ரஷ்யாவை குறிவைக்கும் அமெரிக்க சட்டம் பற்றிய டிரம்ப் முடிவால் இந்தியா நிம்மதி

அமெரிக்க அதிபர் டிரம்புக்கும் யுக்ரேன் அதிபர் ஸெலென்ஸ்கிக்கும் இடையேயான கருத்து வேறுபாடு தீவிரமடைந்து வரும் நிலையில், ரஷ்யா மீதான பல தடைகள் அமலுக்கு வருவதற்கு இரண்டு நாட்களுக்கு முன்பு டிரம்ப் அவற்றை நிறுத்தி வைத்திருக்கிறார்.

யுக்ரேன் மீதான போருக்காக ரஷ்யாவை தண்டிக்கும் நோக்கில் இந்தத் தடைகளுக்கு அமெரிக்க நாடாளுமன்றம் முன்னர் ஒப்புதல் அளித்திருந்தது. இந்த தடைகளை நிறுத்தி வைப்பது அமெரிக்காவின் தேசிய நலனுக்கு உகந்தது என டிரம்ப் கூறி உள்ளார். டிரம்பின் இந்த முடிவுக்கு அமெரிக்க நாடாளுமன்ற உறுப்பினர்கள் சிலர் எதிர்ப்பு தெரிவித்துள்ளனர். அதே நேரம், டிரம்பின் இந்த முடிவு இந்தியாவுக்கு சற்று நிம்மதியையும் தரக்கூடும். இந்த விவகாரத்தின் பின்னணியை சுருக்கமாக பார்க்கலாம்.

அமெரிக்க நாடாளுமன்றம் ஒப்புதல் அளித்திருந்த அந்தச் சட்டம், ரஷ்யாவின் பொருளாதாரத்தை குறிவைக்கும்படி இருந்தது. அந்த சட்டத்தின்படி, ரஷ்யாவின் எண்ணெய் மற்றும் எரிவாயுவை வாங்கும் முதல் ஐந்து நாடுகளிலிருந்து இறக்குமதி செய்யப்படும் பொருட்கள் மீது, 100% வரை சுங்க வரியை விதிக்கும் அதிகாரங்கள் டிரம்ப்பிற்கு வழங்கப்பட்டன.

அதோடு, புதின் உள்ளிட்ட ரஷ்யாவின் உயர்மட்ட தலைவர்கள், ரஷ்ய நிதி நிறுவனங்கள், மற்றும் ஏற்கனவே விதிக்கப்பட்ட தடைகளை தவிர்ப்பதற்காக ரஷ்யா பயன்படுத்தி வரும் நிழல் கப்பற்படை ஆகியவற்றின் மீதான தடைகளும் அடங்கும். இவற்றில் பல தடைகளில் இருந்து டிரம்ப் இப்போது விலக்களித்துள்ளார்.

ரஷ்யாவிடம் இருந்து அமெரிக்கா டீசல் இறக்குமதி செய்ய உள்ளதாக டிரம்ப் அறிவித்த சில நாட்களுக்குப் பிறகு இந்த நடவடிக்கை எடுக்கப்பட்டுள்ளது.

இந்தச் சட்டம் இந்தியாவுக்கு அச்சுறுத்தலாக பார்க்கப்பட்டது. குறிப்பாக, ரஷ்யாவுடன் வர்த்தக ஒப்பந்தங்களை மேற்கொள்வதற்கான முயற்சிகளிலும் டிரம்ப் ஈடுபட்டு வரும் நிலையில், இந்தியா மீது அழுத்தம் கொடுப்பதற்கான அவரது அதிகாரத்தை இந்தச் சட்டம் அதிகரித்திருக்கும்.

ஏனெனில் 2026 ஆகஸ்ட் மாதம் வரை, ரஷ்யாவிடம் இருந்து அதிக அளவில் கச்சா எண்ணெய் வாங்கும் நாடுகளில் சீனாவுக்கு அடுத்தபடியாக இந்தியா இரண்டாவது இடத்தில் இருந்தது. எனவே, அமெரிக்கா விதிக்கக்கூடிய வரிகளால் இந்த இரண்டு ஆசிய நாடுகளும் அதிகம் பாதிக்கப்பட வாய்ப்பிருந்தது.

2022 டிசம்பர் முதல் 2026 ஆகஸ்ட் வரை, ரஷ்யாவின் மொத்த கச்சா எண்ணெய் ஏற்றுமதியில் சீனாவின் பங்கு 50 சதவீதமாகவும், இந்தியாவின் பங்கு 37 சதவீதமாகவும் இருந்தது.

