வாக்குகள் எண்ணப்படுகின்றன. இங்கு தபால் வாக்குகளுக்கு 2 மேஜைகளும், இயந்திர வாக்குகளுக்கு 14 மேஜைகளும் அமைக்கப்பட்டு, மொத்தம் 22 சுற்றுகளாக வாக்குகள் எண்ணப்பட உள்ளன.
தாராபுரம் தொகுதி: திருப்பூர் எல்.ஆர்.ஜி. அரசு மகளிர் கல்லூரியில் வாக்கு எண்ணிக்கை நடைபெறுகிறது. இங்கு 14 மேஜைகளில் மொத்தம் 23 சுற்றுகளாக வாக்குகள் எண்ணப்பட்டு முடிவுகள் அறிவிக்கப்பட உள்ளன.
இரு மையங்களிலும் 3 அடுக்கு போலீஸ் பாதுகாப்பு போடப்பட்டு இருப்பதுடன், சிசிடிவி கேமராக்கள் மூலம் வாக்கு எண்ணிக்கை அறைகள் தீவிரமாகக் கண்காணிக்கப்பட்டு வருகின்றன.
மதியத்திற்குள் முன்னிலை நிலவரங்கள் மற்றும் பின்னர் இறுதி முடிவுகள் அதிகாரபூர்வமாகத் தெரிய வரும் என எதிர்பார்க்கப்படுகிறது.
ஏன் இந்த இடைத்தேர்தல்?
கடந்த சட்டப்பேரவைத் தேர்தலில், அதிமுக சார்பில் மதுராந்தகம் தொகுதியில் மரகதம் குமரவேலுவும், தாராபுரம் தொகுதியில் சத்தியபாமாவும் வெற்றி பெற்றிருந்தனர்.
இருப்பினும், அவர்கள் இருவரும் தங்களது எம்.எல்.ஏ பதவிகளை ராஜிநாமா செய்துவிட்டு, தமிழக வெற்றிக் கழகத்தில் இணைந்தனர்.
சட்டப்பேரவை உறுப்பினர்கள் தங்களது பதவியை ராஜிநாமா செய்ததைத் தொடர்ந்து, இவ்விரு தொகுதிகளும் காலியானதாக அறிவிக்கப்பட்டு, அக்டோபர் 6ஆம் தேதி இடைத்தேர்தல் நடத்தப்பட்டது.
பட மூலாதாரம், Getty Images
இடைத்தேர்தலின் முடிவுகளின் முக்கியத்துவம்
"காலையில் எட்டு மணிக்குத் தொடங்கிய தபால் வாக்குகளை எண்ணும் பணி முடிந்து, வாக்குப் பதிவு இயந்திரங்களில் பதிவான வாக்குகளை எண்ணும் பணி மொத்தம் 21 சுற்றுகளாக நடந்து வருவதாக" மதுராந்தகம் தொகுதியின் வாக்கு எண்ணும் மையத்தின் முன்பாக இருக்கும் பிபிசி தமிழ் செய்தியாளர் விஜயானந்த் ஆறுமுகம் தெரிவித்தார்.
மதுராந்தகம் சட்டப்பேரவை இடைத்தேர்தலைப் பொறுத்தவரை, அதிமுக வேட்பாளராகக் கடந்த தேர்தலில் போட்டியிட்டு வெற்றி பெற்ற மரகதம் குமரவேல் தனது பதவியை ராஜிநாமா செய்துவிட்டு தவெக-வில் இணைந்து, பிறகு இடைத்தேர்தலில் தவெக சார்பாகப் போட்டியிட்டார்.
இடைத்தேர்தல் வாக்கு எண்ணிக்கை ஆத்தூரில் உள்ள சமூக மேம்பாட்டுக்கான ஒருங்கிணைந்த பயிற்சி மையத்தில் நடந்து வருகிறது. விஜய் தலைமையிலான தவெக-வின் ஆட்சி அமைக்கப்பட்ட பிறகு நடந்துள்ள முதல் இடைத்தேர்தல் என்பதால், இந்த இரு தொகுதிகளின் முடிவுகளும் தமிழக அரசியல் களத்தில் மிகவும் முக்கியமானதாகப் பார்க்கப்படுகிறது.
பதிவான வாக்குகள் எவ்வளவு?
கடந்த பொதுத் தேர்தலுடன் ஒப்பிடுகையில், இந்த இடைத்தேர்தலில் இரண்டு தொகுதிகளிலுமே வாக்குப்பதிவு சதவிகிதம் கணிசமாகக் குறைந்துள்ளது.
மதுராந்தகம் தொகுதியில் 86.26% வாக்குகள் பதிவாகியுள்ளன. இது கடந்த பொதுத் தேர்தலின்போது பதிவான 93.22 சதவிகிதத்தைவிட 7.23% குறைவு.
தாராபுரம் தொகுதியில் 80.31% வாக்குகள் பதிவாகியுள்ளன. கடந்த பொதுத் தேர்தலில் இங்கு 89.9% வாக்குகள் பதிவாகியிருந்த நிலையில், தற்போது 9.58% வாக்குப் பதிவு சரிந்துள்ளது.
களம் காணும் முக்கிய வேட்பாளர்கள் யார்?
மதுராந்தகம் சட்டப்பேரவைத் தொகுதியில் தவெக, திமுக, அதிமுக, நாம் தமிழர் கட்சி, இடதுசாரிகள் என முக்கிய அரசியல் கட்சிகள் நேரடியாக மோதும் 5 முனைப் போட்டி நிலவியது.
ஆளும் தவெக கூட்டணி சார்பில், ஏற்கெனவே இத்தொகுதியில் வெற்றி பெற்று தவெக-வில் இணைந்த மரகதம் குமரவேல் மீண்டும் போட்டியிட்டார்.
அவரை எதிர்த்து திமுக சார்பில் இ. பரந்தாமன், அதிமுக சார்பில் கணிதா சம்பத், நாம் தமிழர் கட்சி சார்பில் ஜானகிராமன், மார்க்சிஸ்ட் கம்யூனிஸ்ட் கட்சி சார்பில் சுகந்தி ஆகியோர் களம் கண்டனர்.
மறுபுறம், தாராபுரம் சட்டப்பேரவைத் தொகுதியிலும் பலப்பரீட்சை தீவிரமாக உள்ளது.
தவெக சார்பில் இத்தொகுதியின் முன்னாள் அதிமுக எம்.எல்.ஏ-வான சத்தியபாமா போட்டியிட்டார்.
இவருக்குப் போட்டியாக திமுக சார்பில் சுகன்யா, அதிமுக சார்பில் க. பானுமதி, நாம் தமிழர் கட்சி சார்பில் கார்த்திகா, இந்திய கம்யூனிஸ்ட் கட்சி (சிபிஐ) சார்பில் லட்சுமணன் ஆகியோர் போட்டியிட்டனர்.
- இது பிபிசிக்காக கலெக்டிவ் நியூஸ்ரூம் வெளியீடு
