د فوټبال نړیوال جام: اسپانیا د فرانسې په ماتولو سره پایلوبې ته ووته
د عکس سرچینه، Getty Images
اسپانیا د ۲۰۲۶م کال فوټبال نړیوال جام په نیمهپایلوبه کې فرانسې ته دوه – صفر ماته ورکړه او لومړۍ لوبډله شوه چې د دغه جام پایلوبې ته یې لار ومونده.
د دوی ترمنځ نیمهپایلوبه د امریکا متحدو ایالتونو په دالاس لوبغالي کېده.
اسپانیا لپاره لومړی ګول مایکل اویارزابال په ۲۲مه دقېقه کې د پېنلتۍ پر شوټ وواهه او دغه تفاوت د لومړۍ نیمايي تر وروستیو دوام وکړ.
د دویمې نیمايۍ په لومړیو کې اسپانوي منځدګري پېدرو پورو د دانیال اولمو کارواخال په پاس دویم ګول وکړ او په دې توګه یې د خپلې لوبډلې د بریا بنسټ پوخ کړ.
د اسپانیا پیاوړې دفاعي لیکه، چې په روان نړیوال جام کې یې یوازې یو ګول خوړلی، د فرانسې د پیاوړو بریدګرو پر وړاندې هم ماته نه شوه.
د عکس سرچینه، Getty Images
د اسپانیا فوټبال لوبډلې له دې مهمې بریا سره د خپله نه ماتېدو تر ټولو اوږده لړۍ نوره هم پسې وغځوله.
دغه هېواد د ۲۰۲۴ کال له مارچ راهیسې چې له کولمبیا یې یو - صفر ماته خوړلې وه، په خپلو تېرو ۳۷ لوبو کې نه دی مات شوی.
دوی په دې موده کې له نننۍ سیالۍ سره ۲۸ ګټلې او ۹ مساوي کړې دي.
فرانسې بیا تر نننۍ سیالۍ ورمخکې په روان نړیوال جام کې د ۲ ګولو په مقابل کې ۱۶ ګولونه وهلي وو او د ډېرو په اند د دغو سیالیو تر ټولو بشپړه او تکړه لوبډله ګڼل کېده.
دا اتم ځل و چې فرانسه د نړیوال جام په نیمهپایلوبو کې لوبېده.
دغه هېواد د ۲۰۱۸ کال نړیواله اتلولي ګټلې او ورپسې په ۲۰۲۲ کې یې پایلوبه ارجنټاین ته بایللې وه.
دویمه نیمه پایلوبه کله او د چا ترمنځ ده؟
د عکس سرچینه، Getty Images
په دویمه نیمه پایلوبه کې چې سبا (چارشنبه د جولای ۱۵مه) په اتلانتا لوبغالي کې کېږي، مدافع اتل ارجنټاین له انګلنډ سره مخامخ دی.
دا به له ۲۰۱۸ کال راوروسته د نړیوال جام دویمه نیمه پایلوبه وي چې انګلنډ پکې ګډون کوي.
انګلنډ خپله یوازینۍ نړیواله اتلولي شپېته کاله مخکې، ګټلې وه او له هغه وروسته یې د دې جام د بیا خپلولو خوب نه دی پوره شوی.
انګلنډ هڅه کوي چې ۶۰ کلونو وروسته په لومړي ځل ځان پایلوبې ته ورسوي، خو دا ځل په نیمهپایلوبو د نړیوالې اتلولۍ له مدافع ارجنټاین سره مخامخ دی.
سږ د ۱۹۸۶ کال د هغې مشهورې سیالۍ ۴۰ کاله پوره کېږي چې ډیاګو مارادونا پکې نږدې په یوازې ځان انګلنډ د منځلوبو یا کوارټرفاینلز له پړاوه وایست.
انګلنډ له ۲۰۱۸ کال راهیسې په څلورو سترو ټورنمنټونو کې نیمه پایلوبې ته رسېدلی، چې دا له ۲۰۱۸ کال ورمخکې د دوی د ټول تاریخ د نیمه پایلوبو له شمېر سره برابرېږي.
ارجنټاین بیا په تېرو څلورو نړیوالو جامونو کې درېیم ځل لپاره (۲۰۱۴، ۲۰۲۲ او ۲۰۲۶) نیمهپایلوبو ته وتلی.