இந்த மசோதா நிறைவேற்றப்பட்ட சமயத்திலேயே இந்திய வெளியுறவு அமைச்சகம் ஓர் அறிக்கையை வெளியிட்டது. இந்த விவகாரம் குறித்து அமெரிக்காவிடம் எடுத்துரைத்துள்ளதாகவும், இதனால் இருதரப்பு உறவுகள் மட்டுமின்றி சர்வதேச எரிசக்திச் சந்தையிலும் ஏற்படக்கூடிய தாக்கம் குறித்துத் தனது கவலையைத் தெரிவித்துள்ளதாகவும் அந்த அறிக்கையில் கூறப்பட்டிருந்தது.

ஏனெனில் அமெரிக்காவில் உள்ள ஓர் இறக்குமதியாளர் இந்தியாவிலிருந்து 20 டாலர் மதிப்புள்ள ஆடைகளை வாங்குகிறார் என்று வைத்துக்கொள்வோம். அந்தப் பொருட்களுக்கு 100 சதவீத இறக்குமதி வரி விதிக்கப்பட்டால், கூடுதலாக 20 டாலர் வரியாகச் செலுத்த வேண்டும்.

இதனுடன் உள்நாட்டு போக்குவரத்துச் செலவு, சில்லறை விற்பனையாளர்களின் லாப வரம்பு போன்ற விஷயங்களும் உள்ளன. அதே நேரம், அதே பொருளை வேறொரு நாட்டிலிருந்து மிகக் குறைந்த இறக்குமதி வரியில் பெற முடிந்தால், இந்தியாவிலிருந்து அதிக விலை கொடுத்து வாங்க வேண்டிய அவசியம் அவர்களுக்கு இருக்காது.

மறுபுறம், அமெரிக்கச் சந்தையைச் சார்ந்திருப்பதை இந்தியாவும் குறைக்க முயன்று வருகிறது. ஆனால், அது அவ்வளவு எளிதானதல்ல. சுதந்திர வர்த்தக ஒப்பந்தங்கள் அமெரிக்கச் சந்தைக்கு மாற்றாக அமைய முடியாது. இருப்பினும், பிற முக்கியச் சந்தைகளில் நுழைவதற்கான செலவைக் குறைக்க அவை உதவக்கூடும்.

ஆனால், வரிச் சலுகைகள் மட்டுமே அந்தச் சந்தைகளில் நுழைவதற்கான வாய்ப்பை உறுதிசெய்யாது. ஏனெனில் ஏற்றுமதி சந்தைகளைப் பன்முகப்படுத்துவதற்கும் ஒரு வரம்பு உண்டு என வல்லுநர்கள் கூறுகின்றனர். உதாரணமாக ஒரு நிறுவனம் அமெரிக்காவைச் சார்ந்திருப்பதை 60 சதவீதம் குறைத்து, ஐரோப்பாவை 60 சதவீதம் சார்ந்திருப்பதாக மாற்றினால், அது புவியியல் ரீதியாக பன்முகப்படுத்தியுள்ளது, ஆனால் உத்தி ரீதியாக அல்ல. சந்தைகளை பன்முகப்படுத்துவதற்கு, வாடிக்கையாளர் தளத்தையும் விரிவுபடுத்த வேண்டியது அவசியம் என்பது வல்லுநர்களின் வாதமாக உள்ளது.

அக்டோபர் 18-ஆம் தேதி அமலுக்கு வரவிருந்த இந்தப் புதிய சட்டத்தை நடைமுறைப்படுத்துமாறு வலியுறுத்தி, இரு முக்கிய அமெரிக்க கட்சிகளையும் சேர்ந்த 20 நாடாளுமன்ற உறுப்பினர்கள் வியாழக்கிழமை டிரம்புக்குக் கடிதம் எழுதினர்.

கடந்த வாரம், ரஷ்ய அதிபர் புதினுடன் தொலைபேசியில் பேசியதாகவும், மாஸ்கோவிலிருந்து டீசல் வாங்க ஒப்புக்கொண்டதாகவும் டிரம்ப் அறிவித்தார்.

இந்த நடவடிக்கையை அமெரிக்காவின் நட்பு நாடுகள் விமர்சித்தன. இது யுக்ரேனுக்கு எதிரான போரில் ரஷ்யாவுக்கு உதவக்கூடும் என அவர்கள் கவலை தெரிவித்தனர். யுக்ரேன் அதிபர், இந்த ஒப்பந்தத்தை புதினுக்கு வழங்கப்படும் பரிசு என விமர்சித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு.