இரானில் அமெரிக்க ராணுவம் மீண்டும் தாக்குதல் - என்ன நடக்கிறது?

தெற்கு இரானில் உள்ள இரானிய ஏவுகணைத் தளங்களையும், கண்ணிவெடிகளைப் பதிப்பதற்கு முயன்ற படகுகளையும் குறிவைத்து, அமெரிக்க ராணுவம் புதிய தாக்குதல்களை நடத்தியுள்ளதாகத் தெரிவித்துள்ளது.

இந்தத் தாக்குதல்கள் "தற்காப்புக்காகவே" மேற்கொள்ளப்பட்டதாகவும், "இரானியப் படைகளால் ஏற்படும் அச்சுறுத்தல்களிலிருந்து எங்கள் படைகளைப் பாதுகாக்கும்" நோக்கத்துடன் திட்டமிடப்பட்டதாகவும் அமெரிக்க மத்தியக் கட்டளைப் பிரிவு தன் அறிக்கையில் தெரிவித்துள்ளது.

"தற்போதைய போர் நிறுத்தத்தின்போது நிதானத்தைக் கடைப்பிடித்து, அமெரிக்க ராணுவம் நமது படைகளைத் தொடர்ந்து பாதுகாத்து வருகிறது" என்று மத்திய கட்டளைப் பிரிவின் செய்தித் தொடர்பாளர் கேப்டன் டிம் ஹாக்கின்ஸ் கூறினார்.

அமெரிக்காவுடனான பேச்சுவார்த்தைகளில் சில முன்னேற்றங்கள் ஏற்பட்டுள்ளதாகவும், ஆனால் மோதலை முடிவுக்குக் கொண்டுவரும் ஒப்பந்தம் "உடனடியாக ஏற்படாது" என்றும் இரான் வெளியுறவு அமைச்சக செய்தித் தொடர்பாளர் இஸ்மாயில் பாகாய் கூறியுள்ள நிலையில் இந்தத் தாக்குதல்கள் நடந்துள்ளன.

நியூயார்க் டைம்ஸ் இதழின்படி, டிம் ஹாக்கின்ஸ் கூறுகையில், ஹோர்மூஸ் நீரிணையில் அமைந்துள்ள இரானிய கடற்படைத் தளம் ஒன்றைக் கொண்டுள்ள, தெற்குத் துறைமுக நகரமான பந்தர் அப்பாஸுக்கு அருகிலுள்ள ஒரு பகுதியையே இந்தத் தாக்குதல்கள் குறிவைத்ததாகத் தெரிவித்தார்.

பந்தர் அப்பாஸில் வெடிப்புச் சத்தங்கள் கேட்டதைத் தொடர்ந்து, அங்குள்ள உள்ளூர் அதிகாரிகள் விசாரணை நடத்தி வருவதாக இரானிய அரசு ஊடகங்கள் முன்னதாகத் தெரிவித்தன.

அமெரிக்காவின் சமீபத்திய தாக்குதல்கள் குறித்து இரான் இன்னும் பதிலளிக்கவில்லை. அமெரிக்காவுக்கும் இரானுக்கும் இடையிலான சாத்தியமான எந்தவொரு அமைதி ஒப்பந்தத்தின் மீதும் இத்தாக்குதல்கள் எத்தகைய தாக்கத்தை ஏற்படுத்தும் என்பது தெளிவாக இல்லை.

வார இறுதியில், இரு தரப்பினரும் ஓர் ஒப்பந்தத்தை எட்டுவதற்கு நெருக்கமாக இருப்பதாக அதிபர் டொனால்ட் டிரம்ப் குறிப்பிட்டிருந்தார்; ஆனால் பின்னர், ஓர் ஒப்பந்தத்தை எட்டுவதில் "அவசரம் காட்ட வேண்டாம்" என்று பேச்சுவார்த்தையாளர்களிடம் தாம் அறிவுறுத்தியிருப்பதாக அவர் தெரிவித்தார்.

அமெரிக்க வெளியுறவுச் செயலாளர் மார்கோ ரூபியோவும், திங்களன்று ஓர் ஒப்பந்தம் எட்டப்படக்கூடும் என்று கூறினார்.

ஆனால் பாகாய் இதுகுறித்து பதிலளிக்கையில், "விவாதத்திலுள்ள பிரச்னைகளின் பெரும்பகுதி குறித்து நாங்கள் ஒரு முடிவை எட்டியுள்ளோம் என்று கூறுவது சரியே... ஆனால், இதன் பொருள் ஓர் ஒப்பந்தம் மிக விரைவில் கையெழுத்திடப்படும் என்று சொல்வதானால், அத்தகைய கூற்றை யாராலும் முன்வைக்க இயலாது" என்றார்.

எந்தவொரு திருப்புமுனையும் ஏற்பட்டிருப்பதை மூத்த அதிகாரிகள் குறைத்து மதிப்பிட்ட போதிலும், அமெரிக்காவுடனான சாத்தியமான ஓர் ஒப்பந்தம் குறித்து கத்தார் பிரதமருடன் பேச்சுவார்த்தை நடத்துவதற்காக, இரானின் முதன்மைப் பேச்சுவார்த்தையாளரும் வெளியுறவு அமைச்சரும் தோஹாவில் இருந்ததாக ராய்ட்டர்ஸ் செய்தி வெளியிட்டுள்ளது.

அமெரிக்க மற்றும் இரானியப் படைகள் ஏப்ரல் 8 முதல் போர் நிறுத்தத்தைக் கடைப்பிடித்து வருகின்றன. இரான், ஹோர்மூஸ் நீரிணை வழியாக வளைகுடா கப்பல் போக்குவரத்தின் மீதான கட்டுப்பாடுகளைத் தொடர்ந்து கடைப்பிடித்து வருகிறது, மேலும் அமெரிக்கக் கடற்படை இரானின் துறைமுகங்களை முற்றுகையிட முயன்று வருகிறது.

பிப்ரவரி 28 அன்று, அமெரிக்காவும் இஸ்ரேலும் இரான் மீது பரவலான தாக்குதல்களைத் தொடுத்தன; இது மத்திய கிழக்கு முழுவதும் மோதலைத் தூண்டியது. இதற்குப் பதிலடியாக, இரான் இஸ்ரேல் மீதும் வளைகுடா பகுதியில் உள்ள அமெரிக்க ஆதரவு நாடுகளின் மீதும் தாக்குதல் நடத்தியதுடன், ஹோர்மூஸ் நீரிணையையும் மூடியது. இரானின் இந்த நடவடிக்கை உலகளவில் எண்ணெய் விலைகளை விண்ணைத் தொடும் அளவுக்கு உயர்த்தியது.

- இது, பிபிசிக்காக கலெக்டிவ் நியூஸ்ரூம் வெளியீடு