ਸਪੇਨ ਵਿੱਚ ਚੋਰਾਂ ਨੇ ਸਿਰਫ਼ 4 ਮਿੰਟਾਂ ’ਚ ਕਿਵੇਂ ਸੋਨੇ ਦੀਆਂ ਕਈ ਵਸਤਾਂ ਚੋਰੀ ਕਰ ਲਈਆਂ, ਅਜਾਇਬ ਘਰ ਵਾਲੇ ਰਹਿ ਗਏ ਹੈਰਾਨ
ਤਸਵੀਰ ਸਰੋਤ, MUVI Villena Museum
- ਲੇਖਕ, ਗੈਬਰੀਏਲਾ ਪੋਮੇਰੋਏ
- ਪ੍ਰਕਾਸ਼ਿਤ
- ਪੜ੍ਹਨ ਦਾ ਸਮਾਂ: 4 ਮਿੰਟ
ਚੋਰਾਂ ਨੇ ਸਪੇਨ ਦੇ ਅਲੀਕਾਂਤੇ ਸੂਬੇ ਦੇ ਇੱਕ ਅਜਾਇਬਘਰ ਵਿੱਚ ਪੂਰਵ-ਇਤਿਹਾਸਕ ਕਾਲ ਦੇ ਸੋਨੇ ਦੇ ਸਭ ਤੋਂ ਮਹੱਤਵਪੂਰਨ ਸੰਗ੍ਰਹਿਆਂ ਵਿੱਚੋਂ ਇੱਕ ਵਿੱਚੋਂ ਗਹਿਣੇ ਅਤੇ ਕਲਾਕ੍ਰਿਤੀਆਂ ਚੋਰੀ ਕਰ ਲਈਆਂ ਹਨ।
ਵਿਲੇਨਾ ਦਾ ਖ਼ਜ਼ਾਨਾ ਲਗਭਗ ਦਸ ਕਿਲੋਗ੍ਰਾਮ ਸੋਨੇ, ਕਟੋਰੀਆਂ, ਬੋਤਲਾਂ ਅਤੇ ਕਾਂਸੀ ਯੁੱਗ ਨਾਲ ਸਬੰਧਤ ਬ੍ਰੈਸਲੇਟ ਦਾ ਇੱਕ ਵਿਲੱਖਣ ਭੰਡਾਰ ਹੈ।
ਪੁਲਿਸ ਅਜੇ ਵੀ ਇਹ ਪਤਾ ਲਗਾ ਰਹੀ ਹੈ ਕਿ ਸ਼ੁੱਕਰਵਾਰ ਸਵੇਰੇ ਤੜਕੇ ਹੋਈ ਇਸ ਚੋਰੀ ਵਿੱਚ ਕੁੱਲ ਕਿੰਨੀਆਂ ਵਸਤਾਂ ਚੋਰੀ ਹੋਈਆਂ ਹਨ। ਅਜਾਇਬਘਰ ਨੇ ਬੀਬੀਸੀ ਨੂੰ ਪੁਸ਼ਟੀ ਕੀਤੀ ਹੈ ਕਿ ਚੋਰੀ ਹੋਈਆਂ ਵਸਤਾਂ ਵਿੱਚ ਅੰਗੂਠੀਆਂ, ਕਟੋਰੀਆਂ ਅਤੇ ਬ੍ਰੈਸਲੇਟ ਸ਼ਾਮਲ ਸਨ।
ਇਹ ਕਿਸੇ ਯੂਰਪੀ ਅਜਾਇਬਘਰ ਵਿੱਚ ਹੋਈ ਤਾਜ਼ਾ ਵੱਡੀ ਚੋਰੀ ਹੈ। ਪਿਛਲੇ ਸਾਲ ਚੋਰਾਂ ਨੇ ਪੈਰਿਸ ਦੇ ਲੂਵਰ ਵਿੱਚ ਦਿਨ-ਦਿਹਾੜੇ ਬਿਨਾਂ ਡਰ ਦੇ ਚੋਰੀ ਕੀਤੀ ਸੀ।
ਵਿਲੇਨਾ ਟਾਊਨ ਕੌਂਸਲ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਵਿਲੇਨਾ ਅਜਾਇਬਘਰ ਵਿੱਚ ਹੋਈ ਕਾਰਵਾਈ "ਬਹੁਤ ਤੇਜ਼ ਅਤੇ ਬਹੁਤ ਪੇਸ਼ੇਵਰ" ਸੀ।
