Appeal court set aside judgment wey allow Muslim students to wear hijab for schools
Di Court of Appeal for Ibadan don set aside one di High Court judgment wey permit female Muslim students make dem dey wear hijab for University of Ibadan International School, ISI.
Justice Biobele Georgewill wey deliver di judgement on Friday wit Justice K.I. Amadi agree, to overturn di high court judgement.
Di case bin start for 2018 wen ISI ban female Muslim students make no dey wear headscarf wit dia uniform.
Eleven students, wit support from Muslim Rights Concern, sue di school and di University of Ibadan for Oyo State High Court ova di alleged infringement of dia human rights.
On 22 May 2024, di High Court rule in favor of di students.
Justice Moshood Ishola tok say ISI na public institution and di ban dey violate di students' rights to freedom of religion and freedom from discrimination under di Nigerian Constitution.
Di school come go appeal di case.
During di rulling, di court tok say ISI na private school, no be public institution.
Justice Georgewill add say di Supreme Court decision go dey applied to hijab for only public schools for Lagos State, e no dey apply to private schools.
Di Judge tok say right to religion na personal right wey pesin fit waive.
According to di judge di students don waive dat right wen dem sign undertaking to obey ISI rules and regulations, including dia dress code.
"For public schools, you fit wear hijab on top school uniform base on di Supreme Court judgment, but di Supreme Court neva make any decision on di use of hijab for private schools," e rule.
Justice Fadawu Umar, in di minority judgment, still dey support High Court decision.
E tok say di appeal lack merit, make dem dismiss am.
Wit Friday ruling, Court of Appeal don cancel di lower court judgemet wey allow hijab for ISI.
Dis go take effect immediately and di school uniform policy wey prohibits hijab go still stand until dem appeal again for di Supreme Court.