ਸਿਟੀ ਕੌਂਸਲ ਨੇ ਕਿਹਾ ਕਿ ਚੋਰੀ ਦੀ ਸ਼ੁਰੂਆਤ ਧਿਆਨ ਭਟਕਾਉਣ ਨਾਲ ਕੀਤੀ ਗਈ। ਸਪੇਨੀ ਮੀਡੀਆ ਮੁਤਾਬਕ, ਸਥਾਨਕ ਸਮੇਂ ਅਨੁਸਾਰ ਲਗਭਗ 05:15 ਵਜੇ (03:15 ਜੀਐੱਮਟੀ) ਸਥਾਨਕ ਖੇਡ ਕੇਂਦਰ ਦੇ ਅਲਾਰਮ ਵੱਜੇ, ਜਿਸ ਕਾਰਨ ਪੁਲਿਸ ਪਹਿਲਾਂ ਉੱਥੇ ਪਹੁੰਚ ਗਈ।
ਅਜਾਇਬਘਰ ਦਾ ਅਲਾਰਮ ਇਸ ਤੋਂ ਬਾਅਦ ਲਗਭਗ 05:20 ਵਜੇ ਵੱਜਿਆ। ਚੋਰਾਂ ਨੂੰ ਅਜਾਇਬਘਰ ਵਿੱਚੋਂ ਸਮਾਨ ਇਕੱਠਾ ਕਰ ਕੇ ਅਧਿਕਾਰੀਆਂ ਦੇ ਪਹੁੰਚਣ ਤੋਂ ਪਹਿਲਾਂ ਇਮਾਰਤ ਤੋਂ ਬਾਹਰ ਨਿਕਲਣ ਵਿੱਚ ਸਿਰਫ਼ ਚਾਰ ਮਿੰਟ ਲੱਗੇ।
ਐੱਲ ਪੈਸ ਦੀ ਰਿਪੋਰਟ ਮੁਤਾਬਕ, ਵਿਲੇਨਾ ਦੇ ਮੇਅਰ ਫੁਲਹੇਨਸੀਓ ਸੇਰਦਾਨ ਨੇ ਕਿਹਾ ਕਿ ਚੋਰਾਂ ਨੇ "ਖ਼ਜ਼ਾਨੇ ਦਾ ਵੱਡਾ ਹਿੱਸਾ ਚੋਰੀ ਕਰ ਲਿਆ", ਖ਼ਾਸ ਤੌਰ 'ਤੇ ਸਾਰਾ ਸੋਨਾ।
ਅਜਾਇਬਘਰ ਦਾ ਇਹ ਸੰਗ੍ਰਹਿ ਲਗਭਗ 1,000 ਈਸਾ ਪੂਰਵ ਦਾ ਹੈ। ਇਸ ਵਿੱਚ ਮੁੱਖ ਤੌਰ 'ਤੇ ਸੋਨੇ ਦੀਆਂ ਵਸਤਾਂ ਹਨ, ਪਰ ਚਾਂਦੀ, ਲੋਹੇ ਅਤੇ ਅੰਬਰ ਦੀਆਂ ਵਸਤਾਂ ਵੀ ਮੌਜੂਦ ਹਨ।
ਇਸ ਵਿੱਚ ਕਾਂਸੀ ਯੁੱਗ ਦੀਆਂ 60 ਤੋਂ ਵੱਧ ਵਸਤਾਂ ਹਨ, ਜਿਨ੍ਹਾਂ ਵਿੱਚ 29 ਬ੍ਰੈਸਲੇਟ, 11 ਕਟੋਰੀਆਂ, ਤਿੰਨ ਬੋਤਲਾਂ ਅਤੇ ਹੋਰ ਵੱਖ-ਵੱਖ ਵਸਤਾਂ ਸ਼ਾਮਲ ਹਨ।
ਸੇਰਦਾਨ ਨੇ ਕਿਹਾ ਕਿ ਸ਼ਹਿਰ "ਤਬਾਹ ਹੋ ਗਿਆ ਹੈ। ਉਹ ਖ਼ਜ਼ਾਨੇ ਦਾ ਜ਼ਿਆਦਾਤਰ ਹਿੱਸਾ ਲੈ ਗਏ ਹਨ।"
ਮੇਅਰ ਨੇ ਕਿਹਾ, "ਮੈਂ ਤਾਂ ਕੰਬ ਰਿਹਾ ਹਾਂ। ਸੱਚ ਇਹ ਹੈ ਕਿ ਵਿਲੇਨਾ ਦੇ ਰਹਿਣ ਵਾਲਿਆਂ ਲਈ ਇਹ ਸਾਨੂੰ ਅੰਦਰੋਂ ਤੋੜ ਦਿੰਦਾ ਹੈ। ਇਹ ਸਾਡੀ ਵਿਰਾਸਤ ਅਤੇ ਸਾਡੀ ਦੌਲਤ ਦਾ ਹਿੱਸਾ ਹੈ।"
ਤਸਵੀਰ ਸਰੋਤ, MUVI Villena Museum
ਇਹ ਸੰਗ੍ਰਹਿ 1963 ਵਿੱਚ ਪੁਰਾਤੱਤਵ ਵਿਗਿਆਨੀ ਜੋਸੇ ਮਾਰੀਆ ਸੋਲੇਰ ਨੇ ਵਿਲੇਨਾ ਵਿੱਚ ਇੱਕ ਸੁੱਕ ਚੁੱਕੀ ਨਦੀ ਦੇ ਤਲ ਵਿੱਚ ਦੱਬੇ ਹੋਏ ਇੱਕ ਭਾਂਡੇ ਵਿੱਚੋਂ ਲੱਭਿਆ ਸੀ।
ਵਿਲੇਨਾ ਕੌਂਸਲ ਦੇ ਬੁਲਾਰੇ ਨੇ ਜ਼ੋਰ ਦੇ ਕੇ ਕਿਹਾ ਕਿ ਅਜਾਇਬਘਰ ਵੱਲੋਂ "ਕੋਈ ਗਲਤੀ" ਨਹੀਂ ਹੋਈ ਸੀ।
"ਸਾਰੇ ਸੁਰੱਖਿਆ ਪ੍ਰਬੰਧ ਸਰਗਰਮ ਸਨ।"
ਪਿਛਲੇ ਇੱਕ ਸਾਲ ਦੌਰਾਨ ਯੂਰਪੀ ਅਜਾਇਬਘਰਾਂ ਵਿੱਚ ਚੋਰੀ ਦੀਆਂ ਕਈ ਘਟਨਾਵਾਂ ਹੋਈਆਂ ਹਨ। ਅਕਤੂਬਰ 2025 ਵਿੱਚ ਚੋਰਾਂ ਨੇ ਦਿਨ-ਦਿਹਾੜੇ ਪੈਰਿਸ ਦੇ ਲੂਵਰ ਅਜਾਇਬਘਰ ਵਿੱਚ ਦਾਖ਼ਲ ਹੋ ਕੇ 102 ਮਿਲੀਅਨ ਡਾਲਰ ਦੀ ਕੀਮਤ ਦੇ ਗਹਿਣੇ ਚੋਰੀ ਕਰ ਲਏ ਸਨ ਅਤੇ ਸਕੂਟਰਾਂ 'ਤੇ ਫ਼ਰਾਰ ਹੋ ਗਏ ਸਨ। ਇਸ ਚੋਰੀ ਨੂੰ ਅੰਜਾਮ ਦੇਣ ਵਿੱਚ ਲਗਭਗ ਅੱਠ ਮਿੰਟ ਲੱਗੇ ਸਨ।
ਇਟਲੀ ਦੇ ਸੱਭਿਆਚਾਰ ਮੰਤਰਾਲੇ ਨੇ ਕਿਹਾ ਕਿ ਪਿਛਲੇ ਹਫ਼ਤੇ ਇਟਲੀ ਦੇ ਸਿਸਲੀ ਵਿੱਚ ਇੱਕ ਅਜਾਇਬਘਰ ਤੋਂ ਪੁਨਰਜਾਗਰਣ ਕਾਲ ਦੇ ਕਲਾਕਾਰ ਐਂਟੋਨੇਲੋ ਦਾ ਮੇਸੀਨਾ ਦੀਆਂ "ਬੇਹੱਦ ਕੀਮਤੀ" ਚਾਰ ਕਲਾਕ੍ਰਿਤੀਆਂ ਚੋਰੀ ਹੋ ਗਈਆਂ।
ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਇਟਲੀ ਦੀ ਪੁਲਿਸ ਨੇ ਕਿਹਾ ਸੀ ਕਿ ਉਨ੍ਹਾਂ ਨੇ ਰੇਨੋਆਰ, ਸੇਜ਼ਾਨ ਅਤੇ ਮਾਤੀਸ ਦੀਆਂ 10.4 ਮਿਲੀਅਨ ਡਾਲਰ ਤੋਂ ਵੱਧ ਕੀਮਤ ਦੀਆਂ ਪੇਂਟਿੰਗਾਂ ਬਰਾਮਦ ਕਰ ਲਈਆਂ ਹਨ, ਜੋ ਪਰਮਾ ਨੇੜੇ ਮੈਗਨਾਨੀ-ਰੋਕਾ ਫਾਊਂਡੇਸ਼ਨ ਅਜਾਇਬਘਰ ਤੋਂ ਚੋਰੀ ਹੋਈਆਂ ਸਨ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
